މާލެއާއި ހުޅުމާލޭގައި ފެރީގެ ޚިދުމަތް ނުދޭ މައްސަލަ ބޮޑު ވެއްޖެ އެވެ.
އިތުބާރު ހުރި ފަރާތަކުން ރާއްޖެއެމްވީ އަށް ކިޔައިދިން ގޮތުގައި ފެރީގެ ޚިދުމަތް ނުލިބޭތާ މިހާރު ހަފްތާއަކަށް ވުރެ ގިނަ ދުވަސްވެފައިވާ ކަމަށާއި، ފެރީ ހަލާކުވެފައިވާ ކަމަށެވެ. އަދި މަރާމަތަށްފަހު ޚިދުމަތް ދެވޭނެ ދުވަހެއް ނޭނގޭ ކަމަށް އޭނާ ބުންޏެވެ.
މި މައްސަލައާ ގުޅިގެން ހޮނިހިރު ދުވަހު ރާއްޖެމްވީން އެމްޓީސީސީއަށް ގުޅުމުން ބުނީ ފެރީ އެބައޮތް ކަމަށާއި، ދަތުރުތައް ކުރިއަށްދާ ކަމަށެވެ. ނަމަވެސް ރާއްޖެއެމްވީން ހުޅުމާލެ ފެރީ ޓާމިނަލްއަށް ގޮސް ފެރީ އޮތްތޯ ބެލުމުން ފެރީ ނެތް ކަމަށާއި، މިއަދުގެ ހުރިހާ ދަތުރެއް ކެންސަލް ކޮށްފައިވާ ކަމަށް ކައުންޓަރުން ބުންޏެވެ.
މާލެ، ހުޅުލެ، އަދި ހުޅުމާލެ ގުޅުވައިދޭ ސިނަމާލެ ބްރިޖާއެކު، މާލެ-ހުޅުމާލެ ފެރީ ޚިދުމަތް ބޭނުންކުރާ މީހުންގެ ނިސްބަތް ވަރަށް ބޮޑު މަދުވެގެން ދިޔަ އެވެ. ނަމަވެސް މަސައްކަތް ކުރާ މީހުންނާއި، ހުޅުމާލެ ބަދަލުވާ އާއިލާތަކުން މުދާ އުފުލުމަށާއި، އެހެނިހެން ކަންކަމުގައި ފެރީގެ ޚިދުމަތް އަދިވެސް ހޯދަ އެވެ. މިދުވަސްވަރަކީ ގެދޮރުވެރިޔާ ފްލެޓުތަކަށް ގިނަ ބަޔަކު ދިރިއުޅުން ބަދަލު ކުރާ ދުވަސްވަރަކަށްވުމާއެކު، ފެރީގެ ޚިދުމަތް ނުލިބޭތީ އެކަމުގެ ޝަކުވާ ގިނަ ބަޔަކު ދަނީ ކުރަމުންނެވެ.