ރައްޔިތުންގެ
މަޖިލީހުގެ ކެންދޫ ދާއިރާގެ އެމްޑީޕީގެ މެންބަރު މައުރޫފް ޒާކިރުގެ ނަން އިއްވާ،
މަޖިލީހުގެ ތަޅުމުން ބޭރު ކުރުމަށްފަހު އެ ޕާޓީގެ އިތުރު 3 މެންބަރުންގެ
ނަން އިއްވާ މަޖިލީހުގެ ތަޅުމުން ބޭރު ކޮށްފި އެވެ.
އަންގާރަ
ދުވަހުގެ ރައްޔިތުންގެ މަޖިލީހުގެ ޖަލްސާގައި ރިޔާސީ އިންތިޚާބާއި ރައްޔިތުންގެ
މަޖިލީހުގެ އިންތިޚާބު އެއްކޮށްލުމަށް ގާނޫނު އަސާސީ އަށް ހުށަހެޅި އިސްލާހުގެ ގެ
ބިލު މަޖިލީހުގެ މިނިވަން މުއައްސަސާތަކުގެ ކޮމިޓީ އިން ދިރާސާ ކޮށް ނިންމި ގޮތުގެ
ރިޕޯޓު ވަނީ ހުށަހަޅާފަ އެވެ. އަދި އެ ރިޕޯޓަށް ބަހުސް ކޮށްފައި ވެ އެވެ.
ބަހުސްގެ
ވަގުތުގައި އިނގުރައިދޫ ދާއިރާގެ މެންބަރު އަދި ޕީއެންސީ ގެ ޕީޖީ ލީޑަރު
އިބްރާހިމް ފަލާހު ވަނީ ދެވަނަ ފުރުސަތަކަށް އެދިވަޑައިގެންފަ އެވެ. މެންބަރު ފަލާހުއަށް
ރިޔާސަތުން ފުރުސަތު ދިނުމުން ވައިކަރަދޫ ދާއިރާގެ މެންބަރު ހުސައިން ޒިޔާދު ވަނީ
ނިޒާމީ މައްސަލަ އެއް ނަންގަވާފަ އެވެ.
ޒިޔާދު
ވިދާޅުވީ އޭނާ ފުރަތަމަ ފުރުސަތަށް އެދިވަޑައިގެންފައި ވަނިކޮށް ރިޔާސަތުން ފަލާހު
އަށް ދެވަނަ ފުރުސަތެއް ދެއްވާފައި ވަނީ މަޖިލީހުގެ ގަވާއިދާ ޚިލާފަށް ކަމަށެވެ.
އެގޮތުން މަޖިލީހުގެ ގަވާއިދުގައި ވާގޮތުން ދެވަނަ ފުރުސަތަކަށް އެދުނު
މެންބަރަކަށް އެ ފުރުސަތު ދެވޭނީ އޭގެ ފަހުން ކަމަށް ޒިޔާދު ވިދާޅުވި އެވެ.
އެކަމަށް
ރައްދު ދެއްވާ ރިޔާސަތުގައި އިންނަވާ މަޖިލީހުގެ ރައީސް އަބްދުއްރަހީމް އަބްދުﷲ
ވިދާޅުވީ ފުރުސަތު ދެއްވަމުން ދަނީ ގަވާއިދާ އެއްގޮތަށް ކަމަށެވެ. އަދި ފުރުސަތު
ދެއްވަމުން ދަނީ ޕޯޓަލްގައިވާ ގޮތަށް ކަމަށް ވެސް އަބްދުއްރަހީމް ވިދާޅުވި އެވެ.
އެއާއެކު
ޒިޔާދު ވަނީ ރިޔާސަތުގެ ކުރިމަތީގައި އިހުތިޖާޖު ކުރައްވާފަ އެވެ. ޒިޔާދުގެ އިތުރުން
އެމްޑީޕީ އަށް ނިސްބަތްވެވަޑައިގަންނަވާ އެހެން މެންބަރުން ވެސް ވަނީ ރިޔާސަތުގެ
ކުރިމަތީގައި އިހުތިޖާޖު ކުރައްވާފަ އެވެ. އެގޮތުން ގަލޮޅު ދެކުނު ދާއިރާގެ
މެންބަރު މީކާއިލް އަހްމަދު ނަސީމް އާ، ކެޔޮދޫ ދާއިރާގެ މެންބަރު މުހައްމަދު
ނިއުޝާދު އާ، ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ގެ
އިތުރުން މާވަށު ދާއިރާގެ މެންބަރު އަހުމަދު ޝާކިރު އިހުތިޖާޖު ކުރެއްވި އެވެ.
މެންބަރުން
އިހުތިޖާޖު ކުރައްވަން ފެއްޓެވުމާއެކު ރިޔާސަތުން ވަނީ ތަކުރާރު ކޮށް
މެންބަރުންނަށް ނަސޭހަތްތެރިވެވަޑައިގެންފަ އެވެ. އަދި ދެން ޖެހޭނީ ނަން އިއްވާ
މަޖިލީހުގެ ތަޅުމުން ބޭރު ކުރަން ކަމަށް ވިދާޅުވުމަށްފަހު ފުރަތަމަ އިއްވީ މެންބަރު
ޒިޔާދުގެ ނަމެވެ. އެއަށްފަހު މެންބަރު މީކާއިލް އަދި މެންބަރު ނިއުޝާދު ގެ ނަން
ވެސް އިއްވާފައި ވެ އެވެ.
އަންގާރަ
ދުވަހުގެ މަޖިލީހުގެ ޖަލްސާގައި އެމްޑީޕީގެ އިތުރު 3 މެންބަރުންގެ ނަން އިއްވި
ނަމަވެސް މެންބަރުން ތަޅުން ދޫކުރައްވާ ވަޑައިނުގެންނެވުމާއެކު މަޖިލީހުގެ ޖަލްސާ
ވަނީ ކުޑަ ވަގުތުކޮޅަކަށް މެދުކަނޑާލާފަ އެވެ. އެއަށްފަހު ޖަލްސާ އަލުން ފެށީ ނަން
އިއްވި މެންބަރުން މަޖިލީހުގެ ތަޅުމުން ބޭރު ކުރުމަށްފަހުގަ އެވެ.