31 Jan 2018, 10:40
ކ.އަތޮޅު ގުޅީ ސްކޫލުގައި ކިޔަވަމުންދާ ދަރިވަރަކަށް ބިދޭސީ ޓީޗަރަކު އަނިޔާ ކުރި ކަމަށް ބުނާ މައްސަލައެއް ފެންމަތިވެއްޖެއެވެ.
"ސަން" އަށް އެނގިފައިވާ ގޮތުގައި އެކުއްޖާއަށް އަނިޔާކޮށްގެން އެ މައްސަލަ ގުޅީ ޕޮލިސް ސްޓޭޝަނަށް ހުށައަޅާފައިވަނީ ރޭގެ ވަގުތެއްގައެވެ.
އެނގިފައިވާ ގޮތުގައި އެކުއްޖާ ސިއްހީ މަރުކަޒަށް ގެންގޮސް ޑޮކްޓަރަށް ދެއްކީވެސް ފުލުހުންނެވެ.
ގުޅީ ސްކޫލުގެ ގުރޭޑް ފަހެއްގައި ކިޔަވަމުންދާ އުމުރުން 10 އަހަރުގެ އަންހެން ކުއްޖާ ޑޮކްޓަރަށް ދެއްކި ބޭސް ސިޓީއާ އަދި އޭނާއަށް ލިބިފައިވާ އަނިޔާ ފެންނަ ބައެއް ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ.
"ސަން"އާ ވަހަކަ ދައްކަމުން ގުޅީ ސިއްހީ މަރުކަޒުގެ އިސް އޮފިޝަލަކު ވިދާޅުވީ ފުލުހުންގެ އެދުމަކަށް ރޭ އެ މަރުކަޒު ބަންދު ގަޑީގައި ކުޑަ ކުއްޖަކު ޑޮކްޓަރަށް ދައްކާފައިވާ ކަމަށާއި، ނަމަވެސް އިތުރު ތަފްސީލް ދެވެން ނެތް ކަމަށެވެ.
ފުލުހުންގެ މީޑިއާ އޮފިޝަލް "ސަން"އަށް ވިދާޅުވީ އެފަދަ މައްސަލައެއް ހުށައެޅިފައިވާ ކަމަށާއި، އެ މައްސަލަ ބަލަމުންދާ ކަމަށެވެ.
ގުޅީ ސްކޫލުން ބުނީ އެ މައްސަލައިގައި މީޑިއާއަށް އެއްވެސް ކޮމެންޓެއް ދޭން ބޭނުން ނުވާ ކަމަށެވެ. ނަމަވެސް އެކަން ދޮގެއް ނުކުރައްވައެވެ.