ތޫނު ހަތިޔާރަކުން ފުލުހަކަށް ހަމަލާދިން މައްސަލައެއްގައި ހައްޔަރު ކުރި މީހެއް ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރު ކޮށްފި އެވެ.
މި މައްސަލައިގައި ހައްޔަރު ކޮށް ޝަރީއަތް ނިމެންދެން ބަންދު ކޮށްފައިވަނީ ހދ. ނޮޅިވަރަންފަރު، ނޫރު، އަލީ ޝަހީމް (27އ) އެވެ. ފުލުހުން އޭނާއަށް ކުރަނީ ތޫނު ހަތިޔާރުން މާރާމާރީ ހިންގުމުގެ ކުށުގެ ތުހުމަތެވެ.
މި މައްސަލައިގައި ހައްޔަރު ކުރި ޝަހީމް ގެ ބަންދާ މެދު ގޮތެއް ނިންމުމަށް ކުރިިމިނަލް ކޯޓަށް އޭނާ ހާޒިރު ކޮށްފައި ވަނީ ބުރާސްފަތި ދުވަހުގަ އެވެ. ކުރިމިނަލް ކޯޓުން ވަނީ އޭނާ ޝަރީއަތް ނިމެންދެން ބަންދުކުރަން އަމުރުކޮށްފަ އެވެ.
ކޯޓު އަމުރުގައި ބުނީ ކުރިމިނަލް ކޯޓުން އެގޮތަށް އަމުރުކުރީ އަލީ ޝަހީމުގެ މައްޗަށް ތުހުމަތުކޮށްފައިވާ ކުށް އޭނާ ކުރިކަމަށް ތުހުމަތުވާ މިންވަރަށް ފުލުހުން ހެކި ހުށަހަޅާފައިވާތީ ކަމަށެވެ. އެ ހެކިތަކަކީ ސީނަށް ދިޔަ ފުލުހުންގެ ބަޔާނާއި، އަނިޔާ ލިބުނު މީހާގެ ބަޔާނުގެ އިތުރުން ފޮޓޯތަކާއި ވީޑިއޯތައް ކަމަށް ކްރިމިނަލް ކޯޓުގެ އަމުރުގައި ވެ އެވެ.
އަލީ ޝަހީމް ހަމަލާދީފައި ވަނީ ފުލުހަކަށް ކަން ކޯޓު އަމުރުގައި ފާހަގަކޮށްފައި ވެ އެވެ.
ކޯޓު އަމުރުގައި އިތުރަށް ބުނެފައި ވަނީ ޝަހީމް ގެ ފަރާތުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށެވެ. އެހެންވެ އޭނާ ބަންދުގައި ބަހައްޓަން ޖެހޭ ކަމަށާ ގޭންގު ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން ވެސް އޭނާ ބަންދުގައި ބަހައްޓަން ޖެހޭ ކަމަށެވެ.