މަޖިލިސް އިންތިޚާބު ލިބުމުން ވެސް ޑޮލަރުގެ އަގު ތިރި ނުވަނީތޯ އާއްމު މީހަކު ކުރި ސުވާލަށް ޖަވާބު ނުދެއްވާ އިކޮނޮމިކް މިނިސްޓަރ މުހައްމަދު ސައީދު ފިއްލަވައިފި އެވެ.
ިކކުރިއަށް އޮތް ކައުންސިލް އަދި ޑަބްލިއުޑީސީގެ އިންތިޚާބާއި ފެންނަ ނުފެންނަ އިންތިޚާބުގެ ކެމްޕެއިނަށް ނ. ވެލިދޫ އަށް ވަޒީރު ސައީދު ވަނީ ޕީއެންސީގެ ޓީމަކާއި އެކު ވަޑައިގަންނަވާފަ އެވެ. މި ދަތުރުގެ ތެރެއިން އާއްމު މީހަކު ވަނީ ވަޒީރު ވިދާޅުވި ގޮތަށް ސަރުކާރަށް މަޖިލިސް އިންތިޚާބު ދިނުމުން ވެސް ޑޮލަރުގެ އަގު ތިރި ނުވަނީ ކީއްވެތޯ ސުވާލުކުރައްވާފަ އެވެ. އެ އާއްމު މީހާ ވަޒީރު އާއި ސަލާމް ކުރުމަށް ފަހު އެ ސުވާލުކުރުމުން ވަޒީރު ވަނީ ސުވާލަށް ޖަވާބު ނުދެއްވައި ބާރަށް އެތަނުން ދުރަށް ވަޑައިގަންނަވާފަ އެވެ. އެ އާއްމު މީހާ ވަނީ ސުވާލަށް ޖަވާބު ދިނުމަށް ތަކުރާރުކޮށް ވަޒީރުގެ ކިބައިން އެދިވަޑައިގަންނަވާފަ އެވެ. މީގެ އިތުރުން ވަޒީރު އާއްމު މީހެއްގެ ސުވާލަށް ޖަވާބު ނުދީ ފިއްލަވަން ޖެހިވަޑައިގަތުމަކީ ލަދުވެތިކަމެއް ކަމަށް ބުނެ އާއްމުން ދަނީ މީސްމީޑިއާގައި އެކަމަށް ފާޑު ކިޔަމުންނެވެ.
2024 ވަނަ އަހަރު ބޭއްވި މަޖިލިސް އިންތިޚާބުގެ ކެމްޕެއިން ގައި ރައްޔިތުންނާ ބައްދަލު ކުރައްވައި މިނިސްޓަރު ސައީދު ވަނީ މަޖިލީހުގެ މެޖޯރިޓީ ލިބިގެން ވިޔަސް ދިވެހި ރުފިޔާ ޑޮލަރުގެ ކުރިމަތީގައި 30 ނުވަތަ 40 ޕަސެންޓް ވަރުގަދަވެގެންދާނެ ކަމަށް ވިދާޅުވެފަ އެވެ. އޭގެ ނަތީޖާ އަކަށް ވެގެންދާނީ މުސްތަގުބަލުގައި 15.42 އަށް ވުރެ ވެސް ޑޮލަރު ރޭޓް ދަށަށް ދިއުން ކަމަށް ވެސް މިނިސްޓަރު ވިދާޅުވި އެވެ.
ނިމިދިޔަ ހަފްތާގެ އަންގާރަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުމުގައި މަޖިލީހުގެ 75 ގޮނޑި ސަރުކާރަށް ދިންތާ ވެސް އެތައް ދުވަހެއް ވެފައިވާއިރު މިހާތަނަށް ވެސް މިކަމަށް ހައްލެއް ލިބިފައި ނުވާއިރު، ޑޮލަރުގެ އަގު ކުރިއަށް ވުރެ ބޮޑުވަމުންދާތީ އެކަމާ ގުޅިގެން ރާއްޖެޓީވީ އިން ސުވާލު ކުރުމުން މިނިސްޓަރު އެ ސުވާލަށް ޖަވާބުދެއްވާފައެއް ނުވެ އެވެ.
އޭގެ ބަދަލުގައި މިނިސްޓަރު މުޅިން ވެސް ދެއްކެވީ މި ސަރުކާރަށް އޭރުވެސް މަޖިލީހުގެ ސުޕަ މެޖޯރިޓީ ބޭނުންވީ ކީއްވެގެން ކަމުގެ ވާހަކަ އެވެ. ދެން މިނިސްޓަރު ދެއްކެވީ ދެ އިންތިޚާބު އެއްކޮށްލުމަކީ މުހިއްމު ކަމެއް ކަމަށާއި، ކައުންސިލް އިންތިޚާބުގައި ވެސް ސަރުކާރު ހިންގާ ޕީއެންސީ ގެ ކެންޑިޑޭޓުންނަށް ވޯޓު ދޭން ޖެހޭ ވާހަކަ އެވެ. ކުރި ސުވާލަށް އެއްވެސް ވަރަކަށް ޖަވާބެއް ނުދެއްވަ އެވެ.