ރަމަޟާން މަހު ފަހު 10 އެއްގައި މަސައްކަތް ކުރާ ސްޓެލްކޯގެ މުވައްޒަފުންނަށް އޯޓީ ދޭ ގޮތާއި މެދު ހިތްހަމަނުޖެހުން ފާޅުކޮށްފި އެވެ.
ރާއްޖެ ޓީވީ އަށް މައުލޫމާތު ދިން ފަރާތްތަކުން ބުނީ ރަމަޟާން މަހު ފަހު 10އެއްގައި ސަރުކާރު ބަންދު ކުރި ނަމަވެސް ސްޓެލްކޯގެ ބައެއް މުވައްޒަފުން އާންމުކޮށް ވަޒީފާ އަދާ ކުރާ ފަދައިން ޝިފްޓް ޑިއުޓީ އަދާކުރަން ޖެހޭ ކަމަށެވެ. އެހެންކަމުން ފަހު 10އެއްގައި ޝިފްޓް ޑިއުޓީ އަދާކުރާ މުވައްޒަފުން ވަޒީފާ އަށް ނުކުންނަ ވަގުތު ގުނަންވާނީ، މުޅިން ވެސް އިތުރު ވަގުތުގެ ގޮތުގައި ކަމަށް މުވައްޒަފުން ބުނެ އެވެ. ނަމަވެސް މިހާރު އޮތް ގޮތުން މުވައްޒަފުންނަށް އޯޓީ ދޭނީ، ފަހު 10 އެއް ފިޔަވާ، މުވައްޒަފުން އާއްމުކޮށް ރޯދަ މަހު ވަޒީފާފާ އަދާ ކުރާ ވަގުތުގެ އިތުރަށް މުވައްޒަފު ވަޒީފާގައި ހޭދަކުރާ ވަގުތުގައި ކަމަށް އަންގާފައިވާ ކަމަށް މި ނޫހާއި ވާހަކަދެއްކި މުވައްޒަފުން ވަނީ ބުނެފަ އެވެ.
މިއީ ޝިފްޓް ޑިއުޓީ އަދާ ކުރާ މުވައްޒަފުންނާއި އެހެން މުވައްޒަފުންނާއި ދެމެދު ތަފާތުކުރުން ކަމަށް މުވައްޒަފުން ވަނީ ބުނެފަ އެވެ. އަދި ފަހު 10އެއްގައި ސަރުކާރު ބަންދު ކަަމަށް ނިންމުމަށް ފަހު، ޚިދުމަތް ދިނުމަށް ނުކުންނަ މުވައްޒަފުންނަށް އެ މުވައްޒަފުން ޑިއުޓީ އަށް ނުކުންނަ ވަގުތު ފުރިހަމައަށް އޯޓީ ދޭން ވާނެ ކަމަށް ގަބޫލުކުރާ ކަމަށް އެ މުވައްޒަފުން ދަނީ ބުނަމުންނެވެ.
ސްޓެލްކޯ އިން ވަނީ މުވައްޒަފުންނަށް އޯޓީ ދިނުމުގައި އަމަލު ކުރަނީ ކުރިން ވެސް ރަމަޟާން މަހުގައި އަމަލުކުރި އުސޫލުން ކަަމަށާއި މުވައްޒަފުންގެ މެދުގައި ތަފާތުކުރުމެއް ނުގެންގުޅޭ ކަމަށް ބުނެފަ އެވެ.ރޯދަމަހުގެ ފަހު 10 ގައި މަސައްކަތައް ނުކުންނަ ސަރުކާރު މުވައްޒަފުންނަށް ހާޒިރީ އެލެވެންސްއެއް ދޭނެ ކަމަށް ކުރިން ސަރުކާރުން ވަނީ ބުނެފަ އެވެ.
ރަމަޟާން މަހުގެ ފަހު 10ގައި ސަރުކާރު އޮފީސްތައް ބަންދު ވި ނަމަވެސް، ސަރުކާރު މުއައްސަސާތަކުންނާއި އޮފީސްތަކުން ރައްޔިތުންނަށް ކޮންމެހެން ދޭންޖެހޭ ހިދުމަތްތައް، އެ މުއައްސަސާތަކުން ކަނޑައަޅާ ގޮތެއްގެ މަތިން ދިނުމުގެ އިންތިޒާމު ހަމަޖައްސާނެ ކަމަށް ވެސް ސަރުކާރުން ވަނީ ބުނެފަ އެވެ.