އިލެކްޝަން ކޮމިޝަން (އީސީ)ން އާއްމު ނުކުރާ މައުލޫމާތު ސަރުކާރުގެ ޕާޓީ، ޕްރޮގްރެސިވް ނޭޝަނަލް ކޮންގްރެސް (ޕީއެންސީ)ން ހާމަ ކުރާ ކަމަށް ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ން ބުނެފި އެވެ.
ބުދަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ވިލިނގިލި ދާއިރާގެ ރައީސް ހުސައިން ހަސަން ވަނީ އިލެކްޝަން ކޮމިޝަނުން ސިޔާސީ ޕާޓީތަކާ މެދު އަމަލުކުރާ ގޮތާއި މެދު ކަންބޮޑުވުން ފާޅު ކޮށްފަ އެވެ. އަދި އެކޮމިޝަންގެ މިނިވަންކަމާ މެދު ސުވާލު އުފައްދާފައިވެ އެވެ.
ހުސެއިން ވިދާޅުވީ ލޯކަލް ކައުންސިލް އިންތިޚާބަށް ތައްޔާރު ވަމުންދާއިރު، އެ ކޮމިޝަނުން އާއްމު ނުކުރާ މައުލޫމާތު ޕީއެންސީ ހާމަ ކުރާ ކަމަށެވެ. އިންތިޚާބަކާ ނުލައި ލިބޭ ގޮނޑިތަކުގެ ފުރިހަމަ މައުލޫމާތު ޕީއެންސީއަށް ލިބޭ ކަމަށާއި، މިއީ ކަންބޮޑުވާ ވަރަށް ބޮޑު މައްސަލައެއް ކަމަށް އޭނާ ވިދާޅުވި އެވެ. އަދި ވިދާޅުވީ އެ މައުލޫމާތުތައް އިލެކްޝަން ކޮމިޝަންގެ ތެރެއިން ޕީއެންސީއަށް ލިބޭ ކަމަށެވެ.
އަޅުގަނޑުމެން ކުރިން ވެސް ދެންނެވި ގޮތަށް އިލެކްޝަން ކޮމިޝަންގެ ރައީސް ޒާހިދު ، ރައީސް ޑރ.މުހައްމަދު މުއިއްޒާ އެކު މި ބާއްވާ ސިއްރު ބައްދަލުވުންތަކުގައި އެކަންކަމުގެ އެ ބައްދަލުވުންތަކުގެ ނަތީޖާ އަޅުގަނޑުމެންނަށް ފެނިގެން މިދަނީ. އިންތިޚާބަކާ ނުލާ ނެގޭ ގޮނޑިތަކުގެ އަދަދު އެބޭފުޅުންނަށް އެބަ އެނގޭ. ނެގެނީ ކޮންތަނަކުން ކަން އެބަ އެނގޭ. އަޅުގަނޑުމެން އެމްޑީޕީއަށް ވެސް އިންތިޚާބަކާ ނުލާ ގޮނޑިތައް އެބަ ލިބޭ. އެހެންނަމަވެސް އެކަންތައް މި އެނގެނީ އިލެކްޝަންގެ ތެރެއިން ނޫން. އެބޭފުޅުން ސީދާ އިލެކްޝަންގެ ތެރެއިން އެ މައުލޫމާތުތައް ހޯދައިގެން އާއްމު ކުރަނީ. އެބޭފުޅުންނަށް މިހާރު ވެސް އެބަ އެނގޭ 10 ޕަސެންޓަށްވާ ވަރަށް އެބޭފުޅުންނަށް ގޮނޑިތައް ލިބޭކަން. މިޒާތަށް ޕީއެންސީން ވާހަކަތައް ބައްޓަން ވެފައި ހުރީ.އެމްޑީޕީގެ ވިލިނގިލި ދާއިރާގެ ރައީސް ހުސައިން ހަސަން
މީގެ އިތުރުން ހުސެއިން ވިދާޅުވީ ސަރުކާރުގައި މިއަދު ބާރު އޮތުމުން އެބާރު ނަހަމަ ގޮތުގައި ބޭނުން ކުރަމުންދާ ކަމަށެވެ.
ނަމަވެސް ޕީއެންސީއަކީ ފިކުރެއް ނޫން ކަމަށާއި، ޕީއެންސީއަކީ ސިޔާސަތެއް ވިއްކައިގެން ރައްޔިތުންގެ ވޯޓު ހޯދި ބައެއް ނޫން ކަމަށެވެ. ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ ރައްޔިތުންނަށް އޮޅުވާލައިގެން ކަމަށާއި، ވެރިކަން ހިންގަވަން މަސައްކަތް ކުރައްވަނީ ވެސް އެގޮތަށް އެ އޮޅުވާލައިގެން ކަމަށް އޭނާ ވިދާޅުވި އެވެ.