ދެ އިންތިޚާބު އެއްކޮށްލުމަކީ ނިޒާމީ ގޮތުން ރޭވިގެން ރައްޔިތުންގެ ބާރުތައް ހަނިކުރުމަށް ކުރާ ކަމެއް ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެ އެވެ.
ޝާހިދު އެފަދައިން ވިދާޅުވީ ބުރާސްފަތި ދުވަހުގެ ރޭ ބޭއްވި އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަދައްކަވަމުންނެވެ.
ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ފެންނަ ނުފެންނަ ވޯޓާ ގުޅޭގޮތުން އެމްޑީޕީގެ ގައުމީ މަޖިލީހުގައި ކުރި ބަހުސްގައި ވާހަކަދައްކަވަމުން، ޝާހިދު ވިދާޅުވީ މިއީ ހީލަތްތެރި ރޭވުމެއްގެ ތެރެއިން ކުރާ ކަމަށެވެ.
މިއީ ނިޒާމީ ގޮތުން ވަރަށް ބޮޑަށް އޮޅުވާލުމަށް ހިންގާ އަމަލެއް ކަަމަށް ޝާހިދު ވަނީ ވިދާޅުވެފަ އެވެ. ޝާހިދު ވިދާޅުވީ އިންތިޚާބުތައް އެއްކޮށްލުމަށް ރިފަރެންޑަމް އެއް ބާއްވަން ރައްޔިތުންގެ މަޖިލީހުން ފާސްކުރީ ގަދަކަމުން މަޖިލީހުން އިދިކޮޅު މެމްބަރުން ނެރެ، އުކާލުމަށް ފަހުގަ އެވެ. އެ މަރުހަލާ ކުރިއަށް ދިޔަ ގޮތަށް އެކަނި ބެލިއަސް މިއީ ރަނގަޅު ނިޔަތެއްގައި ކުރާ ކަމެއް ނޫންކަން ހާމަވާނެ ކަމަށް ޝާހިދު ވިދާޅުވި އެވެ.
"ރައްޔިތުންގެ ފަރާތުން ބަސް ބުނުމުގެ ދެ ފުރުސަތެއް އެއް ފުރުސަތަކަށް އެއްކޮށްލަނީ. 5 އަހަރު ތެރޭގައި ބަހެއް ބުނުމަށް ފަހު ރައްޔިތުން ތިބެން ޖެހޭނީ އަނގަ ބަންދުކޮށްގެން." ޝާހިދު ވިދާޅުވި އެވެ.
ޝާހިދު އިތުރަށް ވިދާޅުވެފައި ވަނީ އެމްޑީޕީ އަކީ އަބަދުވެސް ރައްޔިތުންގެ ހައްގުގައި ވަކާލާތު ކުރާ ރައްޔިތުންނަށް ބަސް ބުނަން ފުރުސަތު ހޯދާދޭނެ ޕާޓީ އެއް ކަަމަށެވެ. އެހެންކަމުން ރައްޔިތުންނަށް ބަސްބުނަން ލިބޭ ފުރުސަތުތައް ހަނިކުރުމަކީ އެ ޕާޓީގެ ވިސްނުމެއް ނޫން ކަމަށް ޝާހިދު ވަނީ ވިދާޅުވެފަ އެވެ. އެމްޑީޕީ އަކީ ޑިމޮކްރަސީ އާއި ހެޔޮ ވެރިކަމަށް ތާއީދު ކުރާ ޕާޓީ އެއް ކަމަށް ވެސް ޝާހިދު ވަނީ ވިދާޅުވެފަ އެވެ.