ރާއްޖޭގެ މޫސުން ގޯސްވެ، ކަނޑުތައް ގަދަވާނެތީ ކަނޑުމަގުން ދަތުރުފަތުރުކުރާ ފަރާތްތަކުން ސަލާމަތީ ގޮތުން އަޅަންޖެހޭ ފިޔަވަޅުތަކަށް ހާއްސަ ސަމާލުކަމެއް ދިނުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އިލްތިމާސްކޮށްފި އެވެ.
ރާއްޖޭގެ އެކި ސަރަހައްދުތަކަށް ވައިގަދަވެ، ބޯކޮށް ވާރޭވެހުމާ އެކު ކަނޑުތައް އާދަޔާހިލާފަށް ގަދަވާނެކަމަށް މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފައިވާތީ، ދަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް އެމްއެންޑީއެފުން ވަނީ މުހިންމު އިރުޝާދުތަކެއް ނެރެފަ އެވެ.
އެގޮތުން، ކޮންމެހެން ކުރަންޖެހޭ ދަތުރުތައް ފެށުމުގެ ކުރިން މޫސުމާ ބެހޭ އެންމެ ފަހުގެ މައުލޫމާތު ހޯދުމަށާއި ދަތުރާ ގުޅޭ މައުލޫމާތު ކަމާބެހޭ ފަރާތްތަކާ ހިއްސާކުރުމަށް ދިފާއީ ބާރުން ވަނީ އެދިފަ އެވެ. ހާއްސަކޮށް، މޫސުމީ ގޮތުން ރީނދޫ ނުވަތަ އޮރެންޖު އެލާޓް ނެރެފައިވާ ވަގުތުތަކުގައި އެއްވެސް އުޅަނދެއް ކަނޑުމައްޗަށް ނުނިކުތުމަށް ވަނީ އަންގާފަ އެވެ. މީގެ އިތުރުން، އުޅަނދުފަހަރުގައި ދަތުރުކުރާ ހުރިހާ ފަސިންޖަރުން ލައިފްޖެކެޓު އެޅުމަށާއި، މުވާސަލާތީ އާލާތްތަކާއި ދިޔަހިއްކާ ޕަމްޕު ފަދަ ސަލާމަތީ ވަސީލަތްތައް ރަނގަޅަށް މަސައްކަތްކުރޭތޯ ދަތުރު ފެށުމުގެ ކުރިން ކަށަވަރުކުރުމަށް ވެސް ވަނީ އިލްތިމާސްކޮށްފަ އެވެ.
މުދާ އުފުލާ އުޅަނދުފަހަރުތަކުން ކަނޑައެޅިފައިވާ މިންވަރަށް ވުރެ އިތުރަށް ބަރުނުކުރުމަށާއި، ގަދަވަޔާއި ރާޅުގެ ސަބަބުން މުދާތައް ކަނޑަށް ނުވެއްޓޭނެހެން ރަނގަޅަށް އައްސައި ހަރުކުރުމަށް ވެސް އެމްއެންޑީއެފުން ވަނީ ހަނދާންކޮށްދީފަ އެވެ.
ހަމައެއާއެކު، ފަތުރުވެރިކަމުގެ ދާއިރާގައި ހިމެނޭ މޫދުކުޅިވަރުތަކާއި ޑައިވިންގ ފަދަ ހަރަކާތްތައް ރާވައި ހިންގާ ފަރާތްތަކުން ވެސް، މޫސުމަށް އަންނަ ބަދަލުތަކަށް ފުރިހަމައަށް ސަމާލުވެ، ރައްކާތެރިކަން ކަށަވަރުނުކޮށް އެފަދަ އެއްވެސް ހަރަކާތެއް ކުރިއަށް ނުގެންދިއުމަށް އެމްއެންޑީއެފުން ވަނީ ނަސޭހަތްތެރިވެފަ އެވެ.