ނ. ކެނދިކުޅުދޫ ވޭސްތް މެނޭޖްމަންޓް ސެންޓަރުގެ އެކްސްޓެންޝަން ޕްރޮޖެކްޓުގައި އިނީ ގުދަނަކާއި އޮފީސް އިމާރާތުގެ އިތުރުން ފާހާނާ އެއް ކަމަށާއި، މިއީ ބޮޑު ޕްރޮޖެކްޓެއް ކަމަށް ދައްކަން ސަރުކާރުން މަސައްކަތް ކުރި ކަމަށް ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވެއްޖެ އެވެ.
ނ. ކެނދިކުޅުދޫ ވޭސްޓް މެނޭޖްމަންޓް ސެންޓަރަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އެރަށުގައި ހަދާފައިވާ ތަނެކެވެ. އެ ތަނުގައި މި ސަރުކާރުން ބޮޑު ޕްރޮޖެކްޓެއް ފަށާ ވާހަކަ އޮތީ ދައްކާފަ އެވެ. މިކަމާއި ގުޅިގެން ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވީ ކުނިކޮށި އެކްސްޓެންޝަން ކިޔާ ޕްރޮޖެކްޓެއް އެބައިން ކަމަށެވެ. އަދި އެކްސްޓެންޝަން ޕްރޮޖެކްޓެއް ކަމަށްވުމުން އެއީ ބޮޑު ޕްރޮޖެކްޓެއް ކަމަށް ބެލެވުނު ކަމަށާއި، މަސައްކަތް ހަވާލުކޮށްފައި އޮތީ ފެނަކައާއި ކަމަށެވެ.
ރައޫފް ވިދާޅުވީ ކުރެހުމުގައި އޮތީ ވަރަށް ބޮޑުކޮށް ކުރިއަށް ގެންދަން ކަމަށާއި، އެ ކުރެހުމުގައި އިނީ މިހާރު ވެސް އިން ވޭސްޓް މެނޭޖްމަންޓް ސެންޓަރުހާ ބޮޑު ތަނެއް ކަމަށެވެ.
ބިން ހަމަކުރަން ވެގެން ބިންވެސް އޮތީ ދޫކޮށްފައި. ދެން އެކަމަކު ބިން ހަމަނުވެގެން ބަލާލި އިރު މި އިންނަނީ 24 ފޫޓް 30 ފޫޓުގެ ކުނި ބެހެއްޓޭ ތަނަކައި، ފާހާނާ އަދި އޮފީސް އިމާރާތެއް. މި ދެތަން ލާފައި ބޮޑު އެކްސްޓެންޝަން ޕްރޮޖެކްޓެއް ގޮތަށް މި އިންނަނީ. ދެން އެބޭފުޅުންވެސް ސިއްސައިގެން ދިޔައީ ކުރެހުން ފެނުނީމާ. އަނެއްހެން 4 ވަރަކަށް މީހުން ލައިގެން ކުރެވޭ ވަރުގެ މަސައްކަތެއް މިއީ. ދެން ބޮޑު ތަނެއްގެ ގޮތުގައި ކުރެހުމުން ފެންނަނީ.ކެނދިކުޅުދޫ ކައުންސިލްގެ ރައީސް މުހައްމަދު ރައޫފް
ރައޫފް ވިދާޅުވީ ވޭސްޓް މެނޭޖްމަންޓް ސެންޓަރު ތެރޭގައި އިތުރު ގުދަނެއް ހެދުމަށްފަހު އެއީ ބޮޑު ޕްރޮޖެކްޓެއް ކަމަށް ދައްކަން މަސައްކަތް ކޮށްފައިވާ ކަމަށެވެ. އަދި އެ މަސައްކަތް ކުރުމަށް ފެނަކަ އިން 15 ވަރަކަށް މީހުން ނަގަން އުޅުނު ކަމަށާއި، ނަމަވެސް އެންމެފަހުން ކުރެހުން ފެނުމުން އެ ޕްރޮޖެކްޓުގެ ބޮޑުވަރު އެނގިގެން ގޮސްފައިވާ ކަމަށެވެ.
ރައޫފު ވިދާޅުވީ ކުނި މެނޭޖްކުރުމުގެ ކަންކަން ކައުންސިލުން ކުރަމުން އަންނަ ކަމަށާއި، ނަމަވެސް ވަންދޫގައި ހުންނަ ސަރަހައްދީ ވޭސްޓް މެނޭޖްމަންޓް ސެންޓަރާއި އެކު ކުނި ގެންދަން ސޮއިކުރިތާ އަހަރެއް ވެގެން ދިޔަ އިރު ވެސް އަދިވެސް ކުނި ބޭރު ކުރެވިފައި ނުވާ ކަމަށެވެ.