މި ވަގުތު އިންތިޚާބުތައް އެއްކޮށްލުމަށް އާ އެކޭ ބުނެފި ނަމަ ޑިމޮކްރެސީ އެއްކޮށް ފުނޑުފުނޑު ވެގެން ދާނެ ކަމަށާއި، އެކަމަށް ނޫނެކޭ ބުނަން ޖެހޭ ކަމަށް އެމްޑީޕީގެ ކުރީގެ ޗެއާޕަރސަން ފައްޔާޒް އިސްމާއިލް ވިދާޅުވެއްޖެ އެވެ.
ފައްޔާޒް އެފަދައިން ވިދާޅުވީ އެމްޑީޕީ ދޮރުން ދޮރަށް ހަރަކާތުގެ ތެރެއިން ރާއްޖެ އެމްވީ އަށް ދެއްވި ބަސްތީގަތުމެއްގަ އެވެ.
މި ސަރުކާރުން ވަނީ ކައުންސިލްގެ ނިޒާމުގެ އިތުރުން މުޅި ރާއްޖޭގެ ނިޒާމް އެއްކޮށް ފުނޑުފުނޑު ކޮށްލާފައި ކަމަށް ފައްޔާޒް ވިދާޅުވި އެވެ. ކުރިއަށް އޮތް ކައުންސިލް އިންތިޚާބުގައި އާއްމުން ސަރުކާރަށް ނޫނެކޭ ބުނެ ސަރުކާރު ހުއްޓުވަން ޖެހޭ ކަމަށާއި އެހެން ނޫން ނަމަ ފެންނާނީ ރާއްޖެ އެތައް ތަނެއް ފަހަތަށް ޖެހޭ މަންޒަރު ކަމަށް ވެސް ފައްޔާޒް ވިދާޅުވި އެވެ. އެތައް ޒަމާނަކުން ދިވެހިން ހޯދި ހައްގުތައް ސަރުކާރުން ނިގުޅައިގަންނަމުން ދާ އިރު އެކަންކަމަށް ނޫނެކޭ ބުނަން ލިބޭ ފުރުސަތަކަށް ކައުންސިލް އިންތިޚާބު ހަދަން ޖެހޭ ކަމަށް ފައްޔާޒް ވިދާޅުވި އެވެ.
"އެމްޑީޕީ އަކީ އަބަދުވެސް ގާބިލް ކެނޑިޑޭޓުން ނެރޭ ބައެއް. ސަރުކާރުން މަސައްކަތް ކުރަނީ ނުފޫޒާއި ބާރު ގަދަކުރަން. މި ފުރުސަތު ސަރުކާރަށް ދީފި ނަމަ ރާއްޖޭގެ އިގްތިޞާދު އެއްކޮށް ފުނޑޭނެ. ރާއްޖޭގެ ކައުންސިލް ނިޒާމް ވެސް ފުނޑޭނެ." ފައްޔާޒް ވިދާޅުވި އެވެ.
ޕީއެންސީ އަކީ އެއްވެސް ސިޔާސަތެއް އޮވެގެން އިންތިޚާބުތަކަށް ކުރިލާ ބައެއް ނޫންކަމަށް ފާހަގަކުރައްވާ ފައްޔާޒް ވަނީ ސިޔާސަތެއް ނެތް ބަޔަކަށް އިންތިޚާބު ކާމިޔާބު ކުރުމަށް ފުރުސަތު ނުދިނުމަށް ގޮވާލައްވާފަ އެވެ. ރާއްޖޭގެ 39 ރަށަށް ކައުންސިލް އިންތިޚާބާއި ޑަބްލިއުޑީސީ އިންތިޚާބުގެ ކެމްޕެއިން އަށް ދެވިފައިވާ ކަމަށާއި ސަރުކާރާއި މެދު ހިތް ހަމަ ޖެހިގެން ތިބި އެއްވެސް ރަށެއް ނެތް ކަމަށް ފައްޔާޒް ވިދާޅުވި އެވެ.