ލޯކަލް ކައުންސިލްތަކުގެ އިންތިޚާބަށް ކުރިމަތިލީ ކެންޑިޑޭޓުންގެ ތެރެއިން އެކަކުގެ ނަން އަނބުރާ ގެންދިޔަ އިރު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލީ ކެންޑިޑޭޓުންގެ ތެރެއިން 31 ކެންޑިޑޭޓުން ގެ ނަން އަނބުރާ ގެންގޮސްފި އެވެ.
އޭޕްރީލް މަހުގެ 4 ވަނަ ދުވަހު ބާއްވާ އިންތިޚާބަށް ކުރިމަތިލާ ފަރާތްތަކުގެ ނަން އަނބުރާ ގެންދިއުމުގެ ފުރުސަތު ބުރާސްފަތި ދުވަހު އޮތް ނަންބަރު ތަރުތީބުކުރުމާ ހަމައަށް ވަނީ ބަންދު ވެފަ އެވެ.
ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބަށް ކެންޑިޑޭޓުންގެ ނަންތައް ތަރުތީބު ކުރުމަށް ގުރުއަތު ނެގުން ބުރާސްފަތި ދުވަހު ހެނދުނ 10:00ން ފެށިގެން ވަނީ ކުރިއަށް ގެންގޮސްފަ އެވެ. ގުރުއަތު ނެގުން ރާއްޖޭގެ ހުރިހާ ރަށެއްގައި ވެސް ކުރިއަށްދިޔައީ އެއް ވަގުތެއްގައި ކަމަށް އިލެކްޝަންސް ކޮމިޝަނުން ބުނެފައިވެ އެވެ.
އިންތިޚާބުގައި 2،994 ކެންޑިޑޭޓުން ވާދަކުރުމަށް ފުރަތަމަ ހުށަހެޅި ނަމަވެސް 32 ކެންޑިޑޭޓުންގެ ނަން އަނބުރާ ގެންދިއުމުން ޖުމްލަ ކެންޑިޑޭޓުންގެ އަދަދު 2،962 ށް ވަނީ މަދުވެފަ އެވެ.
ކެންޑިޑޭޓް ނަންބަރާ އެކު ކެންޑިޑޭޓުންގެ ދާއިމީ ލިސްޓް އިލެކްޝަންސް ކޮމިޝަން އިން ރަސްމީކޮށް އިޢުލާނު ކުރާނީ ހޮނިހިރު ދުވަހު އެވެ.
މި އިންތިޚާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާ އިރު، އަންހެނުންގެ ކޮމިޓީތަކަށް ވެސް ހަމަ އެ އަދަދަށް މެންބަރުން އިންތިޚާބު ކުރުމަށް ވަނީ ހަމަ ޖެހިފަ އެވެ.
އިންތިޚާބުގައި 294,937 މީހުންނަށް ވޯޓުލުމުގެ ޙައްގު ލިބިގެންވެ އެވެ.