ކުރިއަށް އޮތް ކައުންސިލް އިންތިޚާބާއި ޑަބްލިއުޑީސީގެ ކެމްޕެއިން ހަރަކާތްތަކުގެ ތެރެއިން، އެމްޑީޕީ އިން މައްޗަންގޮޅި އުތުރުގެ ދޮރުން ދޮރަށް ހަރަކާތް ކާމިޔާބުކަމާއި އެކު ބާއްވައިފި އެވެ.
އެ ދޮރުން ދޮރަށް ހަރަކާތުގައި ވާހަކަދައްކަވަމުން މާލޭގެ މޭޔަރ އަދި ކުރިއަށް އޮތް ކައުންސިލް އިންތިޚާބުގައި މާލޭގެ މޭޔަރ ކަމަށް އިދިކޮޅު އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމް ވިދާޅުވީ ސަރުކާރަށް އިންތިޚާބު ކާމިޔާބު ނުކުރެވޭނެ ކަން އެނގުމުން މިހާރު ދައްކަނީ އަގު ވައްޓާލުމަށް ދައްކަމުންދާ ވާހަކަތައް ކަމަށެވެ. އެގޮތުން މާލޭގެ ކަންކަން ސިޓީ ކައުންސިލަށް ނުބެލެހެއްޓޭ ކަމަށާއި ޚާއްސަކޮށް މިސްކިތްތަކުގެ ހާލަތު ގޯސް ކަމަށް ދެއްކުމަށް ސަރުކާރަށް ނިސްބަތްވާ ފަރާތްތަކުން ކެނޑިނޭޅި މަސައްކަތް ކުރަމުންދާ ކަމަށް އާޒިމް ވިދާޅުވި އެވެ.
ނަމަވެސް މޭޔަރ ކަމާއި ހަވާލުވެވަޑައިގެންނެވި އިރު މިސްކިތްތަކުގެ ހާލަތު ހުރީ ވަރަށް ގޯސްކޮށް ކަމަށެވެ. މިސްކިތްތައް ބެލެހެއްޓުމުގެ މަސައްކަތަށް ދިވެހިން ނަގާ، އެ މަސައްކަތް ހަރުދަނާ ކުރެއްވި ކަމަށް ވެސް އާޒިމް ވިދާޅުވި އެވެ. ނަމަވެސް ފަހުން ދިވެހި މުވައްޒަފުން ނެގުން ހުއްޓުވުމުގެ ސަބަބުން އެ މަސައްކަތަށް ވެސް ހުރަސް އެޅިފައިވާކަން އާޒިމް ވަނީ ފާހަގަކުރައްވާފަ އެވެ.
"ޓްރެކް ރެކޯޑަށް ބަލާލުމުން އެނގޭނެ ކޮން ބައެއްކަން މި މަސައްކަތް ކުރީ. މިސްކިތްތަކަށް އަރާ މީހުންނަށް އިނގޭނެ މިސްކިތްތަކުގެ ހާލަތު ރަނގަޅުކަން. އެމްޑީޕީ އިން ވެސް ވަރަށް ބޮޑަށް އިސްކަން ދޭ ކަމެއް މިސްކިތް އެޅުމާއި މިސްކިތް ބެލެހެއްޓުމަކީ." އާޒިމް ވިދާޅުވި އެވެ.
ހޮނިހިރު ދުވަހުގެ ރޭ ދޮރުން ދޮރަށް ހަރަކާތުގައި ބައިވެރިވެވަޑައިގެން، އެމްޑީޕީގެ ވަގުތީ ޗެއާ ޕާސަން އަބްދުލް ޣަފޫރު މޫސާ ވިދާޅުވީ ކުރިއަށް އޮތް ކައުންސިލް އިންތިޚާބުގައި ސަރުކާރަށް ނޫނެކޭ ބުނުމުގެ އިތުރުން މަޖިލިސް އިންތިޚާބާއި ރިޔާސީ އިންތިޚާބު އެއްކޮށްލުމަށް ނޫނެކޭ ބުނުން ވަރަށް މުހިންމު ކަމަށެވެ. ނޫން ނަމަ ރައްޔިތުންގެ ބާރުވެރިކަން އެއްކޮށް ގެއްލިގެން ހިނގައިދާނެ ކަމަށް އޭނާ ވިދާޅުވި އެވެ.
މީގެ އިތުރުން އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން ވިދާޅުވީ ލާމަރުކަޒީ ނިޒާމަކީ އެމްޑީޕީ އިން ގެނައި އެމްޑީޕީގެ ނިޒާމެއް ކަމަށެވެ. އަދި އެމްޑީޕީ ނޫން ބަޔަކަށް އެ ނިޒާމުގެ ބާރު ލިބޭ ކޮންމެ ފަހަރަކު ނިޒާމް އިތުރަށް ހަލާކުކޮށްލާ ކަމަށް އޭނާ ވަނީ ވިދާޅުވެފަ އެވެ. ކުރިއަށް އޮތް ކައުންސިލް އިންތިޚާބުގައި އެމްޑީޕީ އަށް ވޯޓު ދޭން ޖެހެނީ އެ ނިޒާމުގެ ބާރުވެރިކަން ދަމަހައްޓަން ކަމަށް އޭނާ ވަނީ ވިދާޅުވެފަ އެވެ.