ރަމަޟާން މަހާއި ޝައްވާލް މަހުގެ ފުރަތަމަ 7 ދުވަހު ގްރޭޓަރ މާލެ ސަރަހައްދުގައި މުދާ އުފުލުމަށް ބޭނުންކުރާ އުޅަނދުތަކާއި ބަރު އުޅަނދުތައް ދުއްވުން މަނާ ގަޑިތައް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ކަނޑައަޅައިފި އެވެ.
މި ނިންމުމަކީ ކޮންމެ އަހަރެއްގެވެސް ރަމަޟާން މަހު މަގުމަތީގެ ޓްރެފިކް ބާރުބޮޑުވާ ވަގުތުތަކުގައި އާންމުންނަށް ލުއިފަސޭހަ ކޮށްދިނުމުގެ ގޮތުން ނިންމާފައިވާ ނިންމުމެކެވެ.
ޓްރާންސްޕޯޓް މިނިސްޓްރީން އަންގާރަ ދުވަހު ކުރި އިޢުލާނެއްގައި ބުނެފައިވަނީ، ރަމަޟާން މަހުގެ ފުރަތަމަ ދުވަހުން ފެށިގެން އެ މަހުގެ 19 ވަނަ ދުވަހުގެ ނިޔަލަށް، އަދި ޝައްވާލް މަހުގެ ފުރަތަމަ 7 ދުވަހު މުދާ އުފުލުން މަނާ ދެ ވަގުތެއް ކަނޑައަޅާފައިވާ ކަމަށެވެ. އެގޮތުން ހެނދުނު 08:00 އިން 09:30 އަށް އަދި ހަވީރު 4:30 އިން ރޭގަނޑު 08:00 އަށް މުދާ އުފުލާ އުޅަނދުތައް ދުއްވުމަކީ މަނާ ކަމެކެވެ.
މީގެ އިތުރުން ރަމަޟާން މަހުގެ ފަހު 10 ގެ ދުވަސްތަކުގައި ލުއިތަކެއް ދިނުމުގެ ގޮތުން، ރަމަޟާން މަހުގެ 20 ވަނަ ދުވަހުން ފެށިގެން މަސް ނިމެންދެން މުދާ އުފުލުން މަނާވާނީ ހަމައެކަނި ހަވީރު 4:30 އިން ރޭގަނޑު 08:00 އަށް ކަމަށްވެސް އެ މިނިސްޓްރީން ބުނެފައިވެ އެވެ. މި ބަދަލާއެކު ރަމަޟާން މަހުގެ ފަހުކޮޅު ހެނދުނުގެ ވަގުތުތަކުގައި މުދާ އުފުލުމުގެ ފުރުސަތު ވިޔަފާރިވެރިންނަށް ލިބިގެންދާނެ އެވެ.
މި އެންގުމާ ޚިލާފުވާ ފަރާތްތަކާމެދު ހަރުކަށި ފިޔަވަޅު އެޅުމަށްވެސް މިނިސްޓްރީން ވަނީ ނިންމާފަ އެވެ. އެގޮތުން އެއްގަމު ދަތުރުފަތުރުގެ ޤާނޫނުގެ ދަށުން، މި އުސޫލާ ޚިލާފުވާ އުޅަނދުތައް 750 ރުފިޔާއިން ޖޫރިމަނާ ކުރާނެ ކަމަށް ޓްރާންސްޕޯޓް މިނިސްޓްރީން އިންޒާރު ދީފައިވެ އެވެ.
މިނިސްޓްރީން އިތުރަށް ބުނެފައިވަނީ، މިގޮތަށް ގަޑިތައް ކަނޑައެޅީ ރަމަޟާން މަހަކީ މަގުމަތީގެ ބާރުބޮޑު މަހަކަށްވެފައި، އާންމު ރައްޔިތުންނަށް ދަތުރުފަތުރު ކުރުމުގައި ދިމާވާ ދަތިތައް ކުޑަކުރުމުގެ މަގްސަދުގައި ކަމަށެވެ. އެހެންކަމުން ހުރިހާ ފަރާތްތަކުންވެސް މި އެންގުމަށް އިހުތިރާމްކޮށް، ކަނޑައެޅިފައިވާ ގަޑިތަކުގައި މުދާ އުފުލުމުގެ މަސައްކަތް ނުކުރުމަށް މިނިސްޓްރީން ވަނީ އިލްތިމާސްކޮށްފަ އެވެ.