ކުރިއަށް އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ކެމްޕޭނަށް އެމްޑިޕީގެ ރައީސް އަބްދުﷲ ޝާހިދު ހއ. ބާރަށަށް ޒިޔާރަތް ކުރެއްވުމުން އެރަށުގެ ރައްޔިތުން ހޫނު މަރުހަބާއެއް ކިޔައިފި އެވެ.
ހުކުރު ދުވަހު މެންދުރު އެމްޑީޕީގެ ކެމްޕެއިން ޓީމު ބާރަށަށް ވަޑައިގަތުމުން އެރަށުގެ ގިނަ އަދަދެއްގެ ރައްޔިތުން ނިކުމެ ޓީމަށް ހޫނު މަރުހަބާއެއް ވަނީ ކިޔައިފަ އެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގެ ކެމްޕެއިންގެ ތެރެއިން ހުކުރު ދުވަހު ހއ އަތޮޅަށް ކުރާ މިދަތުރުގައި އެމްޑީޕީގެ ރައީސް އަބްދުﷲ ޝާހިދު އާއީ ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ އަދި ރައްޔިތުން މަޖިލީހުގެ ކުރީގެ މެންބަރު އަހުމަދު އަބްދުﷲ ގެ އިތުރުން އެމްޑީޕީގެ ބައެއް އާންމު މެންބަރުން ވެސް ވަނީ ބައިވެރިވެ ވަޑައިގަންނަވާފަ އެވެ.
އެމްޑީޕީގެ ކެމްޕެއިން ޓީމުން ބާރަށް ކުރެއްވި މި ޒިޔާރަތުގައި ކެނޑިޑޭޓުންނާއި ވަނީ ބައްދަލުކުރައްވައިފަ އެވެ. މި ބައްދަލުވުމުގައި ވާހަކަފުޅު ދައްކަވަމުން އެމްޑީޕީގެ ރައީސް އަބްދުﷲ ޝާހިދު ވިދާޅުވީ، މިސަރުކާރުން މިރަށްރަށް ވަރަށް ބޮޑަށް ބާކީ ކޮށްލާފައިވާ ކަމަށާއި، މި ހާލަތު ބަދަލުކުރެވޭނެ ހަމައެކަނި ޕާޓީ އަކީ އެމްޑީޕީ ކަމަށެވެ. އަދި ކޮންމެ އަހަރަކުވެސް ބިލިއަނުން ބަޖެޓު ފާސް ކުރާއިރު ރަށްރަށުގެ ތަރައްގީއަށް އެއްވެސް ކަމެއް ނުކުރެވޭކަން ޝާހިދު ފާހަގަކުރެއްވި އެވެ.
މީގެ އިތުރުން ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނުމަށް ވެސް ޝަހިދު ވަނީ ގޮވާލައްވާފަ އެވެ.