ލާމަރުކަޒީ މި ނިޒާމް އެމްޑީޕީ ނޫން ބަޔަކަށް ދީލާލުމަކީ ރައްޔިތުން އަޅާނެ އެންމެ ފަހު، އެންމެ ނުބައި، އެންމެ ނުރައްކާތެރި ފިޔަވަޅު ކަމަށް އައްޑޫގެ މޭޔަރ އަދި މޭޔަރ ކެނޑިޑޭޓް އަލީ ނިޒާރު ވިދާޅުވެއްޖެ އެވެ.
ނިޒާރު އެފަދައިން ވިދާޅުވީ އެމްޑީޕީގެ ހޭވައްލާތައްޔާރު ޖަލްސާގައި ވާހަކަދައްކަވަމުންނެވެ.
ރައްޔިތުން ބާރުވެރިކޮށް ރައްޔިތުންނާ ގާތުން ވެރިކަން ކުރުމުގެ ނިޒާމު ބައްޓަން ކޮށްދިނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަމަށް އޭނާ ވިދާޅުވި އެވެ. މި ނިޒާމަކީ އެމްޑީޕީގެ ފިކުރާއި ގުޅުން ހުރި ނިޒާމެއް ކަމަށާއި ދެން ތިބީ އެ ނިޒާމާއި ދެކޮޅު މީހުން ކަމަށް ފާހަގަކުރައްވާ ނިޒާރު ވިދާޅުވީ އެމްޑިޕީގެ ފިކުރާ ދެކޮޅު ބަޔަކު ވެރިކަމަށް އަންނަ ކޮންމެ ފަހަރަކު ލާމަރުކަޒީ ނިޒާމް އެއްކޮށް ފުނޑާލާ ކަމަށެވެ.
ލާމަރުކަޒީ ޤާނޫނަށް 18 ވަރަކަށް އިސްލާހު މި ސަރުކާރުން ގެނައި އިރު ލާމަރުކަޒީ ނިޒާމަށް ފަހު އެއްވެސް އިސްލާހެއް ނުގެނެވޭ ކަމަށް އޭނާ ވަނީ ވިދާޅުވެފަ އެވެ. މި ސަރުކާރުން، އެމްޑީޕީގެ މަސައްކަތުން މި ހިސާބަށް ގެނައި ޑިމޮކްރަސީ ފުނޑާލުމަކީ އެ ނިޒާމަށް ގެނައި ބަދަލުތައް ކައިރިން ދެކެވަޑައިގެންނެވި ބޭފުޅެއްގެ ހައިސިއްޔަތުން ވަރަށް ކަންބޮޑުވެވަޑައިގަންނަވާ ކަމެއް ކަމަށް ނިޒާރު ވަނީ ވިދާޅުވެފަ އެވެ.
އަތޮޅު ކައުންސިލްތައް އުވާލީ ވެސް އެއްވެސް ބަޔަކާއި މަަޝްވަރާ ނުކޮށް ކަަަމަށް ނިޒާރު ވިދާޅުވި އެވެ. މީގެ އިތުރުން އައްޑޫގެ މިހާރުގެ ހާލަތު އިތުރަށް ރަނގަޅުކުރަން ބޭނުންވާ ނަމަ އެމްޑީޕީގެ ކައުންސިލެއް އޮތުން މުހިންމު ކަމަށް އޭނާ ވިދާޅުވި އެވެ. އައްޑޫގެ ތަރައްޤީ އަށް މި ސަރުކާރުން ބޭއްވި ގާކޮޅެއް ވެސް ނެތް ކަމަށް ނިޒާރު ވިދާޅުވި އެވެ. އައްޑޫގެ ތަރައްޤީ އަށް އެންމެ ބޮޑަށް މަސައްކަތް ކޮށްދިން ކައުންސިލް އަކީ އެމްޑީޕީގެ ކައުންސިލް ކަމަށް ވެސް ނިޒާރު ވިދާޅުވި އެވެ.