މިނިސްޓްރީން ދޭންޖެހޭ މައުލޫމަތު ނުލިބިގެން ނ.ކެނދިކުޅުދޫ ފެނާ ނަރުދަމާ ނިޒާމާއި ހަވާލުވުމުގެ ލިޔެކިޔުންތަކުގައި ސޮއިނުކުރެވި މަޑުޖެހިފައިވާ ކަމަށް ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވެއްޖެ އެވެ.
ނ. ކެނދިކުޅުދޫ ފެނާ ނަރުދަމާގެ މަސައްކަތަކީ ކުރީ ސަރުކާރު ފެށި މަސައްކަތެކެވެ. އަދި އެ މަސައްކަތުގެ ބޮޑު ބައި އޮތީ ނިންމަލާފަ އެވެ. ނަމަވެސް މިހާތަނަށް އައި އިރު ވެސް ފެނާ ނަރުދަމާގެ އިމާރާތް ރަސްމީކޮށް ހުޅުވާފައި ނުވެ އެވެ. މިކަމާއި ގުޅިގެން ކެނދިކުޅުދޫ ކައުންސިލްގެ ރައީސް މުހައްމަދު ރައޫފް ވިދާޅުވީ ފެނާ ނަރުދަމާގެ ޕްރޮޖެކްޓަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެންމެ ފުރަތަމަ ފެށި ޕްރޮޖެކްޓްތަކުގެ ތެރެއިން ޕްރޮޖެކްޓެއް ކަމަށެވެ.
ރައޫފް ވިދާޅުވީ މަސައްކަތް އެކި ފަހަރުމަތިން މަޑުޖެހުނު ނަމަވެސް ވެރިކަން ބަދަލުވި އިރު ޕްރޮޖެކްޓުގެ 90 އިންސައްތަ މަސައްކަތް އޮތީ އެއްކޮށް ނިންމާލާފައި ކަމަށެވެ. އޭނާ ވިދާޅުވީ މި ވެރިކަން އައި ފަހުން 2 މަސް ދުވަހުގެ ތެރޭގައި މަސައްކަތް ނިންމާނެ ކަމަށް ވައުދުވި ކަމަށެވެ.
ކޮންޓްރެކްޓަރަށް ވަރަށް ގިނަ މައްސަލަތަކެއް ދިމާވި. ފައިސާގެ މައްސަލައާއި އެކިއެކި މައްސަލަތައް ހުރީމާ، ނިންމާފައި ކޮމިޝަން ކޮށް ޕްރޮޖެކްޓުގެ ހިދުމަތް ދޭން ފަށަން މިވަނީ ރެޑީވެފައި. ދެން މިހާރު ޑޮކިއުމެންޓުގައި ސޮއިކުރަން އައިސް، ސޮއިކުރަން ބުނެފައި އެހެންނަމަވެސް ސޮއިނުކުރެވި މަޑު މިކުރަނީ. އަޅުގަނޑުމެންނަށް ނޭނގޭ މި ޕްރޮޖެކްޓުގެ ކިހާ އަދަދެއްގެ ގެއަށް ކަމެއް ކޮޅު ވައްދަންޖެހެނީ. ކިތައް ގެވަޅަށް ކަމެއް ކޮޅު ލާންޖެހެނީ. އެހެންވީމާ އެ މައުލޫމާތު މިނިސްޓްރީން ފޯރުކޯށްދިނީމާ ސޮއިކުރާނަން.ކެނދިކުޅުދޫ ކައުންސިލްގެ ރައީސް މުހައްމަދު ރައޫފް
ރައޫފް ވިދާޅުވީ ފެނާ ނަރުދަމާގެ ޕްރޮޖެކްޓް ފެށިގެން އައި އިރު، ވަކި އަދަދެއްގެ ގެތަކަށް ކަނެކްޝަން ގުޅައިދޭން އޮންނާނެ ކަމަށެވެ. އޭނާ ވިދާޅުވީ މި ޕްރޮޖެކްޓާއި ގުޅިގެން ކައުންސިލާއި އެކި ފަހަރުމަތިން ވާހަކަ ދެކެވި ރައްޔިތުންގެ އެތައް ޝަކުވާއެއް ޕްރޮޖެކްޓުގެ ހިދުމަތް ލިބުން ލަސްވާތީ އައި ކަމަށެވެ.
އަދި ހިދުމަތް ނުލިބި ދިގުލައިގެން ގޮސްފައިވާ އިރު، އެތައް ގެވަޅެއް ދޫކޮށް އެތައް ގެއަކަށް މީހުން އާބާދުވެފައިވާ ކަމަށާއި، ހިދުމަތް ނުލިބި އެތައް ދުވަހެއް ވަމުންދާތީ ރައްޔިތުންގެ ކަންބޮޑުވުން އިންތިހާއަށް އޮތް ކަމަށް ރައޫފު ވިދާޅުވި އެވެ.