ސަރުކާރުގެ މުވައްޒަފުންނަށް ރަމަޟާން މަހުގެ ފަހު 10 ބަންދުކޮށް، އެޓެންޑެންސް އެލަވަންސް ދިނުމާ ގުޅޭގޮތުން ގެނެސްފައިވާ ބަދަލަށް ގިނަ މުވައްޒަފުން ކަންބޮޑުވުން ފާޅު ކުރަން ފަށައިފި އެވެ.
އެޓެންޑަންސް އެލަވަންސް ދިނުމާ ގުޅޭގޮތުން ސިވިލް ސަރވިސްއިން ވަނީ މިދިޔަ ނޮވެންބަރު މަހު އުސޫލެއް އާއްމު ކޮށްފަ އެވެ. މި އުސޫލުގައިވާ ގޮތުން ރަމަޟާން މަހުގެ ފަހު 10 ސަރުކާރުން ބަންދުކުރާއިރު، އޭގެ ކުރިން އަންނަ ރަސްމީ އެންމެ ފަހު ދުވަހު އެއްވެސް ސަބަބަކާހުރެ އޮފީހަށް ހާޒިރުނުވާ ނަމަ މުވައްޒަފުންނަށް ބަންދު މުއްދަތުގައި އެޓެންޑެންސް އެލެވެންސް ނުލިބޭނެ ކަމަށެވެ.
މިކަމާއި ގުޅިގެން ރާއްޖެއެމްވީއަށް ސިވިލް ސަރވިސް މުވައްޒަފެއް ބުނީ، އެ އުސޫލަށް މުވައްޒަފުން ހޭލުންތެރިނޫން ކަމަށާއި، އެކަން އެނގުނީ ވެސް އަހަރީ ޗުއްޓީގައި ތިބި މުވައްޒަފުންނަށް އެޓެންޑެންސް އެލަވަންސް ނުލިބޭނެކަން އެޗްއާރުން އެންގުމުން ކަމަށެވެ.
އެންގުމެއްގައި ބުނެފައި ވަނީ ރަމަޟާން މަހުގެ ފަހު 10 އަކަށް ބަންދުވުމުގެ ކުރިން އަންނަ ރަސްމީ އެންމެ ފަހު ދުވަހަކީ 8 މާރޗް 2026 ކަމަށެވެ. އަދި އެ ދުވަހު އާއިލީ ޒިންމާއެއް، ސަލާމެއް ނުވަތަ އެ ނޫން ވެސް އެއްވެސް ޗުއްޓީއެއްގައި ހުންނަ މުވައްޒަފަކަށް ވެސް ފަހު 10 ގައި އެޓެންޑެންސް އެލެވެންސް ނުލިބޭނެ ކަމަށެވެ.
ރަމަޟާން މަހުގެ ފަހު 10 އަކީ ބަންދު ދުވަސްތަކެއްގެ ގޮތުގައި މިދިޔަ އަހަރު ވެސް ކަނޑައެޅި އެވެ. ނަމަވެސް އެޓެންޑެންސް އެލަވަންސް ދިފައިވެ އެވެ.
އެޓެންޑެންސް އެލަވަންސްގެ ގޮތުގައި ކޮންމެ ދުވަހަކަށް 65 ރުފިޔާ އާއި 300 ރުފިޔާއާ ދެމެދުގެ އަދަދަށް ރުފިޔާ ދެ އެވެ. އެކި ރޭންކްތަކަށް އެކި ވަރަށް އެލަވަންސްދޭއިރު، އޮފީހަށް ހާޒިރު ނުވެވޭ ނުވަތަ ޗުއްޓީގައި ތިބި މުވައްޒަފުންގެ މުސާރަ ވަރަށް ބޮޑަށް ކުޑަ ވެގެންދާނެ އެވެ.
އަންނަ މާރިޗު މަހުގެ 9 ވާ ހޯމަ ދުވަހުން ފެށިގެން ރަމަޟާން މަހުގެ ފަހުދިހައިގައި ސަރުކާރުގެ އޮފީސްތައް ބަންދުވާނެ ކަން 26 ފެބްރުއަރީ 2026 ގައި ރައީސް އޮފީހުން ވަނީ ހާމަކޮށްފަ އެވެ.