ނ.މަނަދޫގައި އަލަށް ހޮސްޕިޓަލެއް އެޅުމަށް ރައީސް ޑރ.މުހައްމަދު މުއިއްޒުގެ ސަރުކާރުން ބިންގާ އެޅި ނަމަވެސް އެ ތަނުގެ މަސައްކަތް ކުރިއަށް ނުދާކަން ހާމަވެއްޖެ އެވެ.
ނ. މަނަދޫ ކައުންސިލް މެމްބަރު މޫމިނާ ސޯލިހު ރާއްޖެޓީވީ އަށް ދެއްވި ބަސްތީގަތުމެއްގައި ވިދާޅުވީ މިދިޔަ އަަހަރު ޖުލައި މަހު އެ ރަށަށް ވަޑައިގެން އެތަނުގެ ބިންގާ ރައީސް ޑރ.މުހައްމަދު މުއިއްޒު އަޅުއްވައިދެއްވި ނަމަވެސް އެ ތަނުގެ މަސައްކަތް ކުރިއަށް ނުދާ ކަމަށެވެ.
އެގޮތުން، ހޮސްޕިޓަލް އެޅުމަށް ކަނޑައެޅި ސަރަހައްދުގައި ރުއް ގަހުގެ ބަދަލު ހަމަޖެހި، އެތަނުގެ ބިން ސާފުކުރުމުގެ މަސައްކަތް ފެށި ނަމަވެސް އެ މަސައްކަތް މިހާރު އޮތީ ހުއްޓިފައި ކަމަށް އޭނާ ވިދާޅުވި އެވެ. ކައުންސިލުން ވަނީ އެ ރުއްތައް ނެގުމަށް ފަހު ގޮނޑަށް އުކާލުމުގެ ބަދަލުގައި އެ ރަށުގެ ބޮޑެތި މަގުތަކުގައި އެ ރުއް ގަސްތައް ޖަހާ ދިނުމަށް އެދިފަ އެވެ.
"އަޅުގަނޑުމެން ސީއެސްއާރުގެ ދަށުން ތެޔޮ ވެސް އަޅާ ދޭނަމޭ. ޚަރަދުވެސް ކުރެވިފަ ހުންނާނީ. އެކަމަކު ވެސް ރުއްތައް ގޮނޑަށް އަޅަމުން ދިޔައީ. އެގޮތަށް ޖަހަން ގެންދިޔަ ރުއްތައް ފީވެ ހަލާކުވެގެން ދިޔައީ. އެކަމެއް ނުއެއް ކުރެވުނު. އެ ވަރުގެ ޖާގަ އެއް ނެތޭ ކުނިކޮށީގަ. އެ ހިސާބުން ނޭނގެ ކައުންސިލަށް ކަންކަން ވެފައި އޮތް ގޮތް." އޭނާ ވިދާޅުވި އެވެ.
2022 ވަނަ އަހަރު މަނަދޫ ކައުންސިލާއި އެކު ބޭއްވި ބައްދަލުވުމެއްގައި ރައީސް މުއިއްޒު ވަނީ މަނަދޫ ހޮސްޕިޓަލް އެކްސްޓެންޝަންއާއި އައު ހޮސްޕިޓަލް ގެ މަސައްކަތް އެކުއެކީގައި ކުރިޔަށް ގެންދާ ކަމުގައި ވިދާޅުވެފަ އެވެ. އެ މަސައްކަތް އެމްޓީސީސީ އާއި ހަވާލު ކުރި އިތުރު ދެ ރަށުގެ ހޮސްޕިޓަލް ގެ މަސައްކަތާއި އެކުގައި 2024 ވަނަ އަހަރުގެ އެޕްރީލް މަހުގެ ތެރޭގަ އެވެ.
އެމްޓީސީސީއާ ހަވާލުކޮށްފައިވަނީ ނ މަނަދޫގައި 50 އެނދުގެ ހޮސްޕިޓަލް އެޅުމަށް ކަމަށްް ސިއްހީ ވުޒާރާ އިން މީގެ ކުރިން ވަނީ ބުނެފަ އެވެ.
އެ މަސައްކަތް އެމްޓީސީސީ އާއި ހަވާލުކުރި ނަމަވެސް މަސައްކަތުގެ ސުޕަރވައިޒިންގެ ޒިންމާ އާއި ގުޅުން ހުރި ބައެއް ކަންކަން ކައުންސިލުން ކުރުމަށް އެދި މިނިސްޓްރީގެ ސިޓީ އެއް ދާދިފަހުން ލިބިފައިވާ ކަމަށް ކައުންސިލުން ވަނީ ބުނެފަ އެވެ. ނަމަވެސް އެ ތަނުގެ ޑިޒައިނާއި ކުރެހުމުގެ މައުލޫމާތު އަދިވެސް ކައުންސިލް އާއި ހިއްސާ ކޮށްފަ އެއް ނުވެ އެވެ.
ނ.މަނަދޫ ހޮސްޕިޓަލް ގެ ވައުދަކީ ރައީސް މުއިއްޒުގެ ރިޔާސީ ވައުދެކެވެ. އެ އަތޮޅަކީ 13،000 އަށް ވުރެ ގިނަ މީހުންގެ އާބާދީ އެއް އޮތް ރަށަކަށް ވާއިރު މަނަދޫ އަކީ ސިއްހީ ޚިދުމަތަށް އެ ސަރަހައްދުގެ އާއްމުން ބަރޯސާ ވާ ރަށެވެ.