އައްޑޫ ސިޓީ ހިތަދޫގައި "ސްކޫޕު" ގެ ނަމުގައި ހަރަކާތްތެރިވާ ގްރޫޕަކީ އިންތިޒާމުވެފައިވާ ކުށްކުރާ ގްރޫޕެއް ނުވަތަ ގޭންގެއްގެ ގޮތުގައި ކަނޑައަޅައިދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އޮފީހުން ހައިކޯޓަށް ހުށަހެޅި މައްސަލައިގެ އަޑުއެހުންތައް އަންނަ އާދިއްތަ ދުވަހު ފެށުމަށް ތާވަލުކޮށްފި އެވެ.
ޕީޖީ އޮފީހުން މި މައްސަލަ ހައިކޯޓަށް ހުށަހަޅާފައިވަނީ މިއަހަރުގެ ޖެނުއަރީ މަހުގެ 15 ވަނަ ދުވަހު އެވެ. މި މައްސަލައިގެ ފުރަތަމަ އަޑުއެހުން އަންނަ އާދިއްތަ ދުވަހުގެ މެންދުރު 12:50 އަށް ތާވަލުކޮށްފައިވާކަން ޕީޖީ އޮފީހުގެ އޮފިޝަލަކު ވަނީ ރާއްޖެ އެމްވީ އަށްވަނީ ކަށަވަރުކޮށްދެއްވާފަ އެވެ.
މި މައްސަލައަކީ ފުލުހުން ހުށަހެޅި ހުށަހެޅުމާއި ހެކިތައް ދިރާސާކުރުމަށްފަހު ޕީޖީ އޮފީހުން ކޯޓަށް ހުށަހެޅި މައްސަލައެކެވެ. ޕީޖީ އޮފީހުން ވިދާޅުވީ "ސްކޫޕު" ގްރޫޕަކީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން "އިންތިޒާމުވެފައިވާ ކުށްކުރާ ގްރޫޕެއް" ގައި ހުންނަންޖެހޭ ޝަރުތުތައް ފުރިހަމަވާ ގްރޫޕެއް ކަމަށެވެ. އަދި އެ ގްރޫޕަކީ މިހާރުވެސް ކުށްކުރުމުގައި އަމަލީގޮތުން ހަރަކާތްތެރިވާ ބައެއް ކަމަށް ފެންނަ ކަމަށްވެސް ޕީޖީން ވިދާޅުވި އެވެ.
ޕީޖީ އޮފީހުން ހައިކޯޓުގައި އެދިފައިވަނީ "ސްކޫޕު"، "ސްކޫޕު ކަންމަތި" ނުވަތަ "SKP" ގެ ނަމުގައި ހަރަކާތްތެރިވާ މި ގްރޫޕަކީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނުގެ 63 ވަނަ މާއްދާގައި ބަޔާންކޮށްފައިވާ ޝަރުތުތައް ފުރިހަމަވާ ގޭންގެއް ކަމަށް ކަނޑައަޅައިދިނުމަށެވެ.
މީގެ އިތުރުން، އެ ގްރޫޕަށް ނިސްބަތްވާ މީހުންގެ ގޮތުގައި ފާހަގަކުރެވިފައިވާ 9 މީހަކީ އެ ގްރޫޕްގެ މެންބަރުން ކަމަށް ކަނޑައަޅައިދިނުމަށް ވެސް ވަނީ އެދިފަ އެވެ. މިއީ ގޭންގުތަކާ ބެހޭ އާ ގާނޫނަށް އަމަލުކުރަން ފެށި ފަހުން، ވަކި ގްރޫޕަކީ ގޭންގެއް ކަމަށް ކަނޑައަޅައިދިނުމަށް އެދި ފުލުހުން ޕީޖީ އޮފީހަށް ހުށަހެޅި ދެވަނަ މައްސަލަ އެވެ.
ޕީޖީ އޮފީހުން ހާމަކުރި ގޮތުގައި، މީގެ ކުރިން ހުށަހެޅި ފުރަތަމަ މައްސަލަ ދިރާސާކުރިއިރު، ގޭންގެއް ކަމަށް ކަނޑައެޅުމަށް ގާނޫނުގައި ބަޔާންކުރާ ޝަރުތުތައް ސާބިތުކޮށްދެވޭ މިންވަރަށް ތަހުގީގު ފުރިހަމަވެފައި ނުވާތީ، އެ މައްސަލަ އިތުރަށް ފުރިހަމަކުރުމަށްޓަކައި އަނބުރާ ފުލުހުންނަށް ވަނީ ފޮނުވާލާފަ އެވެ.
އައްޑޫ ސިޓީގައި ހަރަކާތްތެރިވާ މި ގްރޫޕަކީ ގޭންގެއް ކަމަށް ކޯޓުން ކަނޑައަޅައިފިނަމަ، މިއީ ރާއްޖޭގައި ގާނޫނީ ގޮތުން ގޭންގެއްގެ ގޮތުގައި ކަނޑައެޅޭ ފުރަތަމަ ގްރޫޕަށް ވުމުގެ ފުރުސަތު އެބައޮތެވެ.