23 Jan 2018, 13:28
ދެމެހެއްޓެނިވި ގޮތެއްގައި ރަށްރަށަށް ކަރަންޓު ފޯރުކޮށްދިނުމަށް އިއާދަ ކުރަނިވި ހަކަތަ ފޯރުކޮށްދިނުމުގެ މަޝްރޫއުގެ މަސައްކަތް ހަލުވިކަމާއެކު ކުރިއަށް އެބަ ދާ ކަމަށް އެންވާރަމަންޓު މިނިސްޓަރު ތޯރިގު އިބްރާހީމް ވިދާޅުވެއްޖެއެވެ.
އިއާދަކުރަނިވި ހަކަތައިގެ ވަސީލަތްތައް މެދުވެރިކޮށް ރާއްޖޭގެ މީހުން ދިރިއުޅޭ ހުރިހާ ރަށެއްގައި، އެ ރަށެއްގެ ދުވާލުގަޑީގައި ބޭނުންވާ ކަރަންޓުގެ އެންމެމަތީ ލޯޑުގެ 30 ޕަސަންޓަށް ވުރެ މަދުނުވާ މިންވަރަށް ކަރަންޓު ފޯރުކޮށްދިނުމަކީ ސަރުކާރުގެ ސިޔާސަތެކެވެ.
އެންވާރަމަންޓް މިނިސްޓަރ ތޯރިގް ހުޅުމާލޭގައި ގާއިމް ކުރާ ސޯލާ ޕެނަލްގެ މަސައްކަތް ކުރިއަށްދާ ގޮތް ބައްލަވާ ލައްވަނީ-- ފޮޓޯ: އެންވަޔަރަމެންޓް މިނިސްޓްރީ
އަތޮޅުތެރޭގައި ފެނާއި ކަރަންޓުގެ ޚިދުމަތަށް ނަގާ އަގު މާލެއިންވެސް ނަގާ އަގާ އެއްވަރަށް ހެޔޮކުރި ކަން އިއުލާނު ކުރުމަށް އެންވާރަމަންޓް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ތާރިގް ވިދާޅުވީ ހއ. އަދި ހދ. އަތޮޅުގެ ރަށްރަށުގައި ސޯލާ ޕެނަލް ޖެހުމުގެ އަމަލީ މަސައްކަތް ފެށިގެން ކުރިއަށްދާ ކަމަށާއި ށ. އަދި ނ. އަތޮޅުގައި އެ މަސައްކަތް ލަސްތަކެއް ނުވެ ފެށޭނެ ކަމަށެވެ.
އަތޮޅުތެރޭގައި ފެނާއި ކަރަންޓުގެ ޚިދުމަތަށް ނަގާ އަގު މާލެއިންވެސް ނަގާ އަގާ އެއްވަރަށް ހެޔޮކޮށްފިކަން އިއުލާނު ކުރުމަށް އެންވަޔަރަންމެންޓް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން-- ފޮޓޯ: އެންވާރަމެންޓް މިނިސްޓްރީ
"އެހެން ހިސާބުގައިި ވެސް އެ މަސައްކަތް ޑިޒައިން ކުރެވި ޓެންޑާ ކުރުމުގެ މަސައްކަތް ކުރިއަށް ދަނީ. އައްޑޫ އަތޮޅުގައި 1.6 މެގަވޮޓުގެ ސޯލާ ޕެނަލް ޖަހައި މިހާރު އެ މަސައްކަތް އޮތީ ގްރިޑާ ގުޅިފައި. މީގެ އިތުރުން ގދ. ތިނަދޫ، ގއ. ވިލިނގިލި، ތ. ބުރުނީ، ބ. ގޮއިދޫ ގައި ސޯލާ ޕެނަލް ޖަހައި ނިމި ކަރަންޓު ދެމުން ދަނީ." މިނިސްޓަރު ވިދާޅުވިއެވެ.
ހުޅުމާލޭގައި ގާއިމް ކުރާ ސޯލާ ޕެނަލްތައް-- ފޮޓޯ: އެންވަޔަރަމެންޓް މިނިސްޓްރީ
މިނިސްޓަރު އިތުރަށް ވިދާޅުވީ ސޯލާ ޕެނަލްތަކުގެ މަސައްކަތް ރަނގަޅު ކުރުމަށް ޑިސްޓްރިބިއުޝަން ޕެނަލްތައް ބަދަލުކޮށް، ޖަނަރޭޓަރަށް ގެންނަންޖެހޭ ބަދަލުތައް ގެންނަމުންދާ ކަމަށެވެ. އަދި މި މަޝްރޫއު ނިމިގެންދާއިރު، ރާއްޖޭގެ ހުރިހާ ރަށެއްގައި ވެސް ސިންކްރޮނައިޒްޑު ޕެނަލް ބެހެއްޓިގެންދާނެ ކަމަށް އޭނާ ވިދާޅުވިއެވެ.
އެންވާރަމަންޓް މިނިސްޓްރީން މީގެ ކުރިން ބުނެފައިވަނީ، 2014 އަދި 2015 ވަނަ އަހަރު ހަތް ރަށެއްގައި އިއާދަކުރަނިވި ހަކަތައިން ކަރަންޓު އުފައްދާ ހައިބްރިޑް ނިޒާމްތަކެއް ގާއިމްކޮށް، އދ. ދިއްދޫއާއި ވ. ރަކީދޫގައި އެ ނިޒާމް ގާއިމް ކުރެވި ހިދުމަތްދޭން ފަށާފައިވާ ކަމަށެވެ.