ސުނާމީ ބިނާ މައިޒާން ތަރައްގީ ކުރަން އެ ސަރަހައްދުގައި ޕާކުކޮށްފައި ހުރި އުޅަނދުތައް ނަގަން އަންގައިފި އެވެ.
ފުލުހުން އެކްސްގައި ކުރި ޕޯސްޓެއްގައި ބުނީ މާލޭ ސްކޭޕިންގ މަޝްރޫއުގެ ތެރެއިން ސުނާމީ ބިނާ މައިޒާން ތަރައްގީކުރުމުގެ މަސައްކަތަށް ކުރުމަށް އެ ސަރަހައްދުގައި ޕާކުކޮށްފައިވާ އުޅަނދުތައް 2026 ފެބްރުއަރީ 9 ވަނަ ދުވަހުގެ ހަވީރު 6:00 ގެ ކުރިން އެ ސަރަހައްދުން ނަގާ އެތަން ހުސްކުރުމަށް އެދޭ ކަމަށެވެ.
ފުލުހުން ވަނީ މިއާއެކު ޗާޓެއް ވެސް އާންމުކޮށްފަ އެވެ. ޗާޓުގައިވާ ގޮތުން އުޅަނދުތައް ނަގަން އަންގާފައިވަނީ ސުނާ ބިނާ މައިޒާނުން އުތުރުގައި މަގުގައި ޕާކް ކުރުމަށް ހުއްދަ ދީފައިވާ ޖާގަތައް ހިމެނޭ ސަރަހައްދުގަ އެވެ.
ސުނާބިނާ މައިޒާން ތަރައްގީ ކުރުމަށް އުޅަނދުތައް ހުސްކުރަން އެންގި އިރު އެތަން ވަނީ ވަރަށް ބޮޑަށް ވިރާނާ ވެފަ އެވެ. މާލޭގެ ލޮނުޒިޔާރަތްކޮޅުގައި އެންމެ ފުރަތަމަ ބެހެއްޓި ސުނާމީ ބިނާ މާލޭގެ ހުޅަނގު ފަރާތު ނެރަށް ބަދަލުކުރީ ރައީސް އަބްދުﷲ ޔާމީންގެ ވެރިކަމުގައި އެތަނުގައި ސިނަމާލެ ބުރިޖު އެޅުމަށެވެ.
މިހާރުގެ ރައީސް ޑރ. މުހައްމަދު މުއިއްޒު ހައުސިންގ މިނިސްޓަރުކަމުގައި ހުރި އިރު ސުނާމީ ބިނާ ބަދަލުކޮށް ބެލެހެއްޓީ މިނިސްޓްރީ އިންނެވެ. އަދި ފަހުން މޭޔަރުކަމަށް ވަޑައިގެން ހުންނެވި ދުވަސް ވަރު އެތަން ބެލެހެއްޓީ ވެސް ސިޓީ ކައުންސިލްގެ ބެލުމުގެ ދަށުންނެވެ.