ރައީސް ޑރ.މުހައްމަދު މުއިއްޒުގެ ސަރުކާރުގައި ރައްޔިތުންނަށް ދަތިވެ، މިއަދު ބޭހެއް، ގޭހެއް އަދި ލޭ ވެސް ނުލިބޭ ކަމަށް ރައްޔިތުން މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އެމްޑީޕީން ބޭއްވި ގައުމީ މަޖިލީހުގެ ބައްދަލުވުމުގައި މެންބަރު ނާޒިލް ވަނީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ސަރުކާރުން ކުރަމުންދާ މަސައްކަތްތަކަށް ވަރަށް ބޮޑަށް ފާޑު ވިދާޅުވެފަ އެވެ. އަދި މިކަމުގެ ސަބަބުން ގާނޫނަށް ސަރުކާރުގެ ސުޕަ މެޖޯރިޓީ އޮތް ރައްޔިތުންގެ މަޖިލީހުން ބަދަލުތައް ގެންނާނެ ކަމަށާއި، އެކަމުގެ ސަބަބުން ރައްޔިތުންނަށް ގެއްލުންވާނެ ކަމަށް މެންބަރު ނާޒިލް ވިދާޅުވި އެވެ.
ކުރިއަށް އޮތް ލޯކަލް ކައުންސިލް އިންތިޚާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިޚާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނަންޖެހޭކަން ފާހަގަކުރައްވައި މެންބަރު ނާޒިލް ވިދާޅުވީ މިހާތަނަށް ރައީސް މުއިއްޒު ދައްކަވާފައިވާ ހުރިހާ ވާހަކަތަކެއް ރައްޔިތުންނަށް އޮޅުވާލާފައިވާ ކަމަށް ރައްޔިތުން ގަބޫލުކުރާ ކަމަށެވެ. 2023ގެ ނޮވެންބަރު 17 ގައި ރައީސް މުއިއްޒު މިދައުލަތާ ހަވާލުވިފަހުން މިހާތަނަށް ރައްޔިތަކަށް ކަމެއް ކޮށްދެވުނު ކަމަކަށް ރައްޔިތުން ގަބޫލު ނުކުރާ ކަމަށް މެންބަރު ނާޒިލް ވިދާޅުވި އެވެ. އަދި ވިދާޅުވީ ރައްޔިތުންނަށް ދަތިވެ، މިއަދު ބޭހެއް، ގޭހެއް އަދި ލޭ ވެސް ނުލިބޭ ހާލަތަށް ގައުމު ވެއްޓިފައިވާ ކަމަށެވެ.
އެއީ އާސަންދަ ކަމުގައި ވިޔަސް ވެސް ބޭސް ގުޅައެއް ކަމުގައި ވިޔަސް އަޅުގަނޑުމެން ރަށްރަށަށް ދިޔާމަ އެ ބުނޭ ބޭހެއް ނުލިބޭ ގޭހެއް ނުލިބޭ. ލެއެއް ވެސް ނުލިބޭ. މިއީ ހާލަތު. 52 ބިލިއަން 2024 ގައި 59 ބިލިއަން 2025، 2026 ގައި 64 ބިލިއަން ރުފިޔާ ފާސް ކުރެވިއްޖެ. ރައްޔިތަކަށް ކޮށްދެވުނީ ކޮންކަމެއްތޯ މިފައިސާއިން. ރައްޔިތުންނަށް ހަރަދު ކުޑަކުރުމުގެ ގޮތުން ދެ އިންތިޚާބު އެއްކޮށްލައިގެން މިކުރާ ކަންތަކުން ހަމަ ބޮޑުތަނުން އޮޅުވާލައި ރައްޔިތުންނާ ހިސާބަށް ނުގޮސް ކަންތައްތައް ނިންމަން މިސަރުކާރުން ބޮޑުކޮށް އުޅޭކަން އަޅުގަނޑަށް ފާހަގަކުރެވޭ. އެހެންވީމަ ރައްޔިތުން އެބަ ޖެހޭ ސަރުކާރުން މިކުރާ ކަންތައްތަކަށް ނޯ އޭ ބުނަން.ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
މެންބަރު ނާޒިލް ވިދާޅުވީ ރައީސް މުއިއްޒުގެ ސަރުކާރުން ގައުމު ހިންގަން ބޭނުންވަނީ ރައްޔިތުންގެ ގާތަށް ނުގޮސް، ރައްޔިތުން އުދާސްތަކަށް ބެލުމެއް ނެތި ކަމަށެވެ. އަދި ކުރިއަށް އޮތްތަނުގައި ހުރިހާ ކަމެއް ނިންމަމުން ދާނީ އޮފީސް ތެރެއިން ކަމަށާއި، މިކަމަށް ރައްޔިތުން ހޭލުންތެރިވާން ޖެހޭ ކަމަށް މެންބަރު ނާޒިލް ވިދާޅުވި އެވެ.