އިދިކޮޅު މޯލްޑިވިއަން ޑިމޮކްރެޓިކް ޕާޓީ، އެމްޑީޕީ ގެ ކެންޑިޑޭޓަށް ތާއީދު ކުރި ވެމްކޯގެ 3 މުވައްޒަފެއްގެ ވަޒީފާ އެހެން ރަށްރަށަށް ބަދަލުކޮށްފި އެވެ.
މި ނޫހަށް ވަނީ މި 3 މީހުން ބަދަލުކުރިކަން އަންގަން ވެމްކޯ އިން އެ މުވައްޒަފުންނަށް ފޮނުވި ޗިޓުތައް ލިބިފަ އެވެ. އެ ތިން ޗިޓުން އެނގޭގޮތުގައި ތިނަދޫގައި ހުންނަ ވެމްކޯ ސައިޓުން އެހެން ރަށަކަށް ބަދަލުކޮށްފައިވާ މުވައްޒަފުންނަކީ ގދ. ތިނަދޫ، ހަވާނާ، އަލީ ނާބިތު މުހައްމަދު އާއި ދ. ތިނަދޫ، މަދޮށިމާގެ، މުހައްމަދު ސޯލިހު އަހްމަދު އާއި ގދ. ތިނަދޫ، މާހްމާ ވިލާ، މުހައްމަދު ނާއިފް އެވެ.
މި ތިން މުވައްޒަފުންނަކީ ތިނަދޫގެ މޭޔަރ އަދި އެމްޑީޕީގެ ޓީކެޓްގައި ތިނަދޫގެ މޭޔަރކަމަށް ވާދަކުރައްވާ ސައުދު އަލީގެ ކެމްޕެއިންގައި ހަރަކާތްތެރިވާ މުވައްޒަފުންނެވެ.
އޭގެ ތެރެއިން ހދ. ކުޅުދުއްފުށީ ސައިޓަށް ބަދަލު ކުރި އަލީ ނާބިތު މުހައްމަދު އަކީ ތިނަދޫ ސައިޓުގެ ކޭޝިއަރަކަށް މަސައްކަތް ކުރި މީހެކެވެ. އަދި ތިނަދޫ ސައިޓުގެ ސީނިއާ އޮޕަރޭޝަންސް އޮފިސަރެއްގެ ގޮތުގައި ހުރި މުހައްމަދު ނާއިފް ވެސް ބަދަލުކުރީ ކުޅުދުއްފުށީ ސައިޓަށެވެ.
ހަމައެހެންމެ ތިނަދޫ ސައިޓު ސުޕަވައިޒެއްގެ މަޤާމުގައި ހުރި މުހައްމަދު ސާލިހު އަހްމަދު ބަދަލުކޮށްފައި ވަނީ ހއ. އިހަވަންދޫ ސައިޓަށެވެ.
ރާއްޖެ އެމްވީ އަށް އިތުބާރު ހުރި މަސްދަރަކުން މައުލޫމާތު ދީފައިވާ ގޮތުގައި މި މުވައްޒަފުން މަސައްކަތް ކުރާ ތަން ބަދަލުކުރުމުގެ ކުރިން ސަރުކާރާއި ދެކޮޅަށް ކެމްޕެއިން ކުރަމުންދާ ކަަމަށް ބުނެ އެ މުވައްޒަފުން ކުންފުނީގެ އޮފީހަށް ހާޒިރުކޮށްފައިވެ އެވެ. ނަމަވެސް އިންޒާރުގެ ނޯޓިސްގެ ގޮތުގައި ދިން ލިޔުމުގައި ހުރީ ތަފާތު ވާހަކަތަކެއް ކަމަށް ވަނީ އެނގިފަ އެވެ. އެ ލިޔުމުގައި މުވައްޒަފުންގެ މެދުގައި ނަފްރަތު އުފެއްދުމަށް މަސައްކަތް ކުރާ ކަމަށް ބުނެފައި ވާތީ އެ ލިޔުމުގައި މުވައްޒަފުން ސޮއިކޮށްފަ އެއް ނުވެ އެވެ.
ސަރުކާރު ހިންގާ ޕީއެންސީގެ ކެންޑިޑޭޓުންނަށް ވޯޓު ނުދޭނެ ކަމަށް ބުނުމުން ނުވަތަ އެމްޑީޕީގެ ކެނޑިޑޭޓަށް ތާއީދުކުރުމުން ވަޒީފާ އިން ވަކިކުރުމާއި މަޤާމް ދަށް ކުރުން އަދި ވަޒީފާ އަދާކުރާ ތަން ބަދަލުކުރުމުގެ މައްސަލަތައް ދަނީ ފެންމަތި ވަމުންނެވެ. އާއްމުން ދަނީ މިފަދަ ފިއްތުންތަކަކީ ސިޔާސީ ގޮތުން ނާޖާއިޒް ނުފޫޒު ފޯރުވަން ކުރާ ކަންކަން ކަމަށް ބުނެ އެކަމަށް ފާޑުކިޔަމުންނެވެ.