25 Jan 2018, 12:52
ނިމިދިޔަ 2017 ވަނަ އަހަރު ގައުމީ ބޭންކަށް ފައިދާގެ ގޮތުގައި 350 މިލިޔަން ރުފިޔާ ލިބިއްޖެ ކަމަށް ބޭންކުން ހާމަކޮށްފިއެވެ. މިއީ މިދިޔަ އަހަރުގެ ތިންވަނަ ކުއާޓަރާ އަޅާ ބަލާއިރު 42 ޕަސަންޓުގެ ކުރިއެރުމެކެވެ.
ބޭންކް އޮފް މޯލްޑިވްސްއިން ބުނީ، މިދިޔަ އަހަރުގެ ފަހު ކުއާޓަރުގައި، އެ ބޭންކުން ވިޔަފާރިކުރާ ގާތްގަނޑަކަށް ހުރިހާ ދާއިރާއަކުންވެސް ރަނގަޅު ފައިދާ ލިބިފައިވާ ކަމަށެވެ.
ބީއެމްއެލްއިން ބުނީ، މުޅި މިދިޔަ އަހަރުގެ މާލީ ނަތީޖާތައް އަދި އާންމު ނުކުރެވި ވަނީ އޮޑިޓުގެ މަސައްކަތްތައް ކުރިޔަށް ދާތީ ކަމަށެވެ. މިދިޔަ އަހަރު ބޭންކު ހިންގުމުގެ ޚަރަދު ބޮޑުވުމުގެ އިތުރުން، ބޭންކުގެ ފަރާތުން މުޖުތަމަޢަށް އެހީތެރިކަން ފޯރުކޮށްދިނުމަށްޓަކައި "އަހަރެންގެ ބޭންކް" ޕްރޮގްރާމް ހިންގި ނަމަވެސް، އުންމީދު ކުރި ވަރަށް ވުރެ ރަނގަޅު މާލީ ފައިދާއެއް މިދިޔަ އަހަރު ލިބިފައިވާ ކަމަށް ބޭންކުން ލަފާ ކުރެއެވެ.
ބީއެމްއެލްއިން ބުނި ގޮތުގައި މިދިޔަ އަހަރު އެކުންފުންޏަށް އާ 23،000 ކަސްޓަމަރުންވެސް ލިބިފައިވެއެވެ.