އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މައްޗަންގޮޅި މެދު ދާއިރާގެ ދޮރުން ދޮރަށް ހަރަކާތް ކާމިޔާބުކަމާއި އެކު ބާއްވައިފި އެވެ.
އެ ހަރަކާތުގައި ވާހަކަދައްކަވަމުން، މާލޭގެ މޭޔަރ އަދި އެމްޑީޕީގެ ޓިކެޓުގައި މާލޭގެ މޭޔަރ ކަމަށް ވާދަކުރައްވާ އާދަމް އާޒިމް ވިދާޅުވީ ރައްޔިތުން ބޭނުންވަނީ އިޚުލާސްތެރިކަމާ އެކު މަސައްކަތް ކުރާނެ ބައެއް ކައުންސިލުގައި ތިބުން ކަމަށެވެ. ވަޒީފާ އަށް ވަފާތެރި ނުވާ ވައުދާއި ޚިލާފުވާ ބަޔަކު ކައުންސިލަށް އައްޔަންކޮށްގެން ރައްޔިތުންނަށް ވާނެ ފައިދާ އެއް ނެތް ކަމަށް އޭނާ ވަނީ ފާހަގަކުރައްވާފަ އެވެ. ޕީއެންސީ ކައުންސިލަރުން ކައުންސިލް ޖަލްސާތަކަށް ހާޒިރު ނުވާތީ އެ ކަންބޮޑުވުންތައް އާއްމުންނާއި ހިސާބަށް ހާމަކުރުމުން އެކަން އޮޅުވާލަން މަސައްކަތް ކުރާ ކަމަށް ވެސް އާޒިމް ވަނީ ވިދާޅުވެފަ އެވެ.
"މިއީ ރައްޔިތުންނަށް ފެންނަން ހުރި ކަންކަން. މިއަދު ރައްޔިތުން މިފަދަ ކަންކަން ބަލާނެ. ޒިންމާދާރުވާން ޖެހޭ މިއަށް ވުރެ. ރައްޔިތުންނަށް ހަމަ ގައިމު ވެސް އިޚުލާސްތެރިވާނެ އެމްޑީޕީގެ ކެނޑިޑޭޓުން. އެހެންވީމަ އެމްޑީޕީގެ ކެނޑިޑޭޓުން ހޮވަންވީ." އޭނާ ވިދާޅުވި އެވެ.
އާޒިމްގެ އިތުރުން މިހާރު ވެސް ޑަބްލިއުޑީސީގައި މަސައްކަތް ކުރައްވާ އަދި ޑަބްލިއުޑީސީ އަށް އެމްޑީޕީގެ ޓިކެޓުގައި ވާދަކުރައްވާ ރަޝީދާ ރަޝާދު ވަނީ މިހާރު ތިބި އެމްޑީޕީގެ ޑަބްލިއުޑީސީ ކެނޑިޑޭޓުންނަކީ މަސައްކަތް ކުރާ ބައެއްކަން ޓްރެކް ރެކޯޑުން ފެންނަން އޮތް ކަަމަށެވެ. އެގޮތުން މަސައްކަތްތެރިންނަށް އިތުރު ފުރުސަތުތައް ހޯދާދިނުމާއި، ރަނި އެވޯޑް ފަދަ އާ ކަންކަން ފެށުމަކީ ކޮށްފައިވާ މުހިންމު މަސައްކަތްތައް ކަމަށް ފާހަގަކުރެއްވި އެވެ. އެހެންކަމުން ދެން ވެސް ރައްޔިތުންނަށް ފައިދާ އެއް ލިބޭނީ އެމްޑީޕީގެ ކައުންސިލަކާއި ޑަބްލިއުޑީސީ އެއް އޮވެގެން ކަމަށް އޭނާ ވިދާޅުވި އެވެ.
ހޮނިހިރު ދުވަހު ބޭއްވި އިތުރު ބައެއް ހަރަކާތްތަކަށް ބަލާއިރު މޭޔަރގެ ޚާއްސަ ރޯދަވީއްލުމެއް ވަނީ ބާއްވާފަ އެވެ. އެ ރޯދަވީއްލުން ބާއްވާފައި ވަނީ ހޮނިހިރު ދުވަހު ލެމަންގްރާސް ސިޓްރޮން ކެފޭގަ އެވެ.
އެ ރޯދަވީއްލުމުގައި ކުރީގެ ރައީސް އިބްރާހިމް މުހައްމަދު ސޯލިހު އާއި އެމްޑީޕީގެ އިސް ބައެއް ފަރާތްތަކުން ވަނީ ބައިވެރިވެވަޑައިގަންނަވާފަ އެވެ. މީގެ އިތުރުން އެމްޑީޕީގެ އިސް ސަފުގައި މަސައްކަތް ކުރައްވާ ބައެއް ފަރާތްތަކުން ވެސް ވަނީ އެ ރޯދަ ވީއްލުމުގައި ބައިވެރިވެފަ އެވެ. އޭގެ ތެރޭގައި ރައްޔިތުންގެ މަޖިލީހުގެ ކުރީގެ ބައެއް މެމްބަރުން ހިމެނިވަޑައިގަންނަވަ އެވެ.
މީގެ އިތުރުން އެމްޑީޕީގެ ގްރާސްރޫޓުގައި މަސައްކަތް ކުރާ ބައެއް ފަރާތްތަކާއި ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީ އިންތިޚާބުގައި ވާދަކުރާ ބައެއް ކެނޑިޑޭޓުން އެ ރޯދަވީއްލުމުގައި ބައިވެރިވެފައިވެ އެވެ. މިރޯދަވީއްލުމަކީ އެކުވެރިކަން ގާތް ކުރުމާއި، ގާތް ރޫހު އާލާކުރުމަށް އެއް މާހައުލަކުން ބައްދަލުވެލުމުގެ ފުރުސަތު ހޯދައިދިނުމުގެ މަގްސަދުގައި ބޭއްވި ރޯދަވީއްލުމެކެވެ.