މާލެއިން މީހަކު ގެއްލިގެން ފުލުހުންނަށް ރިޕޯޓްކުރުމާ ގުޅިގެން އެމީހާ ހޯދުމުގެ މަސައްކަތް ދިވެހި ފުލުހުންގެ ޚިދުމަތުން ފަށައިފި އެވެ.
ފުލުހުން ބުނީ ގެއްލިގެން ހޯދަމުންދަނީ ޅ. ނައިފަރު / ކަށިމާގެ، ފާޠިމަތު ނޫރާ (32އ) އެވެ.
2026 މާރިޗު 4 ވަނަ ދުވަހުގެ 20:00 އެހައިކަންހާއިރު ފާޠިމަތު ނޫރާ ގެއިންބޭރަށް ދިޔަފަހުން ޚަބަރެއްނުވެ ގެއްލިފައިވާކަމަށް މާރިޗު 4 ވަނަ ދުވަހުގެ ރޭ 12:19 އެހައިކަންހާއިރު އާއިލާއިން ފުލުހުންނަށް ވަނީ ރިޕޯޓް ކޮށްފަ އެވެ. މި މައްސަލަ ރިޕޯޓްކުރުމާ ގުޅިގެން، ފުލުހުންގެ ކަމާގުޅުންހުރި ހުރިހާ ބަހާތަކަށް އެ މައުލޫމާތު ހިއްސާކޮށް އޭނާ ހޯދުމުގެ މަސައްކަތް ކުރަމުންދާއިރު، މިހާތަނަށް ކުރެވުނު މަސައްކަތުން އޭނާ ފެނިފައެއް ނުވެ އެވެ.
ފާޠިމަތު ނޫރާއާ ބެހޭ އެއްވެސް މައުލޫމާތެއް ލިބިފައިވާނަމަ ގަލޮޅު ޕޮލިސް ސްޓޭޝަން ނަންބަރު 9631696 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި ހިއްސާކުރެއްވުމަށް އެދިފައިވެ އެވެ.
ގެއްލިގެން ހޯދަމުންދާ މީހާގެ އާއިލާއިން ބުނީ އޭނާ ގެއްލިފައިަވނީ މައްޗަންގޮޅި ރެޑްބީ ފިހާރަ ހުންނަ ހިސާބުން ކަމަށެވެ. އޭނާގެ އާއިލާއިން ބުނީ ނޫރާ ރުޅިއައިސްގެން ”މިދަނީ މަރުވާން“ ކަމަށް ބުނެ ގެއިން ނިކުމެގެން ގޮސްފައިވާ ކަމަށެވެ. އަދި އޭނާއަކީ ފިޓު ޖެހޭ، ސިކުނޑީގަ މައްސަލަ ހުންނަ ފަރާތެއް ކަމަށެވެ. އަދި އެންމެ ފަހުން ފިޓު ޖެހުނު ދުވަހު ވެއްޓި ސިކުނޑިއަށް ލިބުނު އަނިޔާގެ ފަހުން މާ ބޮޑަށް ރުޅި ގަދަވާ ކަމަށާއި، ގޭތެރޭގައި ހިނގި ކަމަކާއި ގުޅިގެން ގެއިން ނުކުމެގެން ދިޔައީ ކަމަށެވެ. އާއިލާއިން ބުނީ ގެއިން ނުކުމެގެން ދިޔަ އިރު ހުރީ ގަދަ ޗޮކުލެޓު ކުލައިގެ ޓޮޕެއް ލައިގެން ކަމަށެވެ.