ސަރުކާރު ހިންގާ ޕީއެންސީގެ ފުލް މެޖޯރިޓީ އޮތް މާލޭ ސިޓީ ކައުންސިލްގެ ބުދަ ދުވަހުގެ ބައްދަލުވުން ކޯރަމް ހަމަ ނުވެގެން ނުބޭއްވި، އެންމެފަހުން ނިންމާލައިފި އެވެ.
ގަލޮޅު އުތުރު ދާއިރާގެ ކައުންސިލަރު ސައިފް ފާތިހު ވަނީ ބުދަ ދުވަހުގެ ޖަލްސާ ކޯރަމް ހަމަނުވެގެން ނުބޭއްވުނު ކަން ހާމަ ކުރައްވާފަ އެވެ. ސައިފް ވަނީ ކައުންސިލް ބައްދަލުވުމުގެ ވީޑިއޯ އެއް ވެސް ހިއްސާ ކުރައްވާފަ އެވެ.
ވީޑިއޯ އިން ފެންނަ ގޮތުގައި ރިޔާސަތުގައި އިންނަވާ މޭޔަރު އާދަމް އާޒިމް ވަނީ ބުދަ ދުވަހުގެ ޖަލްސާގެ ކޯރަމް އަކީ 10 މެންބަރުން ނަމަވެސް ޖަލްސާ އަށް ވަޑައިގަތީ 7 މެންބަރުން ކަމަށް ވިދާޅުވެފަ އެވެ.
އެއީ މޭޔަރު އާދަމް އާޒިމް އާ، މައްޗަންގޮޅި މެދު ކައުންސިލަރު ފާތިމަތު އިޝާން، ހުޅުމާލެ ކައުންސިލަރު އަލީ އައިމަން، މައްޗަންގޮޅި އުތުރު ކައުންސިލަރު ސައީދާ ރަޝާދު، ގަލޮޅު އުތުރު ކައުންސިލަރު ސައިފް އަލީ ފާތިހު އަދި ގަލޮޅު ހުޅަނގު ކައުންސިލަރު މަރިޔަމް ނާޒިމާ އަދި މައްޗަންގޮޅި ދެކުނު ކައުންސިލަރު އާއިޝަތު ނާޒިމާ އެވެ.
އެއަށްފަހު މޭޔަރު ވަނީ ކޯރަމް ހަމަ ނުވާތީ ޖަލްސާ ކުރިއަށް ނުގެންދެވޭނެ ކަމަށް ވިދާޅުވެ ޖަލްސާ ނިންމަވާލައްވާފަ އެވެ.
ކައުންސިލް މެމްބަރު ސައިފް ފާތިހް ވިދާޅުވީ، "މާލޭގެ މައްސަލަތައް ފުނިޖެހިފައި." ވާ ކަމަށެވެ. އެހެން ނަމަވެސް ކޯރަމް ހަމަ ނުވާތީ، އެއިން ކަމެއް އެޖެންޑާ ކުރުމުގެ ބޭނުމެއްވެސް ނެތް ކަމުގަ އެވެ.
ސައިފް ވަނީ ހޮވިފައިވާ ކައުންސިލުގެ މެމްބަރުން ޖަލްސާ އަށް ހާޒިރު ނުވެވޭއިރު އަލުން ޕީއެންސީ އިން އިންތިޚާބުގައި މެމްބަރުން ހޮވަން މިއުޅޭ ސަބަބަކީ ކޮބާތޯ ވެސް ސުވާލު ކުރައްވާފަ އެވެ.
ބުދަ ދުވަހުގެ އެޖެންޑާގައި އޮތީ ފެބްރުއަރީ 4 ވަނަ ދުވަހުގެ ޔައުމިއްޔާ ފާސް ކުރުމާ ރިޔާސަތުން އަންގާ އެންގުން ތައް އެންގުމެވެ.
މާލޭ ސިޓީ ކައުންސިލުގެ ސަރުކާރު ހިންގާ ޕީއެންސީ އަށް ނިސްބަތްވާ ގިނަ ކައުންސިލަރުން ޖަލްސާ އަށް ހާޒިރުނުވުމުގެ ސަބަބުން މީގެ ކުރިން ވެސް އެކި ފަހަރުމަތިން ޖަލްސާ ނުބޭއްވިގެން ވަނީ ކެންސަލް ކޮށްފަ އެވެ.
ސިޓީ ކައުންސިލްގެ ގިނަ ޖަލްސާތަކެއް ކޯރަމް ހަމަނުވެގެން ނިންމާލަން ޖެހޭއިރު އެއީ ޕީއެންސީގެ ކައުންސިލަރުން ގަސްތުގައި ފުލް މެޖޯރިޓީގެ ނަހަމަ ބޭނުން ހިފައިގެން ގަސްތުގައި ކުރަމުންދާ ކަމެއް ކަމަށް ވެސް ގިނަ ބަޔަކު ތުހުމަތު ކުރެ އެވެ. އެގޮތުން ކައުންސިލް ގެ ކޯރަމް ގެއްލުވާލަނީ މުއިއްޒު އާ ގުޅުން ހުރި މައްސަލަތައް އެޖެންޑާ ކުރާތީ އެކަންކަން ކުރިއަށް ގެންދިޔަ ނުދިނުމަށް ކަމަށް އިދިކޮޅު ފަރާތްތަކުން ދަނީ ބުނަމުންނެވެ.
މާލެ ސިޓީ ކައުންސިލުގައި މާލޭގެ 18 ދާއިރާގެ ކައުންސިލަރުންނާއި މޭޔަރު ހިމެނޭހެން ތިއްބަވަނީ 19 ބޭފުޅުންނެވެ. އޭގެތެރެއިން 14 ކައުންސިލަރުންނަކީ ވެރިކަން ކުރާ ޕީއެންސީ އަށް ނިސްބަތްވެވަޑައިގަންނަވާ ބޭފުޅުންނެވެ. މާލެ ސިޓީ ކައުންސިލުގެ ކޯރަމް އަކީ 10 ކައުންސިލަރުންނެވެ.