ރާއްޖޭގެ
ބިމުން ބޮޑު ބައެއް އެއްވެސް ޓެކުހެއް ނެގުމެއް ނެތި ސަރުކާރުން ބޭރު ފަރާތްތަކަށް
ވިއްކައިލަނީ ކުދި ވިޔަފާރިތަކުން އިތުރަށް ޓެކްސް ނަގާ މަންޒަރު ފޮރުވުމަށްކަމަށް
ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
ހޯމަ ދުވަހު
ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ކެންދޫ ދާއިރާގެ މެމްބަރު
މައުރޫފް ޒާކިރު ވިދާޅުވީ، މިހާރު ފެންނަމުންދަނީ ސަރުކާރުގެ ދެއުޅި އެއްނުވާ ސިޔާސަތުތަކާއި
އެކަންކަމުގެ ނަތީޖާ އާއި ރައްޔިތުން ކުރިމަތިލާން ޖެހޭ މަންޒަރު ކަމަށެވެ.
މިސާލަކަށް
ސަރުކާރުން ބޭނުންވެގެން 20 ވަނަ ރައްޔިތުންގެ މަޖިލީހުން ޓެކުހާ ބެހޭ ގާނޫނުތަކަށް
ގެނައި އެއްވެސް ބަދަލަކުންވެސް ދައުލަތަށް ނުވަތަ ރައްޔިތުންނަށް ފައިދާއެއް ވާތަން
ނުފެންނަ ކަމަށް އޭނާ ފާހަގަކުރެއްވި އެވެ.
މައުރޫފް
ވިދާޅުވީ ރާއްޖޭގެ ޓެކްސްގެ ވަށާޖެހޭ ނިޒާމުން ބޭރުން، ބޮޑެތި އިންވެސްޓްމަންޓްތަކުގެ
ނަމުގައި ސެޓްލްމަންޓުތައް ރާއްޖެއަށް ގެންނަމުންދާ ކަމަށެވެ. ނަމަވެސް މިފަދަ ސެޓްލްމަންޓުތަކުން
ދައުލަތަށް އެންމެ ޓެކްސްއެއްވެސް ނުލިބޭކަން އޭނާ ފާހަގަކުރެއްވި އެވެ. މިއީ ގައުމުގެ
އިގްތިސާދަށް އޮތް ބޮޑު ކަންބޮޑުވުމެއްގެ ގޮތުގައި މައުރޫފް ސިފަކުރެއްވި އެވެ.
މީގެ އިތުރުން،
ކުދި ވިޔަފާރިތަކުން އިތުރަށް ޓެކްސް ނަގަމުންދާ މަންޒަރު ފޮރުވުމަށްޓަކައި، ސަރުކާރުން
ރާއްޖޭގެ ބިމުން ބޮޑު ބައެއް އެއްވެސް ޓެކުހެއް ނެގުމެއް ނެތި ބޭރުގެ ފަރާތްތަކަށް
ވިއްކަމުންދާ ކަމަށްވެސް މައުރޫފް ތުހުމަތު ކުރެއްވި އެވެ.
މިއީ ދެފުށް
ފެންނަ ސިޔާސަތެއް ނޫން ކަމަށާއި، މީގެ ސަބަބުން ރާއްޖޭގެ މިލްކުވެރިކަމަށް އަސަރުކުރާނެ
ކަމަށް އޭނާ ވިދާޅުވި އެވެ.
ރަސްމާލެ
މަޝްރޫއާ ގުޅޭގޮތުން ވާހަކަދައްކަވަމުން މައުރޫފް ވިދާޅުވީ، އެ މަޝްރޫއު ހިންގުމަށް
އީގަލް ހިލްސް ކުންފުނި ރާއްޖެއަށް ގެނައުމުގެ ކުރިން، އެކަމާ މެދު އާންމު ރައްޔިތުންގެ
ފެންނަ ނުފެންނަ ވޯޓަކަށް ދާންޖެހޭ ކަމަށެވެ. ގައުމުގެ ބޮޑެތި ނިންމުންތައް ނިންމަންވާނީ
ރައްޔިތުންގެ ބަސް ހޯދައިގެން ކަމަށް ގޮވާލައްވަމުން މައުރޫފް ވަނީ ސަރުކާރުގެ މިހާރުގެ
މިސްރާބާ މެދު ސުވާލު އުފައްދަވާފަ އެވެ.