ކުރިއަށް އޮތް މާރިޗު މަހަކީ ރާއްޖޭގެ ބޮޑު ބަޔަކަށް އާންމުކޮށް ވާރޭވެހޭ މިންވަރަށް ވުރެ މަދުން ވާރޭވެހޭނެ މަހެއް ކަމަށާއި، ރާއްޖޭގެ ހޫނުމިން ވެސް އާންމު މިންގަނޑަށް ވުރެ މަތިވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން ހާމަކޮށްފިއެވެ. އެ އިދާރާއިން ހުކުރު ދުވަހު ނެރުނު މޫސުމީ ލަފާގައިވާ ގޮތުން، އަންނަ މަހަކީ ރާއްޖޭގެ މޫސުމަށް ބޮޑެތި ބަދަލުތަކެއް އަންނާނެ މަހެކެވެ.
މެޓް އޮފީހުން އާންމުކުރި "މޯލްޑިވްސް މަންތްލީ ކްލައިމެޓް އައުޓްލުކް" ރިޕޯޓުގައި ބުނެފައިވަނީ، އަންނަ މަހު ރާއްޖޭގެ އުތުރުގެ އަތޮޅުތަކަށް ވާރޭވެހޭނެ ކަމަށް ބެލެވެނީ އާންމުކޮށް ވެސް އެ ދުވަސްވަރު ވާރޭވެހޭ މިންވަރަށް ކަމަށެވެ. ނަމަވެސް، މެދުރާއްޖެތެރެ އާއި ދެކުނުގެ އަތޮޅުތަކަށް ވާރޭ ވެހޭނެ ކަމަށް ލަފާކުރެވެނީ އާންމުކޮށް ވެހޭ މިންވަރަށް ވުރެ ބޮޑުތަން މަދުންނެވެ.
މި ލަފާކުރުންތަކަކީ ދުނިޔޭގެ މޫސުމާ ބެހޭ ޖަމިއްޔާގެ "ލީޑް ސެންޓަރ" އިން އެކުލަވާލާފައިވާ 11 މޮޑެލްއެއްގެ އެހީގައި ތައްޔާރުކޮށްފައިވާ ތަފާސްހިސާބުތަކެއް ކަމަށް މެޓް އޮފީހުން ބުނެ އެވެ. މޫސުމަށް އަސަރުކުރާ ބޮޑެތި ކަންކަމަށާއި ދިވެހިރާއްޖޭގެ މޫސުމީ ހާލަތަށް ރިއާޔަތްކޮށް، މެދުރާއްޖެތެރެ އާއި ދެކުނުގެ އަތޮޅުތަކަށް ވާރޭ މަދުވާނެ ކަމަށް ބެލެވެނީ މައިގަނޑު ގޮތެއްގައި މޮޑެލްތަކުން ދައްކާ ސިގްނަލްތަކުގެ އަލީގަ އެވެ.
ފިނިހޫނުމިނަށް ބަލާއިރު، މާރިޗު މަހު މުޅި ރާއްޖޭގައި ވެސް ފިނިހޫނުމިން އާންމު މިންވަރަށް ވުރެ ކުޑަތަންކޮޅެއް މަތިވާނެ ކަމަށް ވަނީ ލަފާކޮށްފަ އެވެ. މީގެ ތެރޭގައި ދުވާލުގެ އެންމެ މަތީ ފިނިހޫނުމިނާއި ރޭގަނޑުގެ އެންމެ ދަށް ފިނިހޫނުމިން ވެސް ހިމެނެ އެވެ. ނަމަވެސް، ށ. އަތޮޅުން ފެށިގެން ކ. އަތޮޅާ ދެމެދުގެ ސަރަހައްދުތަކުގައި ފިނިހޫނުމިން އާންމު މިންވަރަށް ވުރެ މަތިވުމުގެ ފުރުސަތު ނިސްބަތުން ކުޑަ ކަމަށް އެ އިދާރާއިން ފާހަގަކުރެ އެވެ.
މެޓް އޮފީހުން އިތުރަށް ބުނެފައިވަނީ، ސަރަހައްދީ ވިލާގަނޑުގެ ހަރަކާތްތައް ނުވަތަ މެޑެން-ޖޫލިއަން އޮސިލޭޝަން (އެމްޖޭއޯ) މިވަގުތު އަރަބި ކަނޑާއި ރާއްޖެ ހިމެނޭ ސަރަހައްދުގައި ވަނީ ބަލިކަށިވެފައެވެ. އެހެން ނަމަވެސް، މާރިޗު މަހުގެ ފުރަތަމަ ހަފުތާގެ ތެރޭގައި މެރިޓައިމް ކޮންޓިނެންޓް ސަރަހައްދުގައި މި ހަރަކާތްތައް ވަރުގަދަވުން އެކަށީގެންވާ ކަމަށް ލަފާކުރެވެ އެވެ.
މި ހުރިހާ މައުލޫމާތުތަކަށް ރިއާޔަތްކޮށް މެޓް އޮފީހުން ބުނަނީ، އަންނަ މަހަކީ ރާއްޖެއަށް އާންމުކޮށް ވާރޭވެހޭ މިންވަރަށް ވުރެ ހަނަފަސް، އަދި ހޫނުގަދަ މަހަކަށް ވުމުގެ ފުރުސަތު ބޮޑު ކަމަށެވެ.