ތަރޑްޕާޓީ އިންޝުއަރެންސް ލާޒިމް ކޮށްފައިވީ ނަމަވެސް ކޮމްޕްރެހެންސިވް މޮޓޯ އިންޝުއަރެންސް ނިޒާމެއް ނެތުމުގެ ސަބަބުން އުޅަނދަށް ނުވަތަ އުޅަނދު ދުއްވާ މީހާ އަށް ލިބޭ ގެއްލުމަށް ބަދަލު ލިބުމަށް ހުރަސްއެޅޭތީ، އެކަމަށް ހައްލު ހޯދުމަށް އެއްގަމު ދަތުރުފަތުރުގެ ގާނޫނަށް އިދިކޮޅު އެމްޑީޕީ ގެ ފަރާތުން އިސްލާހެއް ހުށަހަޅައިފި އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި ބިލުގެ ފުރަތަމަ ކިޔުުން ވަނީ އިއްވާފަ އެވެ. އެމްޑީޕީގެ ފަރާތުން މި ބިލު ހުށަހަޅުއްވާފައި ވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ.
ބިލު ހުށަހެޅުމުގެ ބޭނުމެއް ކަމަށް ބުނެފައިވަނީ އެއްގަމު ދަތުރުފަތުރުގައި ބޭނުން ކުރާ އުޅަނދުތަކަށް މިހާރު ރާއްޖޭގައި ތަރޑްޕާޓީ އިންޝުއަރެންސް ލާޒިމް ކޮށްފައިވީ ނަމަވެސް ކޮމްޕްރެހެންސިވް މޮޓޯ އިންޝުއަރެންސް ނިޒާމެއް ނެތުމުގެ ސަބަބުން އުޅަނދަށް ނުވަތަ އުޅަނދު ދުއްވާ މީހާ އަށް ލިބޭ ގެއްލުމަށް ބަދަލު ލިބުމަށް ހުރަސްއެޅޭތީ، އެކަމަށް ހައްލު ހޯދުމެވެ.
އެހެންކަމުން މި ބިލު ހުށަހަޅަނީ އެކްސިޑެންޓެއްގެ ސަބަބުން އުޅަނދަށް ނުވަތަ އުޅަނދު ދުއްވާ މީހާ އަށް ލިބޭ ގެއްލުމަށް ބަދަލުލިބޭނެ އުސޫލެއް ގާއިމް ކުރުމަށްޓަކައި ކޮމްޕްރެހެންސިވް މޮޓޯ އިންޝުއަރެންސް ތައާރަފު ކުރުމަށް ކަމަށް ވެސް ބިލުގައި ވެ އެވެ.
މެންބަރު ކުޑޫ ހުށަހެޅުއްވި އިސްލާހުގައި ވަނީ ކޮމްޕްރެހެންސިވް މޮޓޯ އިންޝުއަރެންސް އާ ބެހޭ ގަވައިދެއް ހެދުމަށެވެ. އަދި އެ ގާނޫނަށް އަމަލުކުރަން ފަށާތާ 3 މަސް ދުވަހުގެ ތެރޭގައި މަރުކަޒީ ބޭންކް އެމްއެމްއޭ އިން މި ގަވާއިދު އާންމުކުރަން ވާނެ ކަމަށް ބަޔާންކޮށްފައި ވެ އެވެ.
އިސްލާހުގައި ވަނީ އެއްގަމު އުޅަނދު ދުއްވަން ވާނީ އެ އުޅަނދެއް އެކްސިޑެންޓެއް ވެގެން ގެއްލުން ލިބޭ މީހަކަށް ނުވަތަ ތަނަކަށް ނުވަތަ އެއްޗަކަށް ލިބޭ ގެއްލުމަަށާއި އެކްސިޑެންޓުވީ އުޅަނދަށް ނުވަތަ އުޅަނދު ދުއްވި މީހާއަށް ލިބޭ ގެއްލުމުގެ ބަދަލު ލިބިދިނުމުގެ ގޮތުން ކުރާ، ކޮމްޕްރެހެންސިވް މޮޓޯ އިންޝުއަރެންސް ކުރުމަށް ފަހު ކަމަށެވެ.
ކޮމްޕްރެހެންސިވް މޮޓޯ އިންޝުއަރެންސް ކަމަށް ގާނޫނުގެ ބޭނުމަށް ބުނެފައިވަނީ ފާހަގަ ކޮށްފައިވާ ކަންތައްތަކެއް ހިމަނައިގެން ދޫކުރާ އިންޝުއަރެންސް ޕޮލިސީ ތަކަކަށެވެ.
އޭގެ ތެރޭގައި އެކްސިޑެންޓެއްގެ ސަބަބުން ތިންވަނަ ފަރާތެއް މަރުވުމުން ނުވަތަ ޖިސްމާނީ ހާނިއްކައެއް ވުމުން ނުވަތަ މުދަލަށް ލިބޭ ގެއްލުމަށް ޒިންމާވުމާއި، އަމިއްލަ އުޅަނދަކަށް ލިބޭ ސީދާ ގެއްލުމާއި އުޅަނދު ފުރޮޅައިލުމުން ނުވަތަ އެކްސިޑެންޓެއްގެ އަސަރު ކުރުމުން ލިބޭ ގެއްލުމަށް ޒިންމާވުން ހިމެނެ އެވެ.
އަދި، އަލިފާން ނުވަތަ ވަގަށް ނެގުން ނުވަތަ ގެއްލުން ދިނުން ނުވަތަ ގެއްލުން ދިނުމުގެ ގަސްތުގައި ކުރާ ކަންކަމުގެ ސަބަބުން ލިބޭ ގެއްލުމަށް ޒިންމާވުމާއި، ފެންބޮޑުވުމާއި ތޫފާނާއި އުދައެރުމާއި މޫސުމީ ކާރިސާތައް ފަދަ ގުދުރަތީ ގޮތުން ލިބޭ ގެއްލުމަށް ޒިންމާވުމުގެ އިތުރުން ގާނޫނުގެ ދަށުން ހަދާ ގަވައިދުގެ ބަޔާންކުރާ ހުރިހާ ކަމެއް ހިމެނެ އެވެ.