ޤާނޫނު އަސާސީ އެންމެ މީހެއްގެ ވެރިކަން ދެމެހެއްޓުމަށް ބައްޓަން ކުރުމަކީ އިސްލާޙެއް ނޫން ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
އެކްސް ގައި އަންގާރަ ދުވަހު ކުރެއްވި ޕޯސްޓެއްގައި ޝާހިދު ވިދާޅުވީ، ރައީސް މުއިއްޒު ޤާނޫނީ ހެދުން އަޅުވައިގެން ޤާނޫނު އަސާސީ ކަތިލުމަށް މި ކުރައްވާ ކަމަކީ ވެރިކަމުގެ ބާރު ދާއިމީ ކުރުމަށް, ދައުރު ދިގު ދައްމާލުމަށް އަޅުއްވާ ފުރަތަމަ ފިޔަވަޅު ކަމަށެވެ.
ޝާހިދު މިހެން ވިދާޅުވި އިރު، ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެކުގައި ބޭއްވުމަށް، ރައީސް މުއިއްޒު ވެރިކަން ކުރައްވާ ޕާޓީ - ޕީއެންސީ އިން ރައްޔިތުންގެ މަޖިލީހަށް ހުށަހެޅި ބިލު މަޖިލީހުން އަންގާރަ ދުވަހު ވަނީ ފާސްކޮށްފަ އެވެ. ޕީއެންސީގެ ސުޕަރ މެޖޯރިޓީ އޮންނަ މަޖިލިހުން މިބިލު ފާސްކޮށްފައި ވަނީ 72 މެންބަރުންގެ ވޯޓުންނެވެ.
އަންގާރަ ދުވަހުގެ ޖަލްސާ ގައި ބިލު ފާސްކުރި އިރު ކޮމިޓީ މަރުހަލާ ގައި ބިލުގެ މަސައްކަތް ގެންދިޔައީ އެންމެ 5 މިނެޓަށްކަން ފާހަގަ ކުރެވެ އެވެ.
އަވަސް އަރުވާލައިގެން ގާނޫނު އަސާސީ އަށް ބަދަލު ގެންނަން ފާސް ކުރުމާ ބެހޭ ގޮތުން ޝާހިދު ވިދާޅުވީ، މި ފިޔަވަޅު ނިމޭ ހިސާބަކީ ދިގުދެމިގެންދާ ޚުދުމުޚުތާރު އަނިޔާވެރި ބިރުވެރި ވެރިކަމެއް ފެށޭ ހިސާބު ކަމުގަ އެވެ.
"ރައީސް މުއިއްޒު ރައްޔިތުން ދެކެ، ވޯޓު ފޮށި ދެކެ މި ގަންނަނީ އަމަށަކު ބިރެއް ނޫން. ވަކިވަކިން ބާއްވާ ދެ އިންތިޚާބަކީ ރައްޔިތުންނަށް ދެ ފަހަރު މަތިން ސަރުކާރު ޖަވާބުދާރީ ކުރުވުމަށް ލިބޭ ފުރުޞަތެއް."
ރައްޔިތުން އަތުން ބާރުތައް ފޭރިގަނެ، ވޯޓުން ވެރިކަން ބަދަލު ކުރެވޭނެ މަގު ހަނިކޮށް، ޤާނޫނު އަސާސީ އެންމެ މީހެއްގެ ވެރިކަން ދެމެހެއްޓުމަށް ބައްޓަން ކުރުމަކީ އިސްލާޙެއް ނޫން ކަމަށާއި މިއީ ބަޣާވާތެއް ކަމަށް ޝާހިދު ސިފަ ކުރެއްވި އެވެ.
ޤާނޫނާއި ޤާނޫނު އަސާސީ ފުނޑުފުނޑުކޮށްލައިގެން ވެރިކަމުގައި ތާއަބަދު ހުންނެވޭނެ ކަމަށް ގަބޫލުކުރެވުމަކީ ގޯހެއް ކަމަށާއި ދިވެހިން އެކަމާއި ދެކޮޅަށް ނުކުންނާނެ ކަމަށާއި މިއީ ރައްޔިތުންގެ ޤައުމު ކަމަށް ވެސް ޝާހިދު ވިދާޅުވި އެވެ.
"ދިވެހި ރައްޔިތުން ނިކުމެ މިކަމާއި އިޙްތިޖާޖް ކުރާނެ." ޝާހިދު ވިދާޅުވި އެވެ.
ދެ އިންތިޚާބު އެއްކޮށްލުމަށް ސަރުކާރުގެ ފަރާތުން އިނގުރައިދޫ ދާއިރާގެ މެންބަރު އިބްރާހިމް ފަލާޙު ހުށަހެޅުއްވި މިބިލުގެ ބަހުސް މަރުހަލާގައި ވެސް އަދި ބިލު ފާސް ކުރުމަށް ބޭއްވި ޖަލްސާ ގައި ވެސް އިދިކޮޅު މެމްބަރުން ވަނީ މިބިލަށް ވަރަށް ބޮޑަށް ފާޑު ކިޔާފަ އެވެ. އަންގާރަ ދުވަހުގެ ޖަލްސާ ގައި މި ބިލަށް އިހުތިޖާޖު ކުރުމުން ރިޔާސަތުގައި އިންނެވި ޕީއެންސީ އަށް ނިސްބަތްވާ ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ވަނީ އިދިކޮޅު އެމްޑީޕީ އަށް ނިސްބަތްވާ ބައެއް މެމްބަރުންގެ ނަން އިއްވާ ތަޅުމުން ބޭރުކޮށްފަ އެވެ.
ރައްޔިތުންގެ މަޖިލީހުން މި ބިލު ފާސް ކުރުމުން އަންނަ އޭޕްރިލް މަހުގެ 4 ވަނަ ދުވަހު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އިންތިޚާބާއެކު ގާނޫނު އަސާސީ އަށް މި ބަދަލު ގެނައުމަށް ފެންނަ ނުފެންނަ ވޯޓު ނެގުމަށް އިލެކްޝަންސް ކޮމިޝަނުން ތައްޔާރުވަމުންދާ ކަމުގެ އަޑުތައް ވަނީ ފެތުރިފަ އެވެ.
ބިލުގައިވާ ގޮތުން މަޖިލީހުގެ އިންތިޚާބު ކުރިއަށް އޮތްތަނުގައި ބާއްވާނީ، ޤާނޫނު އަސާސީގެ 110ވަނަ މާއްދާގެ ދަށުން ރައީސުލްޖުމްހޫރިއްޔާއަކު ހޮވުމަށް ބާއްވާ އިންތިޚާބާ އެކުގަ އެވެ. އަދި މަޖިލީހުގެ އުމުރަކީ، ޑިސެމްބަރު މަހުގެ 1 ވަނަ ދުވަހުން ފެށިގެން 5 އަހަރު ދުވަހުގެ މުއްދަތެއް ކަމަށާއި، އެ މުއްދަތު ހަމަވުމުން މަޖިލިސް އުވޭނެ ކަމަށް ބިލުގައި ބުނެފައިވެ އެވެ.