ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ކެމްޕޭނަށް އެމްޑިޕީގެ ރައީސް އަބްދުﷲ ޝާހިދު އައްޑޫ ސިޓީއަށް ޒިޔާރަތް ކުރެއްވުމުން އެސިޓީގެ ރައްޔިތުން ހޫނު މަރުހަބާއެއް ކިޔައިފި އެވެ.
އަންގާރަ ދުވަހުގެ ރޭ އެމްޑީޕީގެ ކެމްޕެއިން ޓީމު އައްޑޫއަށް ވަޑައިގަތުމުން އެ ސިޓީގެ ގިނަ އަދަދެއްގެ ރައްޔިތުން ނިކުމެ ޓީމަށް ހޫނު މަރުހަބާއެއް ވަނީ ކިޔައިފަ އެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގެ ކެމްޕެއިންގެ ތެރެއިން އައްޑޫ ސިޓީ އާއި ފުވައްމުލަކު ސިޓީއަށް އަންގާރަ ދުވަހު ފެށި މި ދަތުރުގައި އެމްޑީޕީގެ ރައީސް އަބްދުﷲ ޝާހިދު އާއީ ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ އާއި ޑރ. އިބްރާހިމް ދީދީ އަދި އެމްޑީޕީ ޕީޖީ ލީޑަރު އިބްރާހިމް ނާޒިލް ގެ އިތުރުން އެމްޑީޕީގެ ބައެއް އާންމު މެންބަރުން ވެސް ވަނީ ބައިވެރިވެ ވަޑައިގަންނަވާފަ އެވެ.
އެމްޑީޕީގެ ރައީސް އަބްދުﷲ ޝާހިދު ބައިވެރިވެވަޑައިގަންނަވާ މިދަތުރުފުޅުގައި ޒިޔާރަތްކުރައްވާ ދެ ސިޓީގައި ވެސް ދޮރުން ދޮރަށް ކެމްޕެއިން ހަރަކާތުގެ އިތުރުން ޖަގަހަ ހުޅުވުމުގެ ހަރަކާތްތައް ވެސް ކުރިއަށް ގެންދިއުމަށް ވަނީ ހަމަޖެހިފަ އެވެ.