އެމްޑީޕީ ކައުންސިލް ވެގެންދާނީ ރައީސް މުއިއްޒުގެ ރިޔާސީ ވައުދުފުޅާ އެއްގޮތަށް ހުޅުމާލޭގެ މުނިސިޕަލް ހުރިހާ ހިދުމަތްތަކެއް ސިޓީ ކައުންސިލްގެ ދަށަށް ގެނައުމަށް ވަކާލާތުކޮށް އެ މަސައްކަތް ކާމިޔާބުކުރާނެ ކައުންސިލަކަށް ކަމަށް، އެމްޑީޕީ ޓިކެޓްގައި ކުރިޔަށް އޮތް ކައުންސިލް އިންތިހާބުގައި ހުޅުމާލެ އުތުރު ދާއިރާގެ ކައުންސިލް ގޮނޑި އަށް ވާދަކުރައްވާ ފާތިމަތު ޒަހިއްޔާ ވިދާޅުވެއްޖެ އެވެ.
އެމްޑީޕީ ގެ ފަރާތުން ސިލްސިލާ ގޮތެއްގައި ކުރިޔަށް ގެންދާ ޕިކަޕް ޖަލްސާ ގައި، އަންގާރަ ދުވަހު ހުޅުމާލެ ފޭސް 2 ވިނަރެސް ޓަވަރުތައް ހުންނަ ސަރަހައްދުގައި ވާހަކަ ދައްކަވަމުން ޒަހިއްޔާ ވަނީ، ހުޅުމާލޭގެ ރައްޔިތުންނަށް ބޭނުންވާ މުނިސިޕަލް ހިދުމަތްތައް ދިނުމަށް އެޗްޑީސީ އިން ނުކުޅެދިފަވާ ކަން ފާހަގަ ކުރައްވައި އެޗްޑީސީ އަށް ވަރަށް ބޮޑަށް ފާޑު ކިޔުއްވާފަ އެވެ.
ވިނަރެެސް ފްލެޓްތައް ހުންނަނީ އެޗްޑީސީގެ ބެލުމުގެ ދަށުގަ، ނަމަވެސް މި ތަނުގަ ދިރިއުޅޭ ރައްޔިތުންނަށް އެކަށީގެންވާ މިންވަރާ ގާތަށްވެސް މުނިސިޕަލް ހިދުމަތްތައް އެޗްޑީސީ އަކަށް ފޯރުކޮށެއް ނުދެވޭ. އެކަމަކު ކިރިޔާ ކަމެއްވާ އިރަށް އެޗްޑީސީގެ ފަރާތުން މި ތަނުގަ ދިރިއުޅޭ ރައްޔިތުންނަށް ލީގަލް ނޯޓިސް އެބަ ފޮނުވާ. މި ތަންތަނުގެ އެގްރީމެންޓް ހެދި އިރު އެބަ ބުނޭ އެއް އަހަރު ދުވަސް ތެރޭގަ، ތަނުގަ ދިރިއުޅޭ ރައްޔިތުންގެ ހިއްސާ އާ އެކު މެނޭޖްމެންޓް ކޯޕަރޭޝަން އެއް އެކުލަވާލަން ޖެހޭނެ ވާހަކަ. ނަމަވެސް މިއަދާ ހަމައަށް އައި އިރު ވެސް މިކޯޕަރޭޝަން އެކުލަވާލެވިފަ އެއް ނުވޭ. ވިނަރެސް ފްލެޓް ތަކުގެ ވެރިންނަށް ނޭނގި އެޗްޑީސީ އިން ވަނީ ވިނަރެސް ގެ ޕާކިން ޒޯނުތައް އުސޫލުން ބޭރުން ބޮޑު އަގުގަ ވިއްކާލާފަ. މެއިންޓެނެންސް ފީގެ ގޮތުގަ ބޮޑު އަދަދެއް ކޮންމެ މަހަކު ނަގާ އިރު ވެސް، ވިނަރެސް ފްލެޓް ތަކުގެ މެއިންޓެނެންސް މަސައްކަތް އެޗްޑީސީ އިން އެއްވެސް ވަރަކަށް ނުކުރޭ.އެމްޑީޕީ ޓިކެޓްގައި ހުޅުމާލެ އުތުރު ދާއިރާގެ ކައުންސިލް ގޮނޑި އަށް ވާދަކުރައްވާ ފާތިމަތު ޒަހިއްޔާ
މީގެ އިތުރުން ދެ އިންތިހާބު އެއްކޮށްލުމުގެ ނަމުގަ ރައީސް މުއިއްޒު ޖައްސަވާ ސިޔާސީ ޗަރުކޭހުގަ އެއްވެސް ދިވެހި ރައްޔިތަކު ނުޖެހުމަށް ޒަހިއްޔާ ވަނީ ގޮވާލާއްވާފަ އެވެ. ދެ އިންތިހާބު އެއްކޮށްލުމަށް ނަގާ ވާނުވާ ނޭނގޭ ވޯޓުގަ ބޮޑުތަނުން ނޫނެކޭ ބުނުމަށް ހުރިހާ ރައްޔިތުން ވެސް ތައްޔާރަށް ތިއްބެވުމަށް ޒަހިއްޔާ ގޮވާލެއްވި އެވެ.
ހީލަތްތެރިގޮތަކަށް ރައްޔިތުންގެ ފެންނަ ނުފެންނަ ވޯޓެއް ނަގައިގެން އިންތިޚާބުތައް އެއްކޮށްލުން އެއީ ވެރިކަމުގެ ދައުރު ދިގުދަންމާލުމަށް ރައީސް ޑރ. މުހައްމަދު މުއިއްޒު ކުރައްވާ ކަމެއް ކަމަށް ޕިކަޕް ޖަލްސާ ގައި ވާހަކ ދެއްކެވި އެހެން ބޭފުޅުން ވަނީ ފާހަގަކުރައްވާފަ އެވެ. މިކަންކަމާއި ދެކޮޅަށް ރައްޔިތުން ތެދުވެ، ފާޅުގައި އެ ކަންކަމަށް ނޫނެކޭ ބުނަން ޖެހޭ ކަމަށް ވެސް ޕިކަޕް ޖަލްސާގައި ވާހަކަދެއްކެވި ބޭފުޅުން ވަނީ ވިދާޅުވެފަ އެވެ.