މަސް ގަންނަ އަގު 20 ރުފިޔާއަށްވުރެ ކުޑަ ނުކުރާނެ
ކަމަށް ރައީސް ޑރ މުޙައްމަދު މުއިއްޒު ވައުދުވެވަޑައިގެންފައިވީނަމަވެސް، ސަރުކާރުގެ ރާގު ބަދަލުވެއްޖެއެވެ.
މަސް ގަންނަ އަގު 20 ރުފިޔާއަށްވުރެ ކުޑަ ނުކުރާނެ
ކަމަށް ރިޔާސީ އިންތިޚާބުގެ ކެމްޕޭނުގައި ރައީސް މުއިއްޒު ވިދާޅުވަމުން ގެންދެވިއެވެ.
އެހެން ނަމަވެސް، ސަރުކާރަށް ދެ އަހަރުވެގެންދާއިރު ވެސް އެ ވައުދު ނުފުއްދާތީ ގިނަ ބަޔަކު
ދަނީ އެކަމާ ސުވާލު ކުރަމުންނެވެ.
ބުދަ ދުވަހު އޮތް ނޫސްވެރިންގެ
ބައްދަލުވުމުގައި ވާހަކަ ދައްކަވަމުން ފިޝަރީޒް މިނިސްޓަރ އަހުމަދު ޝިޔާމް ވިދާޅުވީ، މިފްކޯ ހަރުދަނާ
ކުރުމަށްޓަކައި ވަރަށް ގިނަ މަސައްކަތްތަކެއް ސަރުކާރުން ކުރަމުންދާ ކަމަށާއި،
މާކެޓަށް ބަލައި ގެންނަންޖެހޭ ބަދަލުތައްވެސް ގެންނަމުންދާކަމަށެވެ. އަދި
ސަރުކާރުގެ ވައުދާ އެއްގޮތަށް މަސް ގަންނަ އަގަށް ބަދަލު ގެނެވޭތޯ މަސައްކަތް
ކުރަމުންދާ ކަމަށާއި، މަސައްކަތުގެ މިސްރާބު ހުރީ އެދިމާލަށް ކަމަށްވެސް މިނިސްޓަރ
ވިދާޅުވިއެވެ.
މިނިސްޓަރ ވިދާޅުވި ގޮތުގައި ސަރުކާރުން ފުރަތަމަ
އިސްކަމެއް ދީފައިވާނީ މިފްކޯއަށް ކިރުވާ މަހަށް ބަރާބަރަށް ފައިސާ ދިނުމުގެ
މަސައްކަތަށެވެ.
އިރާދުކުރެއްވިއްޔާ އަޅުގަނޑުމެން މި ދަނީ އެދިމާލަށް، ފުރަތަމަ ކަމަކަށް އަޅުގަނޑުމެން ބެލީ މަސްވެރިން މިފްކޯއަށް ކިރުވާ މަހަށް ބަރާބަރަށް ފައިސާ ދެވޭތޯފިޝަރީޒް މިނިސްޓަރ އަހުމަދު ޝިޔާމް
މިނިސްޓަރ އިތުރަށް ވިދާޅުވީ، މަސްވެރިން ތެލަށް
ކުރާ ހޭދަ ކުޑަކުރުމަށްވެސް ސަރުކާރުން ޚާއްސަ މަޝްރޫއެއް ހިންގަމުންދާ ކަމަށާއި،
އޭޕްރީލް މަހުގެ ނިޔަލަށް ރާއްޖޭގެ ކޮންމެ ރަށަކުން އެސްޓީއޯ ރޭޓުގައި ތެޔޮ ލިބޭނެ
ކަމަށެވެ. އަދި ތެލުގެ އަގު ކުޑަ ކުރެވުމުން، މަސް ގަންނަ އަގު ދަށް ނުކުރިނަމަވެސް ހާސިލުވަނީ އެއް ކަމެއްކަމަށް ދޭހަވާ މޭރުމުން މިނިސްޓަރ ވަނީ ވާހަކަ ދައްކަވާފައެވެ.
މި ހުރިހާ ކަމަކަށް އެޑްރެސް ކުރެވުނީމާ ހުންނާނީ މި ދަންނަވާ އަގުތަކުގައި މަހުގެ އަގުވެސް، ސީދާ އެ އަގު ނުޖެހިއެއް ކަމަކު، ތެލަށް ކުރާ ހޭދަ ކުޑަވީމާ ލިބޭ އާމްދަނީ އިތުރުވީމާ މަހުގެ އަގަށް ސީދާ މިވެނި އަގަކަށޭ މަސް ގަންނަނީ ނުދެންނެވިޔަސް އަގު ހުންނާނީ އެގޮތުގައި،ފިޝަރީޒް މިނިސްޓަރ އަހުމަދު ޝިޔާމް
މީގެ އިތުރުން، މަސް ގަންނަން ލިބޭ އަގު 20 ރުފިޔާއަށްވުރެ ދަށް ނުކުރުމުގެ ވައުދު ފުއްދުމަށްޓަކައި ކުރަންޖެހޭ ކަންކަން ކުރަމުންދާ ކަމަށް ރަށްރަށަށް ވަޑައިގެން ރައީސް ގެންދަވަނީ ވިދާޅުވަމުންނެވެ. އެގޮތުން ރަށްރަށަށް ކުރައްވަމުން ގެންދަވާ ދަތުރުފުޅުތަކުގައި ރައީސް ގެންދަވަނީ އެ ވައުދު ތަކުރާރު ކުރައްވަމުންނެވެ.