25 Jan 2018, 12:51
ގައުމީ ބޭންކް، ބޭންކް އޮފް މޯލްޑިވްސްގެ ޚިދުމަތް ރާއްޖެއިން ބޭރަށް ފުޅާކުރުމުގެ މަސައްކަތް އެ ބޭންކުން ފަށައިފިއެވެ.
މިއަދު ހޮޓެލް ޖެންގައި ބޭއްވި ރަސްމިއްޔާތެއްގައި، ބީއެމްއެލްގެ ސީއީއޯ އަދި މެނޭޖިންގް ޑިރެކްޓަރު އެންޑްރޫ ހީލީ ވިދާޅުވީ، މިހާތަނަށް ބީއެމްއެލްގެ މައިގަނޑު ފޯކަސްއަކަށް ވެފައި އޮތީ ދިވެހިރާއްޖެއަށް ޚިދުމަތްތައް ފުޅާކުރުން ކަމަށެވެ.
"އަޅުގަނޑުމެން ރާއްޖޭގައި ހިންގަމުން މި ދާ އިންވެސްޓްމެންޓް ޕްރޮގްރާމަކީ މިކަމުގެ އަލިގަދަ ހެއްކެއް،" އެންޑްރޫ ވިދާޅުވިއެވެ.
އެހެން ނަމަވެސް ރާއްޖެއިން ބޭރަށް ބީއެމްއެލް ފުޅާވެގެން ދިއުމަކީ އެކަމުގެ ފައިދާތައްވެސް ކުރާނެ ކަމެއް ކަމަށާއި، ރާއްޖޭގައި އިންވެސްޓްކުރުމަށް އިތުރަށް އާމްދަނީ ލިބޭނެ ކަމެއް ކަމަށް އެންޑްރޫ ވިދާޅުވިއެވެ.
ބީއެމްއެލްއިން ހޮޓެލް ޖެންގައި މިއަދު ބޭއްވި ރަސްމިއްޔާތުގެ ތެރޭން --- ފޮޓޯ: ބީއެމްއެލް
އެގޮތުން، އޭޝިއާގެ ގައުމެއްގައި ބީއެމްއެލް އޮޕަރޭޓުކުރުމަށްޓަކައި ބޭންކިންގް ލައިސަންސަށް އެދި ހުށަހެޅުމުގެ މަސައްކަތް ބީއެމްއެލްއިން ކުރަމުންދާ ކަން އެންޑްރޫ މިއަދު އިއުލާން ކުރެއްވިއެވެ. ނަމަވެސް އެއީ ކޮން ގައުމެއް ކަމެއް އޭނާ ހާމައެއް ނުކުރައްވައެވެ.
"އަޅުގަނޑުމެން މިދަނީ އޭޝިއާގެ ގައުމެއްގައި ޚިދުމަތް ފޯރުކޮށްދިނުމަށް ބޭންކިންގް ލައިސަންސަށް އެދި ހުށަހެޅުމަށް މަސައްކަތް ކުރަމުން. އުންމީދުކުރަނީ މި އަހަރު ނިމުމުގެ ކުރިން އެގައުމުގައި ބޭންކް އޮފް މޯލްޑިވްސްގެ ޚިދުމަތް ދޭން ފެށުން،" އެންޑްރޫ ވިދާޅުވިއެވެ.