ޗައިނާއިން އިސްނަގައިގެން ކުރިއަށްގެންދާ "ގްލޯބަލް ޑިވެލޮޕްމަންޓް އިނީޝިއޭޓިވް" (ޖީ.ޑީ.އައި) އަށް ދިވެހިރާއްޖެއިން ރަސްމީކޮށް ތާއީދުކޮށްފި އެވެ.
އދ. ގެ އާންމު މަޖިލީހުގެ 81 ވަނަ ސެޝަނުގައި ރާއްޖޭގެ ފަރާތުން ބައިވެރިވެވަޑައިގެން ވާހަކަފުޅު ދައްކަވަމުން، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވީ، ދެ ޤައުމުގެ ދެމެދުގައި އޮތް ގުޅުމަކީ އިޙްތިރާމާއި އެއްބާރުލުން ދިނުމުގެ ތެރެއިން ޤައުމީ މަސްލަޙަތާއި ދެމެހެއްޓެނިވި ތަރައްޤީ ކުރިއެރުވިދާނެ ގޮތުގެ ނަމޫނާއެއް ކަމަށެވެ. އަދި އދ. ގެ 2030 ވަނަ އަހަރުގެ ދެމެހެއްޓެނިވި ތަރައްޤީގެ އެޖެންޑާ އަވަސްކުރުމަށްޓަކައި ޗައިނާގެ ރައީސް ޝީ ޖިންޕިންގް ހުށަހަޅުއްވާފައިވާ ބައިނަލްއަޤްވާމީ އޮނިގަނޑު ކަމަށްވާ ޖީ.ޑީ.އައި އަށް ޗައިނާއިން ބަހައްޓާ އަހައްމިއްޔަތުކަން ރާއްޖެއިން ވަރަށް ބޮޑަށް ބަލައިގަންނަކަން އެމަނިކުފާނު ފާހަގަކުރެއްވި އެވެ.
ޗައިނާގެ އެހީތެރިކަމާއެކު ރާއްޖޭގައި ހިންގާފައިވާ އުމްރާނީ ތަރައްޤީގެ މުހިންމު މަޝްރޫޢުތަކުގެ ސަބަބުން، ރާއްޖޭގެ ރަށްތައް ގުޅާލުމަށާއި އިޖުތިމާޢީ އަދި އިޤްތިޞާދީ ތަރައްޤީއަށް ބޮޑެތި ކުރިއެރުންތަކެއް ލިބިފައިވާކަން ނައިބު ރައީސް ފާހަގަކުރެއްވި އެވެ. މީގެއިތުރުން، ދަރަނީގެ ބުރައާއި މޫސުމީ ބަދަލުތައް ފަދަ ކުރިމަތިވަމުންދާ ގޮންޖެހުންތަކުން އަރައިގަތުމަށްޓަކައި، ތަރައްޤީވަމުން އަންނަ ޤައުމުތަކުގެ މެދުގައި އޮންނަ އެއްބައިވަންތަކަން މިހާރަށްވުރެ ވަރުގަދަކުރުމަށް އެމަނިކުފާނު ގޮވާލެއްވި އެވެ.
ރާއްޖެއިން ޖީ.ޑީ.އައި އަށް ތާއީދުކޮށްފައި މިވަނީ، މިއަހަރުގެ ކުރީކޮޅު ދެ ޤައުމުގެ ދެމެދުގައި އޮތް ގުޅުން "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އަކަށް މަތީ ދަރަޖައަކަށް އުފުލާފައިވާ ދަނޑިވަޅެއްގަ އެވެ. މިއީ މާލެއާއި ބެއިޖިންގްއާ ދެމެދު އޮތް އިޤްތިޞާދީ އަދި ޚާރިޖީ ގުޅުން އިތުރަށް ބަދަހިވަމުންދާކަން ހާމަކޮށްދޭ ކަމެކެވެ.