ތުރުކީގައި ރާއްޖޭގެ 3 ރައްޔިތަކު ތާށިވެފައި
ތިބި ކަމުގެ މައުލޫމާތު ލިބިގެން މިހާތަނަށް ކުރެވުނު މަސައްކަތުން އޭގެ ތެރެއިން
ކުޑަ ކުއްޖަކާއި އެކުއްޖާގެ މަންމަ ރާއްޖެ ގެނެވިފައިވާކަމަށް ދާޚިލީ ވަޒީރު އަލީ
އިޙްސާން ވިދާޅުވެއްޖެއެވެ.
ބުރާސްފަތި ދުވަހު އޮތް ނޫސްވެރިންގެ
ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ، ހަނގުރާމަވެރި އެކި
ސަރަޙައްދުތަކަށް ގޮސް އަނބުރާ ނާދެވިފައި ތިބި މީހުންގެ މައްސަލައަށް ޙައްލު
ހޯދުމަށް މަސައްކަތްތަކެއް ކުރެވެމުންދާ ކަމަށާއި، އެ މަސައްކަތުގެ ދަށުން މީގެ
ކުރިން 23 މީހަކު ވަކިން ރީއިންޓަގްރޭޓް ކޮށްފައިވާ ކަމަށެވެ.
އަދި އޭގެ ފަހުންވެސް ސީރިޔާގައި ތާށިވެފައި ތިބި
60 މީހުން ގެނައުމަށް މަސައްކަތްތަކެއް ކުރެވިފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ހަނގުރާމަ ހިނގާ އެކި
ސަރަހައްދުތަކުގައި ތިބި ދިވެހިންގެ މައުލޫމާތު ލިބެމުންދާ ކަމަށާއި،
އާއިލާތަކުންނާއި، އިންޓެލިޖެންސް އަދި ބޭރުގެ އެކި އިދާރާތަކާއި ގުޅިގެން
މައުލޫމާތު ހޯދަމުންދާ ކަމަށެވެ.
މީގެ އިތުރުން، ތުރުކީގައި ރާއްޖޭގައި 3 ރައްޔިތަކު
ތާށިވެފައި ތިބި ކަމުގެ މައުލޫމާތު ލިބިގެން އެމީހުން ގެނައުމަށް މަސައްކަތްތަކެއް
ކުރެވިފައިވާ ކަމަށް މިނިސްޓަރ ވިދާޅުވިއެވެ. އަދި ވިދާޅުވީ، އެމީހުން ތުރުކީގެ
އިދާރާތަކުން ބަންދުކޮށްފައިވާ ކަމުގެ މައުލޫމާތު ތުރުކީ އެމްބަސީ މެދުވެރިކޮށް
ލިބިފައިވާ ކަމަށެވެ.
މިނިސްޓަރ ވިދާޅުވީ، ގުޅިފައިވާ މުއައްސަސާތައް
ގުޅިގެން ކުރެވުނު މަސައްކަތުން އޭގެ ތެރެއިން 14 އަހަރުގެ އަންހެން ކުއްޖަކާއި
އެކުއްޖާގެ މަންމަ ރާއްޖެ ގެނެވިފައިވާ ކަމަށެވެ. އަދި އެމީހުންނަށް ކުރިއަށް
ގެންދަންޖެހޭ ރީއިންޓަގްރޭޝަން ޕްރޮގްރާމްތައް ކުރިއަށްދާކަން މިނިސްޓަރ ފާހަގަ
ކުރެއްވިއެވެ.
މީގެ އިތުރުން، ސީރިޔާއަށް ހަނގުރާމައަށް ދިޔަ
ދިވެހިންގެ ތެރެއިން މިހާރު ސީރިޔާގައި ތިބި ދިވެހިން ބޭރުގެ އެހެން ދަޢުލަތަކާއި
ގުޅިގެން ރާއްޖެ ގެނެސް ރިހިބިލިޓޭޓް ކުރުމުގެ މަސައްކަތް ކުރިޔަށްދާކަމަށްވެސް
މިނިސްޓަރ ވިދާޅުވިއެވެ.