ރައީސް ޑރ.މުހައްމަދު މުއިއްޒަށް ވޯޓު ލިބެނީ ރިޝްވަތު ދީގެން ކަމަށާއި، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބާއްވަން މިސަރުކާރުން ބޭނުންވަނީ އެމަނިކުފާނުގެ އަތުން ދާ ހަރަދު ބޮޑުވާތީ ކަަމަށް ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕަރސަން ފައްޔާޒު އިސްމާއިލް ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އެމްޑީޕީން ބޭއްވި ގައުމީ މަޖިލީހުގެ ބައްދަލުވުމުގައި ފައްޔާޒު ވިދާޅުވީ، ރާއްޖެއަށް ގެނެސްފައިވާ ފެހި ގާނޫނު އަސާސީން ހެޔޮ ބަދަލުތަކެއް ގައުމަށް އައިސްފައިވާ ކަމަށާއި، ނަމަވެސް ޕީޕީއެމް/ޕީއެންސީ ފިކުރަށް ވެރިކަން ލިބޭ ކޮންމެ ފަހަރަކު ގާނޫނު އަސާސީއަށް ބަދަލުތަކެއް ގެންނަމުންދާ ކަމަށެވެ. އެހެންކަމުން ގާނޫނު އަސާސީގައި ބަދަލުކުރަން ޖެހޭ އަދި ރަނގަޅު ކުރަންޖެހޭ ކަންތައްތަކެއް އެބަހުރި ކަމަށް އޭނާ ވިދާޅުވި އެވެ.
ފައްޔާޒު ވިދާޅުވީ ސްޓޭބަލް ޑިމޮކްރަސީއެއް ހިފެހެއްޓުމަށް މަސައްކަތް ކުރަން ޖެހޭ ކަމަށާއި، ތިން ބާރު ސާފުކޮށް ވަކިވެ، އެއްބާރު އަނެއް ބާރުގެ މައްޗަށް ފާރަވެރިވުމަށް އޮތް މަގު ފަހިކޮށްދޭން ޖެހޭ ކަމަށެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް ކުރަމުންދާ މަސައްކަތްތަކަށް އިޝާރާތް ކުރައްވައި ފައްޔާޒު ވިދާޅުވީ އެކަމުގެ ސަބަބުން ހަރަދު ކުޑަ ވާނެ ކަމަށެވެ. ނަމަވެސް ސަރުކާރުގެ ހެޔޮ ނިޔަތަކީ ހަރަދު ކުޑަ ކުރުން ނޫން ކަމަށާއި، މިހާރު މިއިންތިޚާބު ބޭއްވުމަށް މަސައްކަތް ކުރާ ގޮތް ރަނގަޅު ނޫން ކަމަށެވެ. އަދި މިކަމަށް ރައްޔިތުންގެ މަޖިލީހުގައި ވެސް ވާހަކަ ދެއްކުމުގެ ފުރުސަތު ދޭން ޖެހޭ ކަމަށާއި، ރައްޔިތުން ހޭލުންތެރި ކުރުވަން ޖެހޭ ކަމަށް އޭނާ ވިދާޅުވި އެވެ.
ފައްޔާޒު ވިދާޅުވީ ހަރަދު ކުޑަކުރުމުގެ ވާހަކަ މިސަރުކާރުން ދައްކަމުންދާއިރު، ކޮންމެ އީދަކާ ދިމާކޮށް ބޮކި ދިއްލުމަށް 50 މިލިއަން ރުފިޔާ ހަރަދު ކުރާ ކަމަށާއި، ޑްރޯން ޝޯތަކަށް މިލިއަނުން ހަރަދު ކުރާ ކަމަށެވެ.
މީގެ އިތުރުން ފައްޔާޒު ވިދާޅުވީ، އިންތިޚާބު ވަކިން ބާއްވައިގެން ހަރަދު ބޮޑުވެގެން އުޅޭ ރައްޔިތަކާ ދިމާނުވާ ކަމަށެވެ. ނަމަވެސް މިހާރުގެ ހާލަތަށް ބަލާއިރު، ރައީސް މުއިއްޒަށް ވޯޓު ލިބެނީ ރިޝްވަތު ދީގެން ކަމަށާއި، އެމަނިކުފާނުގެ އަތުން ދާ ހަރަދު ވަރަށް ބޮޑުވާ ކަމަށެވެ.
އަޅުގަނޑު ގަބޫލުކުރާ ގޮތުގައި ހަރަދު ބޮޑުވެގެން އުޅެނީ ރައީސް މުއިއްޒަށް. ރައީސް މުއިއްޒަށް ވޯޓެއް މިލިބެނީ ދިވެހި ރައްޔިތުންނަށް ރިޝްވަތު ދީގެން ވޯޓު ގަނެގެން. އެހެންވީމަ ދެ އިންތިޚާބު ބާއްވާފިއްޔާ ރައީސް މުއިއްޒު އެބަ ހޭދަ ކުރައްވަން ޖެހޭ ކޮންމެ އިންތިޚާބަށް ވަކިން ފައިސާ. ދެ އިންތިޚާބު އެއްކޮށްލީމަ ރައީސް މުއިއްޒު ހަރަދުކުރަންވާ އަދަދު މަދުވޭ. އެކަމަކު ރައްޔިތުންނަށް ލިބޭ އެއްޗެއް އެބަ ގެއްލޭ. އެހެންވީމަ އަޅުގަނޑު ދަންނަވާނީ އަޅުގަނޑުމެންނަށް މި ދިވެހިރާއްޖޭގެ މި ޑިމޮކްރަސީގެ މި ޑިމޮކްރަޓިކް ނިޒާމު ހިފެހެއްޓުމަށްޓަކައި އެއްގޮތަކަށް ވެސް ކުރަން ފެންނަ ކަމެއް ނޫން މިހާރު މިކުރާ ގޮތަށް. ބަދަލުތަކެއް ގެނެވިދާނެ. މިއަށްވުރެ ފުޅާކޮށް މަޝްވަރާކޮށް އަސްލު މައްސަލައަށް ހައްލެއް ހޯދާ ކަަމަށްވާނަމަ އެހެން ބައިވަރު ގޮތްތައް އެބަހުރި. މިއީ މިހާރު އޮތް މައްސަލައަށް ހައްލެއް ލިބުމަށްވުރެ މައްސަލަ ގޯސްވެގެންދާ ގޮތަކަށް އޮތީ.ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއާޕަރސަން ފައްޔާޒު އިސްމާއިލް
ފައްޔާޒު ވިދާޅުވީ، މި ސަރުކާރުން ކުއްލި ކުއްލިއަކަށް ގާނޫނު އަސާސީއަށް ބަދަލުތައް ގެންނަމުންދާތީ ކަންބޮޑުވާ ކަމަށާއި، މިއީ ހުދުމުހުތާރު ވެރިކަމެއް ރާއްޖޭގައި ގާއިމްކޮށް ހިފެހެއްޓުމަށް ކުރަމުންދާ މަސައްކަތް ކަމަށެވެ. އަދި ސަރުކާރުން ގެންނަން އުޅޭ ރެފަރެންޑަމް ހުރިހާ ރައްޔިތުން ނޫނެކޭ ބުނުމަށް ފައްޔާޒު ގޮވާލެއްވި އެވެ.