މީގެ ތިން އަހަރު ކުރިން އިކޮނޮމިކް ކައުންސިލުން ދީފައިވާ ލަފައަކާ ގުޅިގެން، ތިމާވެށްޓާ ބެހޭ ކުރީގެ މިނިސްޓަރު އާމިނަތު ޝައުނާ އެންޓި ކޮރަޕްޝަން ކޮމިޝަން އަށް ހާޒިރުކޮށް ސުވާލުކޮށްފި އެވެ.
ޝައުނާ އޭސީސީ އަށް ހާޒިރުކޮށްފައިވަނީ އަންގާރަ ދުވަހުގެ ހެނދުނުގެ ވަގުތެއްގަ އެވެ. މިކަމާ ގުޅިގެން ރާއްޖެ އެމްވީ އިން ކުރި ސުވާލަކަށް ޖަވާބު ދެއްވަމުން ޝައުނާ ވިދާޅުވީ އޭނާ އޭސީސީ އަށް ހާޒިރުކުރީ އިކޮނޮމިކް ކައުންސިލުން މީގެ ތިން އަހަރު ކުރިން ދީފައިވާ ލަފައަކާ ގުޅިގެން ކަމަށެވެ.
ނަމަވެސް، އޭނާގެ މިނިސްޓަރުކަމުގެ ދައުރުގައި ދިވެހިރާއްޖޭގެ ގާނޫނުއަސާސީ އާއި ގާނޫނުތަކާ ހިލާފު އެއްވެސް ކަމެއް ކުރައްވާފައި ނުވާނެ ކަމުގެ ޔަގީންކަން ޝައުނާ ވަނީ ދެއްވާފަ އެވެ. އަދި އޭނާ އާއި ސުވާލު ކުރެވުނު މައްސަލައިގެ ސީދާ މައުލޫމާތު ހާމަ ނުކުރުމަށް އޭސީސީ އިން އަންގާފައިވާ ކަމަށް ވެސް ޝައުނާ ވަނީ ވިދާޅުވެފަ އެވެ.
މައުލޫމާތު ލިބިފައިވާ ގޮތުން އޭސީސީ އިން މިހާރު ތަހުގީގު ކުރަމުން ދަނީ ބަދަލު ދިނުމުގެ މައްސަލައެއްގައި އިކޮނޮމިކް ކައުންސިލުން ދިން ލަފައަކާ ގުޅޭ މައްސަލައެކެވެ. ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލެއް އެކުލަވައިލީ ނޮވެމްބަރު 28، 2022 ގަ އެވެ.
އެ އުސޫލުގެ ދަށުން ބަދަލު ދިނުމުގެ ކަންކަން ކުރިއަށް ގެންދަނީ އެކަމަކާ ގުޅޭ އިދާރާއަކުން މައްސަލަ ތަހުގީގު ކުރުމަށްފަހު، ސެޓްލްމެންޓް ކޮމިޓީ އަށް ހުށަހެޅުމުންނެވެ. އެއަށްފަހު އެ ކޮމިޓީން ދިރާސާކޮށް އިކޮނޮމިކް ކައުންސިލަށް ހުށަހެޅުމުން، އެ ކައުންސިލުން ދޭ ލަފައަކަށް ކެބިނެޓުގައި މަޝްވަރާކުރުމަށްފަހު ބަދަލު ދިނުމުގެ ކަންކަން ނިންމަ އެވެ.
މި ސަރުކާރާ ގުޅޭގޮތުން އޭސީސީ އަށް ހުށަހެޅިފައިވާ މައްސަލަތައް ފުނިޖެހިފައިވާ އިރު، އެމައްސަލަތައް ކުރިޔަށް ނުގެންގޮސް ސިޔާސީ މަންފާ ހާސިލުކުރުމަށްޓަކައި އިދިކޮޅު އެމްޑީޕީ އަށް ނިސްބަތްވާ އިސް ފަރާތްތައް އޭސީސީ އަށް ހާޒިރުކުރަނީ ބިރުދެއްކުމަށް ކަމަށް އެމްޑީޕީ އިން ތުހުމަތު ކުރެ އެވެ.
މީގެ ކުރިން މިދިޔަ އަހަރުގެ އޮކްޓޯބަރު މަހުގެ ތިން ވަނަ ދުވަހު އެމްޑީޕީ އިން ބޭއްވި ބޮޑު މުޒާހަރާ އާ ދިމާކޮށް ވެސް، އެމްޑީޕީ ސަރުކާރުގައި ވަޒީރުކަން ކުރެއްވި ބައެއް ފަރާތްތައް ވަނީ އޭސީސީ އަށް ހާޒިރުކޮށްފަ އެވެ.