ސްލޮވީނިއާގެ އޭވިއޭޝަން ކެރިއަރ ސެންޓަރު (އޭސީސީ) އަކީ މޯލްޑިވްސް ސިވިލް އޭވިއޭޝަން އޮތޯރިޓީ (އެމްސީއޭއޭ) އިން ގަބޫލުކުރާ ތަމްރީނުދޭ އިދާރާއެއްގެ ގޮތުގައި ކަނޑައަޅައި، "އެޕްރޫވްޑް ޓްރޭނިންގ އޯގަނައިޒޭޝަން" (އޭޓީއޯ 017) ގެ ހުއްދަ އެ ސެންޓަރަށް ދީފި އެވެ. 20 ސެޕްޓެމްބަރު 2026 ގައި ދޫކުރި މި ހުއްދައަކީ ބައިނަލްއަގުވާމީ ފެންވަރުގައި އޭސީސީ ކުރިއެރުވުމަށް އެޅުނު މުހިންމު ފިޔަވަޅެއް ކަމަށް ރިޕޯޓުތައް ބުނެފައިވެ އެވެ.
މި ހުއްދައިގެ ދަށުން، އެމްސީއޭއޭ އިން ފާސްކޮށްފައިވާ ތަމްރީނު ކޯސްތަކުގެ ތެރޭގައި ހިމެނޭ ޕައިލެޓް ތަމްރީނު ޕްރޮގްރާމްތައް ހިންގުމުގެ ބާރު އޭސީސީއަށް ލިބިދެ އެވެ. މީގެ ތެރޭގައި ޕްރައިވެޓް ޕައިލެޓް ޓްރޭނިންގ، އިންޓަގްރޭޓެޑް އަދި މޮޑިއުލަރ ކޮމާޝަލް އެންޑް އެއަރލައިން ޓްރާންސްޕޯޓް ޕައިލެޓް ޓްރޭނިންގ، އިންސްޓްރޫމަންޓް ރޭޓިންގްސް، މަލްޓި-އިންޖީން ޕިސްޓަން ކްލާސް ރޭޓިންގްސް، ނައިޓް ރޭޓިންގްސް، މަލްޓި-ކްރޫ ކޯޕަރޭޝަން (އެމްސީސީ) ގެ އިތުރުން ފްލައިޓް، ކްލާސް ރޭޓިންގ އަދި އިންސްޓްރޫމަންޓް ރޭޓިންގ އިންސްޓްރަކްޓަރުންގެ ކޯސްތައް ހިމެނެ އެވެ.
އޭޓީއޯ ހުއްދައިގެ އިތުރުން، ސްލޮވީނިއާގެ މަރިބޯގައި ހުންނަ އޭސީސީގެ ފްލައިޓް ސިމިއުލޭޝަން ޓްރޭނިންގ ޑިވައިސްއަށް ވެސް އެމްސީއޭއޭ އިން ވަނީ ކޮލިފިކޭޝަން ސެޓްފިކެޓެއް ދޫކޮށްފައެވެ. "އެއަރޕްލޭން އެފްއެންޕީޓީ ލެވެލް 2" ގެ ފެންވަރުގައި ކަނޑައަޅާފައިވާ މި ސިމިއުލޭޓަރަކީ އާންމު މަލްޓި-އިންޖީން ޕިސްޓަން މަތިންދާބޯޓެއް ރަމްޒުކޮށްދޭ ވަސީލަތެކެވެ. އަދި މި ވަސީލަތަކީ އެމްސީއޭއޭ އިން ހުއްދަ ދީފައިވާ ތަމްރީނު ކޯސްތަކުގައި ބޭނުންކުރުމަށް ފާސްކޮށްފައިވާ ސިމިއުލޭޓަރެކެވެ.
މި ކާމިޔާބީއާ ގުޅިގެން މޯލްޑިވްސް ސިވިލް އޭވިއޭޝަން އޮތޯރިޓީގެ ފްލައިޓް އޮޕަރޭޝަންސް އިންސްޕެކްޓަރ އަބްދުﷲ ބާގިރު ވަނީ އޭސީސީގެ ޓީމަށް މަރުހަބާ ވިދާޅުވެފަ އެވެ. އޭނާ ފޮނުއްވި މެސެޖުގައި ވިދާޅުވީ، މި ހުއްދަ ހޯދުމުގެ މަރުހަލާގެ ކޮންމެ މަރުހަލާއެއްގައިވެސް އެ ސެންޓަރުގެ މުވައްޒަފުން ދެއްކި ފަންނީ ގާބިލުކަމާއި، ކަންކަމަށް ދެއްވި އަވަސް އިޖާބަ ފާހަގަކޮށް އުފާކުރައްވާ ކަމަށެވެ.
މި ހުއްދައާއެކު، އޭސީސީ ވެގެން ގޮސްފައިވަނީ ސްލޮވީނިއާގައި ގާއިމުވެފައިވާ، ދިވެހިރާއްޖޭގެ ސިވިލް އޭވިއޭޝަން އޮތޯރިޓީން ގަބޫލުކުރާ ތަމްރީނުދޭ މަރުކަޒަކަށެވެ. މީގެ ސަބަބުން ދިވެހިރާއްޖޭގެ ސިވިލް އޭވިއޭޝަން އުސޫލުތަކުގެ ދަށުން ޕައިލެޓްކަމުގެ ސަނަދު ހާސިލުކުރަން ބޭނުންވާ ފަރާތްތަކަށް ތަފާތު ތަމްރީނުތަކުގެ ފުރުސަތުތައް ފަހިވެގެންދާނެ އެވެ.
މި ހުއްދަ ހޯދުމުގެ މަރުހަލާގައި މޯލްޑިވްސް ސިވިލް އޭވިއޭޝަން އޮތޯރިޓީން ދިން އެއްބާރުލުމަށް އޭސީސީން ވަނީ ޝުކުރު އަދާކޮށްފަ އެވެ. އަދި މި ކާމިޔާބީ ހާސިލުކުރުމުގައި އެ ސެންޓަރުގެ އިންސްޓްރަކްޓަރުންނާއި، މެނޭޖްމަންޓާއި، އެހީތެރި މުވައްޒަފުން އަދާކުރި މުހިންމު ދައުރު އެ ސެންޓަރުން ފާހަގަކުރެ އެވެ.