2026 އެޕްރީލް 4 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން، ރައްޔިތުންގެ ޚިޔާލު ހޯދުމުގެ ޢާންމު ވޯޓު އޮބްޒާވްކުރުމާއި މޮނިޓަރ ކުރުމަށް ބޭނުންވާ ފަރާތްތަކަށް އިލެކްޝަންސް ކޮމިޝަނުން އިތުރު ފުރުޞަތެއް ހުޅުވާލައިފި އެވެ.
އިލެކްޝަންސް ކޮމިޝަނުން ބުނީ މޮނިޓަރުންނާއި އޮބްޒާވަރުންގެ ގޮތުގައި ކުރިމަތިލުމަށް އެދޭ ފަރާތްތަކަށް ފޯމު ހުށަހެޅުމުގެ ފުރުޞަތު ހުޅުވާލާނީ 2026 މާރިޗު 03 ވާ އަންގާރަ ދުވަހުން (މިއަދުން) ފެށިގެންނެވެ. މި ފުރުޞަތު ހަމަވާނީ 2026 މާރިޗު 04 ވާ ބުދަ ދުވަހުގެ މެންދުރުފަހު 15:00 އަށެވެ. މި މުއްދަތުގެ ތެރޭގައި ޝަރުތުހަމަވާ ހުރިހާ ފަރާތްތަކަކަށްވެސް އެޕްލިކޭޝަން ހުށަހެޅުމުގެ އިންތިޒާމު ވަނީ ހަމަޖައްސާފަ އެވެ.
މޮނިޓަރަކަށް ވުމަށް އެދޭ ނޫސް މަޖައްލާތަކާއި ޚަބަރު ފަތުރާ އިދާރާތަކުން ފޯމު ހުށަހަޅަންޖެހޭނީ އެ އިދާރާއަކުން ކަނޑައަޅާ ޑޭޓާ ލިއޭޒަނެއް މެދުވެރިކޮށް، އިލެކްޝަންސް ކޮމިޝަނުގެ މައި ޕޯޓަލް my.elections.gov.mv މެދުވެރިކޮށެވެ. ޑޭޓާ ލިއޭޒަނަކަށް ވުމަށް އެދޭ ފޯމު ފުރިހަމަކުރުމަށްފަހު، މީޑިއާގެ ރަޖިސްޓަރީ ނުވަތަ ލައިސަންސް ކޮޕީއާއި ލިއޭޒަންގެ އައިޑީ ކާޑު ކޮޕީއާއެކު omc@elections.gov.mv އަށް އީމެއިލް ކުރަންޖެހޭނެ އެވެ. ކޮންމެ މީޑިއާއަކަށްވެސް ވޯޓުލާ އަދި ގުނާ ކޮންމެ ސަރަޙައްދަކަށް ދޫކުރެވޭނީ އެއް ފާހެވެ. އަދި މަރުކަޒެއްގައި އެއްވަގުތެއްގައި ހަރަކާތްތެރިވެވޭނީ އެއްމެ މޮނިޓަރަކަށެވެ.
އޮބްޒާވަރުންގެ ގޮތުގައި ހަރަކާތްތެރިވުމުގެ ފުރުޞަތު ސިޔާސީ ޕާޓީތަކަށާއި، ޖަމްޢިއްޔާ ޖަމާޢަތްތަކުގެ އިތުރުން އަމިއްލަ ފަރާތްތަކަށްވެސް ވަނީ ހުޅުވާލާފަ އެވެ. ސިޔާސީ ޕާޓީތަކުން އޮބްޒާވަރުން ހުށަހަޅާނީ ސިމެދަ ޕޯޓަލް މެދުވެރިކޮށެވެ. ޖަމްޢިއްޔާތަކުން ޑޭޓާ ލިއޭޒަނެއް މެދުވެރިކޮށް މައި ޕޯޓަލްއިން ފޯމު ހުށަހަޅަންޖެހޭއިރު، އަމިއްލަ ގޮތުން ބައިވެރިވާ ފަރާތްތަކަށްވެސް މައި ޕޯޓަލް މެދުވެރިކޮށް ކުރިމަތިލެވޭނެ އެވެ. ސިޔާސީ ޕާޓީތަކާއި ޖަމްޢިއްޔާތަކަށް ފާސް ދޫކުރާނީ ޖުމްލަ ވޯޓު ފޮށީގެ ޢަދަދަށްވުރެ 10 އިންސައްތަ އިތުރުނުވާ ގޮތަށެވެ. އަދި ވޯޓުލާ މަރުކަޒުގައި ކޮންމެ ޙައިސިއްޔަތަކުން އެއްފަހަރާ ހަރަކާތްތެރިވެވޭނީ 1 އޮބްޒާވަރަކަށެވެ.
މިހާތަނަށް މި އިންތިޚާބުތަކާ ގުޅިގެން މޮނިޓަރކުރުމަށް އެދި 3,091 ފަރާތަކުން ފޯމު ހުށަހަޅާފައިވާއިރު، އޮބްޒާވްކުރުމަށް 1,477 ފަރާތަކުން ވަނީ ކުރިމަތިލާފަ އެވެ. މިހާރު ހުޅުވާލި އިތުރު ފުރުޞަތާއެކު މި ޢަދަދުތައް އިތުރުވެގެންދާނެ ކަމަށް ބެލެވެ އެވެ.