ގިނަ އަދަދެއްގެ ދިވެހީން ދިރިއުޅެމުންދާ އަދި އާންމުކޮށް ދިވެހީން ދަތުރުކުރާ މެލޭޝިއާގައި ކެއްސުން ބަލި ނުވަތަ ޓީބީ ހަލުއިކަމާއެކު ފެތުރެމުންދާތީ، އެކަމާ ގުޅިގެން ރާއްޖެ އަށް އޮތް ނުރައްކާ ދެނެގަތުމަށްޓަކައި ރިސްކް އެސެސްމަންޓެއް ހަދަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ފަށައިފި އެވެ.
އެޗްޕީއޭ ގެ މީޑިއާ އޮފިޝަލަކު ވިދާޅުވީ މެލޭޝިއާ ގައި ޓީބީ ފެތުރުން އިތުރުވަމުންދާ މައްސަލައަށް އެ އެޖެންސީން ވަރަށް ބޮޑަށް ސަމާލުކަން ދެމުންދާ ކަމަށެވެ. މިގޮތުން މިހާރު ކުރިއަށްދާ ރިސްކް އެސެސްމަންޓްގެ މަސައްކަތްތައް ނިމުމުން، އެކަމާ ގުޅޭ އިތުރު ތަފްސީލާއި އަޅަންޖެހޭ ފިޔަވަޅުތަކުގެ މައުލޫމާތު އާންމުންނާ ހިއްސާކުރައްވާނެ ކަމަށް އޭނާ ވިދާޅުވި އެވެ.
މެލޭޝިއާ ގެ ހެލްތު މިނިސްޓްރީ އިން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، މިދިޔަ ހަފުތާގެ ތެރޭގައި އެކަނި ވެސް އެ ގައުމުން ޓީބީ ގެ 596 ކޭސް ވަނީ ރިޕޯޓްކޮށްފަ އެވެ. މިއާއެކު އެ ގައުމުގައި މި ބަލި ޖެހިފައިވާ މީހުންގެ ޖުމްލަ އަދަދު މިހާރު ވަނީ 3،000 އަށްވުރެ މައްޗަށް އަރާފަ އެވެ. ބަލި ފެތުރެމުންދާ ސަރަހައްދުތަކުގެ ތެރޭގައި ދިވެހީން އެންމެ ގިނައިން ދިރިއުޅޭ ކުއާލަލަމްޕޫރުގެ އިތުރުން ޕުޓްރަޖާޔާ ހިމެނޭތީ، މިއީ ރާއްޖެއަށް އޮތް ކަންބޮޑުވުމެއްގެ ގޮތުގައި ވަނީ ފާހަގަކުރެވިފަ އެވެ.
ރިޕޯޓުތައް ބުނާގޮތުން މެލޭޝިއާ ގައި 2023 ވަނަ އަހަރު ޓީބީ ޖެހުނު މީހުންގެ އަދަދު އޭގެ ކުރީ އަހަރާ އަޅާބަލާއިރު 5.5 އިންސައްތަ އިތުރުވެ، 26,781 އަށް ވަނީ އަރާފަ އެވެ. އަދި 2026 ވަނަ އަހަރުގެ މިހާތަނަށް މި އަދަދު 10 އިންސައްތައަށް އިތުރުވެފައިވުމަކީ، މި ބަލި އެ ގައުމުގައި އަލުން ބާރަށް ފެތުރެމުންދާކަމުގެ ހެއްކެއް ކަމަށް ސިއްހީ މާހިރުން ވިދާޅުވެ އެވެ.
ޓީބީ އަކީ ބަލި ޖެހިފައިވާ މީހަކާ ގާތްކޮށް ގިނަ ވަގުތު އުޅުމުގެ ތެރެއިން ނޭވާލާ ނިޒާމުގެ ޒަރީއާ އިން ފެތުރޭ ބައްޔެކެވެ. މި ބަލި އިތުރުވާ މައިގަނޑު ސަބަބުތަކުގެ ތެރޭގައި ހަށިގަނޑުގެ ދިފާއީ ނިޒާމު ބަލިކަށިވުމާއި، ބަލި ހުރިކަން ދެނެގަތުން ލަސްވުން ހިމެނެ އެވެ. މީގެ އިތުރުން، ބަލި ޖެހުމުން ދޭ ފަރުވާ ފުރިހަމަނުކުރުމުގެ ސަބަބުން، ބޭހަށް ނުގުޑާ ބައްޔަކަށް ޓީބީ ބަދަލުވުމަކީ ވެސް މި ބަލި ކޮންޓްރޯލް ކުރުމަށް އޮތް ބޮޑު ގޮންޖެހުމެކެވެ.
ޓީބީ އަށް ފަރުވާ ކުރުމަށް އާންމުކޮށް މަދުވެގެން ހަ މަސް ދުވަސް ހޭދަވެ އެވެ. ޑޮކްޓަރުންގެ އިރުޝާދާ އެއްގޮތަށް ފަރުވާގެ މުއްދަތު ފުރިހަމަކޮށްފިނަމަ މިއީ މުޅިން ފަސޭހަކުރެވޭ ބައްޔެކެވެ. ނަމަވެސް ފަރުވާ މެދުކަނޑާލައިފިނަމަ ބަލީގެ ނުރައްކާ ބޮޑުވެ، ފުރާނައަށް ނުރައްކާވާ ހާލަތަށް ދިއުމުގެ ފުރުސަތު އޮވެ އެވެ.
ރާއްޖެއަކީ 2030 ވަނަ އަހަރާ ހަމައަށް ޓީބީ ނައްތާލެވިފައިވާ ގައުމަކަށް ހެދުމަށް އަމާޒު ހިފާފައިވާ ގައުމެކެވެ. މި މަސައްކަތުގެ ދަށުން ރާއްޖޭގެ 100 ރަށަކުން ޓީބީ ނައްތާލެވިފައިވާ ކަމަށް ކަނޑައެޅުމުގެ މަސައްކަތް ކުރަމުންދާ ކަމަށް އެޗްޕީއޭ އިން މީގެ ކުރިން ވަނީ ހާމަކޮށްފަ އެވެ.