ރައްޔިތުންގެ
މަޖިލީހުގެ ކެންދޫ ދާއިރާގެ އެމްޑީޕީގެ މެންބަރު މައުރޫފް ޒާކިރުގެ ނަން އިއްވާ،
މަޖިލީހުގެ ތަޅުމުން ބޭރު ކޮށްފި އެވެ.
އަންގާރަ
ދުވަހުގެ ރައްޔިތުންގެ މަޖިލީހުގެ ޖަލްސާގައި މައުރޫފް ގެ ނަން އިއްވާފައި ވަނީ ރިޔާސީ
އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަށް ގާނޫނު އަސާސީ
އަށް ހުށަހެޅި އިސްލާހުގެ ގެ ބިލު މަޖިލީހުގެ މިނިވަން މުއައްސަސާތަކުގެ ކޮމިޓީ
އިން ދިރާސާ ކޮށް ނިންމި ގޮތުގެ ރިޕޯޓަށް ބަހުސް ކުރަން ހުޅުވާލުމަށްފަހުގަ އެވެ.
ކޮމިޓީ
ރިޕޯޓު މަޖިލީހުގެ ތަޅުމަށް ހުށަހެޅުމާއެކު މައުރޫފް ވަނީ ގާނޫނު އަސާސީ
ހިފައިގެން ރިޔާސަތުގެ މޭޒުކޮޅު ކުރިމަތީގައި އިހުތިޖާޖު ކުރައްވާފަ އެވެ.
އެއާއެކު
ރިޔާސަތުގައި އިންނަވާ މަޖިލީހުގެ ރައީސް އަބްދުއްރަހީމް އަބްދުﷲ ވަނީ ތަކުރާރު
ކޮށް މެންބަރު ގޮނޑީގައި އިށީނދެވަޑައިގަތުމަށް ނަސޭހަތްތެރިވެފަ އެވެ. އަދި
އެއަށްފަހު މެންބަރު ގެ ނަން އިއްވާ މައުރޫފް ވަނީ ތަޅުމުން ބޭރު ކޮށްފަ އެވެ.
އަންގާރަ ދުވަހުގެ ޖަލްސާގެ އެޖެންޑާގައިވާ ކަންތައްތަކަށް ބަލާއިރު، އިލެކްޝަންސް ކޮމިޝަންގެ ގާނޫނުގެ 4 ވަނަ މާއްދާގެ (ށ) ގައިވާ ގޮތުގެ މަތިން، އިލެކްޝަންސް ކޮމިޝަނަށް މެންބަރަކު އައްޔަން ކުރެއްވުމަށްޓަކައި ރައީސް ފޮނުވައްވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލައާއި ގުޅޭ ދާއިމީ ކޮމިޓީއަށް ފޮނުވުން ހިމެނެ އެވެ.
މީގެ އިތުރުން ފޮރިން ސަރވިސްގެ ގާނޫނޫގައިވާ ގޮތުގެ މަތިން ރިޕަބްލިކް އޮފް ސަރބިއާ އަށާއި ރިޕަބްލިކް އޮފް މޯލްޓާ އަށް ދިވެހިރާއްޖެއިން ކަނޑައަޅުއްވާ ނޮން-ރެސިޑެންޓް ސަފީރު ހަމަޖެއްސެވުމަށްޓަކައި ރައީސް ފޮނުއްވާފައިވާ މައްސަލަ، ދިރާސާކޮށް ގޮތެއް ނިންމުމަށް އެ މައްސަލައާއި ގުޅޭ ދާއިމީ ކޮމިޓީއަށް ފޮނުވުން ހިމެނެ އެވެ.