އެޑިޔުކޭޝަން މިނިސްޓްރީ މުވައްޒަފުންގެ ޕެންޝަން ފައިސާ ޕެންޝަން ފަންޑަށް ޖަމާ ނުކުރާތާ ފަސް މަހަށްވުރެ ގިނަ ދުވަސް ވެއްޖެ އެވެ.
ފ.އަތޮޅު ސްކޫލުގައި މަސައްކަތް ކުރާ ޓީޗަރެއް ރާއްޖެއެމްވީއަށް ވިދާޅުވީ ޕެންޝަން ފައިސާ އެންމެފަހުން ޖަމާކޮށްފައިވަނީ 2025 ވަނަ އަހަރުގެ ސެޕްޓެންބަރު މަހުގެ ތެރޭގައި ކަމަށެވެ. އޭގެ ފަހުން އެފައިސާ ޖަމާ ކޮށްފައިނުވާ ކަމަށާއި، އެކަން އެޗްއާރްގެ ސަމާލު ކަމަށް ގެނެސްފައިވާ ކަމަށެވެ.
ނަމަވެސް މިއަދާ ހަމައަށް ހައްލެއް ނުލިބޭ ކަމަށާއި، ފައިސާ ޖަމާނުކުރާ ސަބަބު ސާފު ކުރުމަށް މަސައްކަތް ކުރި ނަމަވެސް މިއަދާ ހަމައަށް ޖަވާބެއް ލިބިފައިނުވާ ކަަމަށެވެ.
އޭނާ ވިދާޅުވީ ޓީޗަރުންގެ އިތުރުން އެޑިޔުކޭޝަން މިނިސްޓްރީގެ ދަށުން މަސައްކަތް ކުރާ އެކި މުވައްޒަފުންނަށް މި މައްސަލަ ކުރިމަތިވެފައިވާ ކަމަށެވެ.
ފ.އަތޮޅު ސްކޫލުގައި މަސައްކަތް ކުރާ ޓީޗަރެއްގެ ޕެންޝަންގެ ފައިސާ އެންމެފަހުން ޖަމާކޮށްފައިވަނީ 2025 ވަނަ އަހަރުގެ ސެޕްޓެންބަރު މަހުގެ ތެރޭގައި
މުވައްޒަފުގެ އަތުން ޕެންޝަނަށް ކަނޑަނީ އަސާސީ މުސާރައިގެ ހަތް ޕަސެންޓެވެ. މުވައްޒަފުންގެ މުސާރައިން ޕެންޝަނަށް ރުފިޔާ ކަނޑާއިރު، އެފައިސާ ޖަމާ ނުކުރަނީ އެޑިޔުކޭޝަން މިނިސްޓްރީނެވެ.
މި މައްސަލައާ ގުޅޭގޮތުން ބަހެއް ހޯދުމަށް އެޑިޔުކޭޝަން މިނިސްޓަރު ޑރ. އިސްމާއީލް ޝަފީއުއަށް ގުޅި ނަމަވެސް ފޯނަށް ޖަވާބެއް ދެއްވާފައިނުވެ އެވެ. އަދި މިނިސްޓްރީގެ ބަހެއް ވެސް ވަނީ ލިބޭ ގޮތް ނުވެފަ އެވެ.
އެޑިޔުކޭޝަން މިނިސްޓްރީ މުވައްޒަފުންގެ ޕެންޝަން ފައިސާ ޕެންޝަން ފަންޑަށް ޖަމާ ނުކުރާ މައްސަލަ ބޮޑު ވެފައިވާއިރު، ޖެނުއަރީ މަހުގެ ތެރޭގައި ސަރުކާރު ހިއްސާވާ ކުންފުނި، ވޭސްޓް މެނޭޖުމެންޓު ކޯޕަރޭޝަން (ވެމްކޯ) މުވައްޒަފުންގެ ޕެންޝަން ފައިސާ ޕެންޝަން ފަންޑަށް ޖަމާ ނުކުރާ މައްސަލަ ވަނީ ބޮޑުވެފަ އެވެ. އަދި މިދިޔަ އަހަރުގެ އޮކްޓޫބަރު މަހުގެ ތެރޭގައި އާރްޑީސީގެ މުވައްޒަފުންގެ މުސާރައިން ޕެންޝަން ފައިސާ ކެނޑުމަށްފަހު އެ ފައިސާ ޖަމާނުކުރާ މައްސަލަ ވެސް ބޮޑުވެގެން ދިޔަ އެވެ.
ވަޒީފާ އަދާ ކުރާ ކޮންމެ ދިވެއްސަކު އަދި އެމީހަކަށް ވަޒީފާ ދޭ ފަރާތުން ޕެންޝަނަށް ފައިސާ ދައްކަން ގާނޫނުން ލާޒިމް ކުރެ އެވެ. އަދި ޕެންޝަނަށް ފައިސާ ޖަމާ ކުރަމުންދާ އަދަދާއި ތާރީހު އަދި ފަންޑުން ލިބޭ ނަފާތައް ޕެންޝަން ޕޯޓަލް މެދުވެރިކޮށް ބެލޭނެ އެވެ.