މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ ވެރިޔާ އިސްމާއިލް ސާޖިދު އެ މަގާމުން ވަކި ކުރި މައްސަލަ ވަޒީފާއާ ބެހޭ ޓްރައިބިއުނަލަށް ހުށަހަޅައިފި އެވެ.
ސާޖިދު މި މައްސަލަ ހުށަހެޅުއްވީ 4 ފެބްރުވަރީ 2026 ގަ އެވެ.
ސާޖިދު މަގާމުން ވަކިކުރީ ޖިންސީ ފުރައްސާރައިގެ މައްސަލައެއްގައި ކަމަށް ބުނެ 29 ޖެނުއަރީ 2026 ގަ އެވެ. އޭނާ މަގާމުން ވަކިކުރީ މައްސަލަ ބެލި އެމްއެމްއޭގެ އެތެރޭގެ ކޮމިޓީގެ ލަފާގެ މަތިން ގަވަރނަރ އަހުމަދު މުނައްވަރު އެވެ. އެފްއައިޔޫގެ ވެރިޔާގެ މަގާމުން ސާޖިދު ސަސްޕެންޑު ކުރީ 25 ޑިސެމްބަރު 2025 ގަ އެވެ.
ސާޖިދުގެ މައްޗަށް ކުރެވޭ ތުހުމަތެއް އޭނާ ވަނީ ދޮގު ކޮށްފަ އެވެ. އަދި އޭނާ ސޯޝަލް މީޑިއާގައި ކުރި ޕޯސްޓެއްގައިވަނީ، އެމްއެމްއޭގެ ކޮމިޓީން މައްސަލަ ބެލީ ވެސް ގާނޫނާ ހިލާފަށް ކަމަށެވެ.
އެފްއައިޔޫގެ އިސްވެރިޔާގެ މަގާމަށް ސާޖިދު އައްޔަންކުރީ މިދިޔަ އަހަރުގެ އޮގަސްޓް މަހުގެ ތެރޭގަ އެވެ.
އެފްއައިޔޫގެ ކުރީގެ ވެރިޔަކަށް ހުރި އަބްދުالله އަޝްރަފްގެ ބަދަލުގައި ސާޖިދު އެ މަޤާމަށް އައްޔަން ކުރީ ސްޓަރަކްޗަރަލް ބަދަލެއް ކަމަށް ބުނެ ގެނައި ބަދަލުތަކުގެ ތެރެއިންނެވެ. އޭނާ އެ މަގާމަށް ހަމަޖައްސާފައި ވަނީ ބާރަށު ދާއިރާގެ މެންބަރު އިބްރާހިމް ޝުޖާއު އަށް ބޮޑެތި ތުހުމަތުތަކެއް ކޮށް އެފްއައިޔޫ އިން ތައްޔާރު ކުރި ރިޕޯޓެއް ލީކުވިތާ 24 ގަޑިއިރު ތެރޭގަ އެވެ.