ރަސްމާލެއިން ދޫކުރާ ގޯތިތަކަށް އޮތް ތަރުހީބު ކުޑަވެ، އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަމެއް އޮތް ނަމަވެސް، ގޯއްޗަށް ކުރިމަތިލުމުގެ ފުރުސަތު ހުޅުވާލައިފި އެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް ޑރ. މުހައްމަދު މުއިއްޒުގެ ހައުސިންގް މިނިސްޓަރު ޑރ. އަބްދުﷲ މުއްތަލިބް ވިދާޅުވީ މިހާތަނަށް ހުށަހަޅާފައިވާ ފޯމުތަކަށް ބަލާއިރު ފްލެޓަށް އޮތް ޑިމާންޑާ އަޅާބަލާއިރު ގޯއްޗަށް އޮތް ޑިމާންޑު ދަށް ކަމަށެވެ. އެހެންކަމުން ގޯތި ހޯދުމަށް އިތުރު ފުރުސަތެއް ދިނުމަށް "ގޯތި-ގެދޮރު" ގެ ޕްރޮގްރާމެއް ކުރިއަށް ގެންދިއުމަށް ނިިންމީ ކަމަށް ވެސް މިނިސްޓަރު ވިދާޅުވި އެވެ.
ފިރިމީހާ ނޫނީ އަނބިހީމާ ގެ ޕްރޮޕަރޓީ އެއް އޮވެގެން ޝަރުތު ހަމަނުވާގޮތަށް އާއިލީ ބޯހިޔާވަހިކަމުގަ އޮތީ. އެކަމާ ގުޅިގެން އަޅުގަނޑުމެން ވިސްނާފަ، ގޯއްޗަށް އޮތް ޑިމާންޑް ވެސް ފްލެޓަށް އޮތް ޑިމާންޑަށް ވުރެ ކުޑަ ވުމާ އެއްކޮށް، ގޯތި، އަޅުގަނޑުމެންގެ އުސޫލު ރިލެކްސް ކޮށްފަ އަޅުގަނޑުމެން އައު ޕްރޮގްރާމެއް މި ފަށަނީ ގޯތި ގެދޮރުގެ ނަމުގައި. އޭގަ މިވާގޮތުން ފިރިމީހާ ނުވަތަ އަނބިމީހާ ގެ ތަނެއް އޮތް ނަމަވެސް އެ މީހަކަށް ގޯއްޗަށް އެދުމުގެ ފުރުސަތު މި ހުޅުވާލަނީ. އޭރުން އަޅުގަނޑުމެންނަށް ޚާއްސަ ގޮތެއްގަ، ފިރިމީހާ ނޫނީ އަނބިމީހާ ގެ ފްލެޓެއް އޮތް ކަމަށް ވާނަމަ މުސްތަގްބަލުގަ ބިމެއް ހޯދުމުގެ ފުރުސަތު ފަހިވެގެން ދާނެ.ރައީސް ޑރ. މުހައްމަދު މުއިއްޒުގެ ހައުސިންގް މިނިސްޓަރު ޑރ. އަބްދުﷲ މުއްތަލިބް
މިއާއެކު ކައިވެނި ކޮށްގެން އުޅޭ މީހުންގެ ތެރެއިން އެކެއްގެ ނަމުގައި ފްލެޓެއް ނުވަތަ ބޯހިޔާވަހިކަމެއް އޮތް ނަމަވެސް، އަނެކާއަށް މުސްތަގުބަލުގައި އަމިއްލަ ބިމެއް ހޯދުމުގެ ފުރުސަތު ލިބިގެންދާނެ ކަމަށް މިނިސްޓަރު ވިދާޅުވި އެވެ.
މި އުސޫލުގެ ދަށުން ގޯތި ލިބޭނީ މައިންބަފައިން، ދަރިން، އަނބިމީހާ ނުވަތަ ފިރިމީހާގެ ނަމުގައި ރެޖިސްޓްރީ ކޮށްފައިވާ ގޯއްޗަކުން، ތަރިކައިން ނުވަތަ ވަސިއްޔަތަކުން ލިބެން އޮންނަ ގޯތި ނުވަތަ ގޯތިން ބަޔެއް ދޫކޮށްލަން އެއްބަސްވާ ނަމަ އެވެ.
ރަސްމާލެ އިން ދޫކުރާ ގޯތިތަކަަށް ތަރުހީބު ކުޑައިރު، މި އުސޫލުގެ ދަށުން ގޯތި ދޫކުރުމަށް ސަރުކާރުން ނިންމާފައި ވަނީ ރަސްމާލެ އިންނެވެ. އެގޮތުން އެ ކެޓަގަރީ އިން 1،000 ގޯތި ދޫކުރުމަށް ސަރުކާރުން ވަނީ ނިންމާފަ އެވެ.