ވ. އަތޮޅުގައި ސްކޫބާ ޑައިވިންއަށް ގޮސް އުޅުނު އިޓަލީގެ ފަސް ރައްޔިތަކު މަރުވި ހިތާމަވެރި ހާދިސާއާ ގުޅިގެން، އިޓަލީގެ ޕްރޮސެކިއުޓަރުން ހުކުރު ދުވަހު އަމިއްލަ ތަހުގީގެއް ފަށައިފިއެވެ.
އިޓަލީގެ އޭއެންއެސްއޭ (ANSA) ނިއުސް އެޖެންސީން ރިޕޯޓްކޮށްފައިވާ ގޮތުގައި، ރޯމްގެ ޕްރޮސެކިއުޓަރުން މިހާރު އިންތިޒާރު ކުރަމުންދަނީ ރާއްޖޭގެ ކަންކަން ބަލަހައްޓާ ސްްރީލަންކާގައި ހުންނަ އިޓަލީގެ ކޮންސިއުލޭޓުން ފޮނުވާ ރިޕޯޓަށެވެ. މި މައްސަލަ ރާއްޖޭގެ ތަންފީޒީ އިދާރާތަކާ ހަވާލުކުރުމާ މެދު ގޮތެއް ނިންމާނީ އެ ރިޕޯޓަށް ފަހުގައެވެ.
ވ. އަލިމަތާ ކައިރީގައި ބުރާސްފަތި ދުވަހު ހިނގި މި ހާދިސާގެ ކުރިން، މޫސުމީ އިންޒާރުތަކާއި ޑައިވިންއާ ގުޅޭ ގަވާއިދުތަކަށް އިހުމާލުވެފައިވޭތޯ ރާއްޖޭގެ ކަމާބެހޭ އިދާރާތަކުން ދަނީ ތަހުގީގު ކުރަމުންނެވެ. ގެއްލުނު ފަސް މީހުންގެ ތެރެއިން ހަތަރު މީހަކު އަދިވެސް ނުފެންނައިރު، ފީނާ މީހުން ވަނީ ކަނޑުގެ އަޑިން 200 ފޫޓު ފުނުގައިވާ ހޮހަޅައެއްގެ ދެ ސަރަހައްދެއް ބަލާފައެވެ. މިއީ ރާއްޖޭގައި މުނިފޫހިފިލުވުމަށް ފީނުމަށް ހުއްދަދޭ 100 ފޫޓުގެ ފުންމިނަށް ވުރެ ދެގުނަ އިތުރު ފުންމިނެކެވެ. ނަމަވެސް، މޫސުން ގޯސްވުމުގެ ސަބަބުން ހަށިގަނޑުތައް ހޯދުމުގެ މަސައްކަތް މިހާރު ވަނީ މެދުކަނޑާލާފައެވެ.
ސްރީލަންކާގައި ހުންނަވާ އިޓަލީގެ ސަފީރު ޑަމިއާނޯ ފްރެންކޮވިގް ވިދާޅުވީ، މިހާތަނަށް ދިވެހި ޑައިވަރުންނަށް ވަދެވުނީ ހޮހަޅައިގެ ފުރަތަމަ ދެ ބަޔަށް ކަމަށާއި، ޑިކޮމްޕްރެޝަން ވަގުތު ހަމަކުރުމަށްޓަކައި އެ މީހުންނަށް މައްޗަށް އަރަން ޖެހުނު ކަމަށެވެ. އަދި ގެއްލިފައިވާ އިޓަލީގެ އަނެއް ޑައިވަރުންގެ ހަށިގަނޑުތައް އަދި ފެނިފައިނުވާ ކަމަށް އޭނާ ވިދާޅުވިއެވެ.
"އެ މީހުން އިތުރު ޑައިވަކަށް ތައްޔާރުވަމުންދަނީ. މިވަގުތު ރާއްޖޭގެ މޫސުން ވަރަށް ގޯސް، ބާރަށް ވައިޖެހި ބޯކޮށް ވާރޭވެހެމުންދަނީ. މީގެ އިތުރުން އޮއިގަދަވުމުގެ ސަބަބުން މި މަސައްކަތްތަކަށް ވަނީ ވަރަށް ބޮޑަށް ހުރަސް އެޅިފައި،" ސަފީރު ވިދާޅުވިއެވެ.
މީހުން ހޯދުމުގެ މަސައްކަތުގައި ޑައިވަރުންނާއި، ވައިގެ މަގުން އެހީތެރިކަން ފޯރުކޮށްދޭ ޔުނިޓްތަކުގެ އިތުރުން ކަނޑު އުޅަނދުފަހަރު ދަނީ ބޭނުންކުރަމުންނެވެ.
މިހާތަނަށް ފެނިފައިވަނީ އެންމެ ހަށިގަނޑެކެވެ. އެއީ މޮނިކާ މޮންޓެފަލްކޯންގެ ހަށިގަނޑު ކަމަށް ރާއްޖޭގެ މީޑިއާތަކުން ރިޕޯޓްކޮށްފައިވީ ނަމަވެސް، އޭއެންއެސްއޭ އިން ބުނާ ގޮތުގައި އެއީ ޑައިވިން އިންސްޓްރަކްޓަރު އަދި އުޅަނދުގެ ކެޕްޓަން ޖިއަންލޫކާ ބެނެޑެޓީގެ ހަށިގަނޑެވެ.
މި ދަތުރުގައި ބައިވެރިވި މިއުރިއަލް އޮޑެނީނޯ އާއި، ފެޑެރިކޯ ގުއަލްޓިއޭރީ އަދި މޮނިކާގެ ދަރިފުޅު ޖިއޯޖިއާ ސޮމަކަލް ވެސް ފީނަން ދިޔަ ގޮތަށް މައްޗަށް އަރާފައެއް ނުވެއެވެ.
ކަމާބެހޭ އިދާރާތަކުން ހާމަކުރި ގޮތުގައި، އެއް ގަޑިއިރަށް ރޭވި މި ޑައިވް ފެށުމުގެ ކުރިން "ޑިއުކް އޮފް ޔޯކް" ނަމަކަށް ކިޔާ ސަފާރީގައި އިޓަލީގެ އިތުރު 20 މީހުން ތިއްބެވެ.
"އެ މީހުން ފީނަން ފޭބީ ހެނދުނު 11:00 ޖެހިއިރު. މެންދުރު 12:00 ހާއިރު ވެސް އެ މީހުން މައްޗަށް ނޭރުމުން، އަހަރެމެން ދޯނީގައި އެ މީހުން ހޯދަން ފެށިން،" އޭއެންއެސްއޭ އަށް މައުލޫމާތު ދިން މީހަކު ބުންޏެވެ. އެހެން މީހުން ބުނި ގޮތުގައި މޫސުން ގޯސްވުމުގެ ކުރިން ކަނޑު އޮތީ ވަރަށް އަމާންކޮށް، އަޑި ސާފުކޮށެވެ.
ނަމަވެސް، ކަނޑުގެ އަޑީގައި ހިނގީ ކޮން ކަމެއްކަން އަދިވެސް އޮތީ ނޭނގުމުގެ ތެރޭގައެވެ.
މުޅި ދުނިޔޭގެ މީޑިއާ ސަމާލުކަން މި ހާދިސާ އަށް ހުއްޓިފައިވާއިރު، ސިއްހީ މާހިރުން މިހާރު ދަނީ މި މަރުތަކާ ގުޅޭގޮތުން ތަފާތު ތިއަރީތައް ހިއްސާކުރަމުންނެވެ.
ފުއްޕާމޭގެ ބަލިތަކާ ބެހޭ ޑޮކްޓަރެއް ކަމަށްވާ ކްލައުޑިއޯ މިކެލެޓޯ އިޓަލީގެ މީޑިއާއަކަށް ބުނި ގޮތުގައި، ޑައިވަރުން މަރުވީ "އޮކްސިޖަން ޓޮކްސިސިޓީ" ނުވަތަ އޮކްސިޖަން ވިހަވުމުގެ ސަބަބުން ކަމަށް ވެދާނެއެވެ.
"އޮކްސިޖަން މާ މަތީ މިންވަރަކަށް އެތެރެހަށީގައި ހުރުމުން، އެ ގޭސް ހަށިގަނޑަށް ވިހައަކަށް ބަދަލުވޭ. ފީނަމުންދާއިރު ބޯ އެނބުރުމާއި، ތަދުވުމާއި، ހެޔަށް ގޮތްވުމުގެ އިތުރުން ދާނެ ވަކި ދިމާއެއް ނޭނގި މަގު އޮޅޭ ގޮތްވޭ. މީގެ ސަބަބުން މައްޗަށް އެރުން އުނދަގޫވޭ،" އޭނާ ކިޔައިދިނެވެ.
ނަމަވެސް، އިޓަލީގެ ސޮސައިޓީ އޮފް އަންޑަވޯޓާ އެންޑް ހައިޕަބަރިކް މެޑިސިންގެ ރައީސް އަލްފޮންސޯ ބޮލޮގްނީނީ ލަފާކުރައްވާ ގޮތުގައި، އަޑީގައި އުޅެނިކޮށް ޑައިވަރުން ބިރުގަނެ ހާސްވީއެވެ. މީގެ ސަބަބުން ފެނުން ފުސްވެ، ފުރާނައަށް ނުރައްކާވާ ފަދަ ގޯސްތައް ހެދުމުގެ ފުރުސަތު ބޮޑުވެއެވެ.
މީގެ ހަ މަސް ކުރިން "ޑިއުކް އޮފް ޔޯކް" ގައި ދަތުރުކުރި ފްރީޑައިވަރު އުމްބާޓޯ ޕެލިޒާރީ ބުނީ، ހޮހަޅައިގެ ތެރޭގައި ޑައިވަރުންނަށް "މަގު އޮޅުމަކީ" އެކަށީގެންވާ ކަމެއް ކަމަށެވެ.
"ފުރަތަމަ ބަޔަށް ވަދެވޭނެ، ދެން ދެވަނަ ބަޔަށް، އެއަށްފަހު ތިންވަނަ ބަޔަށް. އެނބުރިލާއިރު ފެންގަނޑު އޮންނަނީ ކުލަބަދަލުވެ ކިލަނބުވެފައި. އައި މަގުން ދެވޭ ކަމަށް ހީވިޔަސް، އެއީ ނުބައި މަގަކަށް ވެދާނެ،" އޭނާ 'ލާ ސްޓަމްޕާ' ނޫހަށް ކިޔައިދިނެވެ.
"އެ ހިސާބުން ކަންކަން ކޮންޓްރޯލުން ނެއްޓޭނީ. އަދި އެތަން ހުންނަނީ 150 އާއި 200 ފޫޓާ ދެމެދުގެ ފުންމިނެއްގައި. އެއީ ޑައިވިންގެ ހަރުކަށި އުސޫލުތަކާއި ވަގުތުތަކަށް ބޯލަނބަންޖެހޭ ފުންމިނެއް. އެ ހާލަތުގައި ހޮހަޅަ ބަދަލުވަނީ ދަން މަޅިއަކަށް."