މި މަހުގެ ކުރީކޮޅު ދިވެހިރާއްޖޭގައި ޑައިވް ކުރަން އުޅުމުގެ ތެރޭގައި، ކަނޑުއަޑީގެ ހޮހަޅައެއްގެ ތެރޭގައި ތާށިވެ މަރުވި އިޓަލީގެ ހަތަރު ފަތުރުވެރިންގެ ހަށިގަނޑު ހޮނިހިރު ދުވަހުގެ ހެނދުނުގެ ވަގުތެއްގައި އަނބުރާ ގައުމަށް ފޮނުވާލާފައިވާ ކަމަށް ދިވެހި ސަރުކާރުގެ ތަރުޖަމާނު ވިދާޅުވެއްޖެއެވެ.
ވ އަތޮޅުގެ ކަނޑުއަޑިން ގާތްގަނޑަކަށް 160 ފޫޓު އަޑީގައި އޮންނަ ހޮހަޅައެއް ބަލައިލުމަށް ފޭބި އިޓަލީގެ ފަސް ޑައިވަރުން ގެއްލިފައިވަނީ މެއި މަހުގެ 14 ވަނަ ދުވަހުއެވެ. އެ ހާދިސާ ހިނގި ވަގުތު، އެ މީހުންގެ އިންސްޓްރަކްޓަރުގެ ހަށިގަނޑު ހޮހަޅައިގެ ބޭރުން ފެނިގެން ނަގާފައިވާއިރު، އޭނާގެ ހަށިގަނޑު މީގެ ކުރިން ވަނީ ގައުމަށް ފޮނުވާލާފައެވެ.
ނުރައްކާތެރި މި އޮޕަރޭޝަންގައި ހަށިގަނޑުތައް ނެގުމަށް ކުރި މަސައްކަތަށް ބޮޑެތި ހުރަސްތަކެއް ކުރިމަތިވިއެވެ. އަދި މި މަސައްކަތުގައި އުޅުނު ދިވެހި ސިފައިންގެ ޑައިވަރެއް ކަމަށްވާ މުހައްމަދު މަހުދީ މަރުވުމާ ގުޅިގެން، ހަށިގަނޑުތައް ހޯދުމުގެ މަސައްކަތް މެދުކަނޑާލަން ޖެހުނެވެ. ނަމަވެސް، ފަހުން ފިންލޭންޑުގެ ފުން ކަނޑުތަކަށާއި ހޮހަޅަތަކަށް ޑައިވްކުރުމުގެ ތަޖުރިބާކާރު ތިން މީހަކު މި މިޝަންގައި ބައިވެރިވެ، މިދިޔަ ހަފުތާގައި ވަނީ ހަތަރު މީހުންގެ ހަށިގަނޑު ހޯދާފައެވެ. އެ ހަށިގަނޑުތައް ފެނިފައިވަނީ ހޮހަޅައިގެ އެންމެ އެތެރޭގައި އޮންނަ ބައިން، ގާތްގަނޑަކަށް 200 ފޫޓު ނުވަތަ 60 މީޓަރު އަޑިންނެވެ. ރާއްޖޭގައި މުނިފޫހިފިލުވުމަށް ޑައިވް ކުރެވޭ އެންމެ ފުން މިނަކީ 98 ފޫޓު ނުވަތަ 30 މީޓަރެވެ.
ރައީސުލްޖުމްހޫރިއްޔާގެ ތަރުޖަމާނު މުހައްމަދު ހުސައިން ޝަރީފް ހޮނިހިރު ދުވަހު ވިދާޅުވީ، މި ހާދިސާއާ ގުޅިގެން ދެ ތަހުގީގެއް ފަށާފައިވާ ކަމަށެވެ. އެއީ އިޓަލީގެ ފަސް ޑައިވަރުން މަރުވި ހާދިސާގެ ތަހުގީގާއި، ޑިއުޓީގައި އުޅެނިކޮށް ސިފައިންގެ ޑައިވަރު މަހުދީ މަރުވި ގޮތުގެ ތަހުގީގެވެ. މީގެ އިތުރުން، ގައުމަށް ފޮނުވާލި ހަށިގަނޑުތަކުގެ އޮޓޯޕްސީއެއް ހަދައިފިނަމަ، އެއިން ފެންނަ ނަތީޖާތައް ހިއްސާކުރުމަށް އިޓަލީ ސަރުކާރުން އެއްބަސްވެފައިވާ ކަމަށްވެސް ޝަރީފް ވިދާޅުވިއެވެ.
މި ހާދިސާގައި މަރުވެފައިވަނީ ޔުނިވަރސިޓީ އޮފް ޖެނޯއާގެ އެސޯސިއޭޓް ޕްރޮފެސަރެއް ކަމަށްވާ މޮނިކާ މޮންޓެފަލްކޯން އާއި، އޭނާގެ ދަރިފުޅު ޖިއޯޖިއާ ސޮމަކާލް އާއި، މެރިން ބަޔޮލޮޖިސްޓް ފެޑެރިކޯ ގުއަލްޓިއޭރީ އާއި، ރިސާޗަރު މުރިއަލް އޮޑެނީނޯގެ އިތުރުން ޑައިވިން އިންސްޓްރަކްޓަރު ޖިއަންލޫކާ ބެނެޑެޓީއެވެ.
އިޓަލީގެ ނޫހެއް ކަމަށްވާ "ލާ ރިޕަބްލިކާ" އިން ރިޕޯޓްކޮށްފައިވާ ގޮތުގައި، މި ގްރޫޕް ފެނިފައިވަނީ ހޮހަޅައިގެ ތެރޭގައި ކުރިއަށް ނުދެވޭ ގޮތަށް ބަންދުވެފައި އޮތް ހަނި ސަރަހައްދަކުންނެވެ.
ހަށިގަނޑުތައް ނެގުމުގެ މަސައްކަތް ކުރި ފިންލޭންޑުގެ ޖަމިއްޔާއެއް ކަމަށްވާ "ޑޭން ޔޫރަޕް" ގެ ސީއީއޯ އޭއެފްޕީ ނޫސް އެޖެންސީއަށް މައުލޫމާތު ދެމުން ބުނީ، އެ މީހުން މަރުވީ ހޮހަޅައިގެ ތެރޭގައި އުޅެނިކޮށް މަގު އޮޅިގެން ކަމަށް ބެލެވޭ ކަމަށެވެ.
"އެ މީހުންގެ އަތުގައި ހުރި އޮކްސިޖަންގެ މިންވަރު މަދުކަމުންނާއި، އެހާ ފުނުގައި މަޑުކުރެވޭނީ މަދު މިނެޓުކޮޅަކަށް ކަމަށްވާތީ، ހޮހަޅައިން ބޭރަށް ނުކުމެވޭނެ މަގެއް ހޯދުމަށް ގިނަ މަސައްކަތްތަކެއް ކުރާނެ ވަގުތެއް އެ މީހުންނަށް ނުލިބޭނެ،" މެރޯނީ ބުނެފައިވެއެވެ.