ހިލޭ ޑިގްރީ ސްކީމްގައި 19,265 ދަރިވަރުން ބައިވެރިވެފައިވާ ކަމަށާއި، މިހާތަނަށް އެ ސްކީމަށް 835 މިލިއަން ރުފިޔާ ޚަރަދުކޮށްފައިވާކަން އޮޑިޓަރ ޖެނެރަލް އޮފީހުން ނެރުނު އޮޑިޓް ރިޕޯޓުން ހާމަވެއްޖެ އެވެ.
އޮޑިޓަރ ޖެނެރަލްގެ އޮފީހުން ނެރުނު ޕަރފޯމަންސް އޮޑިޓް ރިޕޯޓުގައިވާ ގޮތުން ދިވެހި ސަރުކާރުން ކުރިއަށްގެންދާ ފުރަތަމަ ޑިގްރީއަށް ހިލޭ ކިޔަވައިދިނުމުގެ ސްކީމުގެ ދަށުން 2019 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް 835.6 މިލިއަނަށްވުރެ ގިނަ ރުފިޔާ ޚަރަދުކޮށްފައިވާކަން ވަނީ ހާމަކޮށްފަ އެވެ.
މި މުއްދަތުގެ ތެރޭގައި ޖުމްލަ 19,265 ދަރިވަރުން މި ސްކީމުގައި ބައިވެރިވެފައިވާއިރު، އޭގެ ތެރެއިން މި ސްކީމަށް ހޮވިފައިވާ 16,388 ދަރިވަރުންނަށް ވަނީ ފައިސާ ދޫކޮށްފަ އެވެ. ނަމަވެސް ޑިގްރީ ފުރިހަމަ ކުރި ދަރިވަރުންގެ އަދަދު ސާފުވާން ނެތް ކަމަށް އޮޑިޓް ރިޕޯޓުން ދައްކާފައިވެ އެވެ.
މި ސްކީމުގެ ތަފާސްހިސާބުތަކަށް ބަލާއިރު، އެންމެ ގިނަ ދަރިވަރުން ބައިވެރިވެފައިވަނީ އަމިއްލަ ކޮލެޖުތަކާއި ޔުނިވަރސިޓީތަކުންނެވެ. އެގޮތުން އަމިއްލަ މަރުކަޒުތަކުން ކިޔަވާ ދަރިވަރުންނަށް 539.5 މިލިއަން ރުފިޔާ ޚަރަދުކޮށްފައިވާއިރު، ސަރުކާރުގެ ދެ ޔުނިވަރސިޓީ ކަމަށްވާ ދިވެހިރާއްޖޭގެ ގައުމީ ޔުނިވަރސިޓީއާއި އިސްލާމީ ޔުނިވަރސިޓީގައި ކިޔަވާ ދަރިވަރުންނަށް 296.1 މިލިއަން ރުފިޔާ ވަނީ ޚަރަދުކޮށްފަ އެވެ.
ސްކީމުގެ ބައިވެރިންގެ ތެރެއިން 65 އިންސައްތައަކީ އަންހެން ދަރިވަރުން ކަމަށްވާއިރު، ފިރިހެން ދަރިވަރުންގެ ނިސްބަތަކީ 35 އިންސައްތަ އެވެ. އަދި ބައިވެރިންގެ ތެރެއިން އެންމެ ގިނައީ 19 އަހަރާއި 21 އަހަރާ ދެމެދުގެ ޒުވާނުންނެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، މި ސްކީމުގެ ދަށުން އެންމެ ގިނަ ދަރިވަރުން ކިޔަވަމުންދަނީ ބިޒްނަސް މެނޭޖްމަންޓް، އެޑިއުކޭޝަން އަދި އައިޓީގެ ދާއިރާތަކުންނެވެ. ނަމަވެސް، ރާއްޖޭގެ ވަޒީފާގެ ބާޒާރަށް އެންމެ ބޮޑަށް ބޭނުންވެފައިވާ ދާއިރާތަކަށް ދަރިވަރުން އަމާޒުކުރުމުގައި ގޮންޖެހުންތަކެއް ހުރިކަން އޮޑިޓުން ވަނީ ފާހަގަކޮށްފަ އެވެ. ޚާއްސަކޮށް، ސިއްހީ ދާއިރާއާއި އިންޖިނިއަރިންގ ފަދަ ފަންނީ ދާއިރާތަކުން ކިޔަވާ ދަރިވަރުންގެ ނިސްބަތް އިތުރުކުރުމަށް ހަރުދަނާ ސިޔާސަތުތަކެއް ބޭނުންވާކަމަށް ރިޕޯޓުގައި ބަޔާންކޮށްފައިވެ އެވެ.
ސްކީމް ހިންގުމުގައި ހުރި އިދާރީ މައްސަލަތަކަށް އަލިއަޅުވާލަމުން އޮޑިޓް ރިޕޯޓުގައި ބުނެފައިވަނީ، ދަރިވަރުންނަށް ފައިސާ ދޫކުރުމުގައި ލަސްތަކެއް އުޅޭކަމަށެވެ. އެގޮތުން ބައެއް ދަރިވަރުންނަށް ފައިސާ ދޫކުރުމަށް 12 މަސްދުވަހަށްވުރެ ގިނަ ދުވަސް ހޭދަވެފައިވާކަން ވަނީ ފާހަގަކުރެވިފަ އެވެ.
ހަމައެއާއެކު، ސްކީމުގެ ދަށުން ކިޔަވާ ދަރިވަރުންގެ ނަތީޖާއާއި ކުރިއެރުން މޮނިޓަރ ކުރެވޭނެ ހަރުދަނާ ނިޒާމެއް ގާއިމުވެފައި ނެތުމަކީ ސްކީމުގެ ފެންވަރު ހިފެހެއްޓުމަށް އޮތް ހުރަހެއް ކަމަށް އޮޑިޓަރ ޖެނެރަލް ވަނީ ވިދާޅުވެފަ އެވެ.
މީގެ އިތުރުން، އޮޑިޓް ރިޕޯޓުގައި ހަޔަރ އެޑިއުކޭޝަން މިނިސްޓްރީއަށް މުހިންމު އިރުޝާދުތަކެއް ވަނީ ދީފަ އެވެ. އޭގެ ތެރޭގައި، ވަޒީފާގެ ބާޒާރަށް ބޭނުންވާ ދާއިރާތަކުން މީހުން ބިނާކުރުމަށް ސްކީމް އިތުރަށް ބައްޓަންކުރުމާއި ފައިސާ ދޫކުރުމުގެ ނިޒާމު ހަރުދަނާކޮށް އަވަސްކުރުން ހިމެނެ އެވެ.
އަދި ދަރިވަރުންގެ ކިޔެވުމުގެ ފެންވަރު ބެލޭނެ ޑިޖިޓަލް ނިޒާމެއް ގާއިމުކުރުމަށާއި ސްކީމުގެ ދަށުން ދަސްވެނިވާ ދަރިވަރުން ވަޒީފާގެ ބާޒާރަށް ނުކުންނަ މިންވަރު ދެނެގަތުމަށް ދިރާސާއެއް ކުރުމަށް ވެސް އޮޑިޓަރ ޖެނެރަލް ވަނީ ލަފާދެއްވާފަ އެވެ. މި އިސްލާހުތަކާއެކު ދައުލަތުގެ ބަޖެޓުން ކުރާ މި ބޮޑު ޚަރަދުގެ ފުރިހަމަ ފައިދާ ގައުމަށް ލިބޭނެކަން ރިޕޯޓުގައި ފާހަގަކޮށްފައިވެ އެވެ.